Harbhajan Sreesanth Slap Incident / ପୁଣି ଚର୍ଚ୍ଚାରେ 'ଚାପୁଡ଼ା କାଣ୍ଡ'; ଶ୍ରୀସନ୍ଥ କହିଲେ, ଭାଇ ବୋଲି ଡାକୁଥିଲି…ଏବେ ବ୍ଲକ୍ କରିଛି

ହରଭଜନ ସିଂହ ଏବଂ ଶ୍ରୀସନ୍ଥଙ୍କ ମଧ୍ୟରେ ହୋଇଥିବା 'ଚାପୁଡ଼ା ଘଟଣା' IPL ୨୦୨୬ରେ ପୁଣି ଥରେ ସାମ୍ନାକୁ ଆସିଛି । ୨୦୦୮ ମସିହାରେ ହୋଇଥିବା ବିବାଦ ସେତେବେଳେ ବେଶ୍‌ ଚର୍ଚ୍ଚା ସୃଷ୍ଟି କରିଥିଲା । ଆଉ ଏବେ ଶ୍ରୀସନ୍ଥଙ୍କ ଏକ ବୟାନ ଏହି ଘଟଣାକୁ ପୁଣି ଥରେ ଚର୍ଚ୍ଚାକୁ ଆଣିଛି । ଶ୍ରୀସନ୍ଥ ଗୁରୁତର ଅଭିଯୋଗ ଆଣି ଦାବି କରିଛନ୍ତି ଯେ ଭଜ୍ଜୀ ଚାପୁଡ଼ା ଘଟଣା ଉପରେ ଆଧାରିତ ଏକ ବିଜ୍ଞାପନରୁ ପ୍ରାୟ ୧ କୋଟି ରୋଜଗାର କରିଛନ୍ତି । ଶ୍ରୀସନ୍ଥ ଏହା ମଧ୍ୟ କହିଛନ୍ତି ଯେ ସେ ଏବେ ହରଭଜନଙ୍କୁ ଇନଷ୍ଟାଗ୍ରାମରେ ବ୍ଲକ୍‌ କରିଛନ୍ତି ।

ବିଜ୍ଞାପନରୁ ପ୍ରାୟ ୧ କୋଟି ରୋଜଗାର କରିଥିଲେ

ଏକ ଜାତୀୟ ଗଣମାଧ୍ୟମରେ ଶ୍ରୀସନ୍ଥ କହିଛନ୍ତି, "ଯେ ପର୍ଯ୍ୟନ୍ତ କୌଣସି ବିବାଦ ନ ହୋଇଥିଲା ସେପର୍ଯ୍ୟନ୍ତ ମୁଁ କୌଣସି ସାକ୍ଷାତକାରରେ ହରଭଜନଙ୍କ ବିଷୟରେ କେବେ କଥା ହୋଇନଥିଲି । କିନ୍ତୁ ସେ ସେହି (ଚାପୁଡ଼ା ଘଟଣା) ବିଷୟରେ ଏକ ବିଜ୍ଞାପନରୁ ପ୍ରାୟ ୮୦ ଲକ୍ଷରୁ ୧ କୋଟି ରୋଜଗାର କରିଥିଲେ । ତା'ପରେ ସେ ମୋତେ ଫୋନ୍ କରି ମୋ ଷ୍ଟୋରୀରେ ବିଜ୍ଞାପନ ସେୟାର କରିବାକୁ କହିଲେ ।"

ଅଧିକ ପଢ଼ନ୍ତୁ: କେଉଁ ପାଣି ପିଅନ୍ତି ବିରାଟ କୋହଲି, ଦାମ୍‌ ଜାଣିଲେ ଆପଣ ହୋଇଯିବେ ଆଶ୍ଚର୍ଯ୍ୟ

ଶ୍ରୀସନ୍ଥ ଆହୁରି କହିଛନ୍ତି, "ମୁଁ ତାଙ୍କୁ କହିଥିଲି ଯେ ମୁଁ କ୍ଷମା କରିବି, କିନ୍ତୁ ଏ ଘଟଣାକୁ କେବେ ଭୁଲିବ ନାହିଁ । ଯଦି କେହି ତୁମ ପ୍ରତି ଭୁଲ କରେ, ତେବେ ତୁମେ ସେମାନଙ୍କୁ କ୍ଷମା କରିବା ଉଚିତ କିନ୍ତୁ କେବେ ସେହି ଘଟଣାକୁ ଭୁଲିବ ନାହିଁ । ଯଦି ତୁମେ ଭୁଲିଯାଅ, ତେବେ ସେମାନେ ପୁଣି ଥରେ ଏହା କରିବେ । ଏଥିରେ କୌଣସି ସନ୍ଦେହ ନାହିଁ ।"

ଇନଷ୍ଟାଗ୍ରାମରେ ବ୍ଲକ କରାଯାଇଛି

ଶ୍ରୀସନ୍ଥ କହିଛନ୍ତି, "ମୋର ସେହି ବ୍ୟକ୍ତିଙ୍କ ସହିତ କୌଣସି ସମ୍ପର୍କ ନାହିଁ । ମୁଁ ତାଙ୍କୁ ଭାଇ ବୋଲି ଡାକୁଥିଲି । କିନ୍ତୁ ଗତ ଗୋଟିଏ କିମ୍ବା ଦୁଇ ମାସ ମଧ୍ୟରେ ସେ ସେହି ବିଜ୍ଞାପନ କରିଥିଲେ ଏବଂ ଏବେ ମୁଁ ତାଙ୍କୁ ଇନଷ୍ଟାଗ୍ରାମରେ ବ୍ଲକ କରିଦେଇଛି ।"

ଚାପୁଡ଼ା ଘଟଣା କ'ଣ ଥିଲା ?

୨୦୦୮ ମସିହାରେ ଆଇପିଏଲର ପ୍ରଥମ ସିଜିନରେ ହରଭଜନ ସିଂହ ମୁମ୍ବାଇ ଇଣ୍ଡିଆନ୍ସ ଏବଂ ପଞ୍ଜାବ କିଙ୍ଗ୍ସ ମଧ୍ୟରେ ଏକ ମ୍ୟାଚ୍ ପରେ ପଡ଼ିଆରେ ଏସ୍. ଶ୍ରୀସନ୍ଥଙ୍କୁ ଚାପୁଡ଼ା ମାରିଥିଲେ । ଏହି ଘଟଣା ପରେ ଶ୍ରୀସନ୍ଥଙ୍କୁ ପଡ଼ିଆରେ କାନ୍ଦୁଥିବା ଦେଖାଯାଇଥିଲା ।