ସେପ୍ଟେମ୍ବର ୯ରୁ ଆରମ୍ଭ ହେବାକୁ ଯାଉଛି ଏସିଆ କପ୍ ୨୦୨୫ । ଏଥିପାଇଁ ଦୁବାଇରେ ଜୋରଦାର ପ୍ରସ୍ତୁତି ଜାରି ରଖିଛି ଟିମ୍ ଇଣ୍ଡିଆ । ତେବେ ଏସିଆ କପ୍ ଆରମ୍ଭ ହେବା ପୂର୍ବରୁ ବେଶ୍ ଚର୍ଚ୍ଚାରେ ଥିଲେ ଟିମ୍ ଇଣ୍ଡିଆର ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା । ପ୍ରଥମେ ସେ ତାଙ୍କ ହେୟାର ଷ୍ଟାଇଲ ଓ ଲୁକ୍ ପାଇଁ ଚର୍ଚ୍ଚାରେ ଥିଲେ। ଆଉ ଏବେ ତାଙ୍କ ଦାମିକିଆ ଘଣ୍ଟା ପାଇଁ ଚର୍ଚ୍ଚା ପରିସରକୁ ଆସିଛନ୍ତି । ଯାହାକୁ ପ୍ରାକ୍ଟିସ୍ ବେଳେ ପିନ୍ଧିଥିଲେ । ସେ ରିଚାର୍ଡ ମିଲେ RM27-04 ଘଣ୍ଟା ପିନ୍ଧିଥିଲେ । ଯାହାର ମୂଲ୍ୟ ପ୍ରାୟ ୨୦ କୋଟି ଟଙ୍କା ବୋଲି କୁହାଯାଉଛି । ଆପଣଙ୍କୁ କହି ରଖୁଛୁ ଯେ ଏସିଆ କପ୍ ଜିତିଥିବା ଦଳକୁ ମଧ୍ୟ ଏତେ ପୁରସ୍କାର ରାଶି ମିଳିବ ନାହିଁ।

୨୦୨୫ ଏସିଆ କପ୍ ପାଇଁ ହାର୍ଦ୍ଦିକ ପାଣ୍ଡ୍ୟା ତାଙ୍କ ହେୟାର ଷ୍ଟାଇଲକୁ ନେଇ ବେଶ୍ ଚର୍ଚ୍ଚାରେ ଥିଲେ । ଅଭ୍ୟାସ କରିବାକୁ ଯିବା ସମୟରେ ଦୁବାଇର ICC ଏକାଡେମୀରେ ତାଙ୍କୁ ଦେଖିବାକୁ ବହୁ ସଂଖ୍ୟକ ପ୍ରଶଂସକ ମଧ୍ୟ ପହଞ୍ଚିଥିଲେ। ଏହା ପରେ, ସେ ତାଙ୍କ ସୋସିଆଲ ମିଡିଆରେ ଅଭ୍ୟାସର ଫଟୋ ମଧ୍ୟ ସେୟାର କରିଥିଲେ । ଆଉ ସେୟାର ହୋଇଥିବା ଫଟୋରେ ସମସ୍ତଙ୍କ ନଜର ତାଙ୍କ ମହଙ୍ଗା ଘଣ୍ଟା ଉପରେ ଥିଲା । ଯାହା ବିଶ୍ବର କେବଳ ୫୦ ଜଣଙ୍କ ପାଖରେ ରହିଛି ।

ଏସିଆ କପ୍ ପାଇଁ ଅଭ୍ୟାସ କରିବା ସମୟରେ ହାର୍ଦ୍ଦିକ ପାଣ୍ଡ୍ୟା ଯେଉଁ ଘଣ୍ଟା ପିନ୍ଧିଥିଲେ ତାହା ହେଉଛି ରିଚାର୍ଡ ମିଲ୍ RM27-04। ଏହା ଟେନିସ୍ ଖେଳାଳି ରାଫେଲ୍ ନାଡାଲଙ୍କ ପାଇଁ ସ୍ୱତନ୍ତ୍ର ଭାବରେ ତିଆରି କରାଯାଇଥିଲା । କେବଳ ୫୦ଟି ଏପରି ଘଣ୍ଟା ତିଆରି ହୋଇଥିଲା। ଏହି ଘଣ୍ଟାର ଓଜନ ମାତ୍ର ୩୦ ଗ୍ରାମ । ଏହା ୧୨,୦୦୦ G ରୁ ଅଧିକ ଚାପ ସହ୍ୟ କରିପାରିବ। ଏକ ୱେବସାଇଟ୍ ଅନୁଯାୟୀ, ଏହି ଘଣ୍ଟାର ମୂଲ୍ୟ ପ୍ରାୟ ୨୦ କୋଟି ଟଙ୍କା।

Back to business 🇮🇳 pic.twitter.com/Q1yEYAAoSw
— hardik pandya (@hardikpandya7) September 6, 2025

ଏସିଆ କପ୍ ୨୦୨୫ ସେପ୍ଟେମ୍ବର ୯ରୁ ଆରମ୍ଭ ହେବ। ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଭାରତୀୟ ଦଳ ସେପ୍ଟେମ୍ବର ୧୦ରୁ ଏହାର ଅଭିଯାନ ଆରମ୍ଭ କରିବ। ପ୍ରଥମ ମ୍ୟାଚରେ UAE ସହିତ ଖେଳିବ । ଏହାପରେ ଟିମ୍ ଇଣ୍ଡିଆର ଦ୍ୱିତୀୟ ମ୍ୟାଚ୍ ସେପ୍ଟେମ୍ବର ୧୪ରେ ପାକିସ୍ତାନ ବିପକ୍ଷରେ ଖେଳିବ।

ସେହିପରି ଭାରତ ଗ୍ରୁପ୍ ପର୍ଯ୍ୟାୟର ତୃତୀୟ ମ୍ୟାଚ୍ ଓମାନ ସହିତ ଖେଳିବ। ଗ୍ରୁପ୍ B ରେ ଆଫଗାନିସ୍ତାନ, ବାଂଲାଦେଶ, ଶ୍ରୀଲଙ୍କା ଏବଂ ହଂକଂ ଅଛନ୍ତି । ଏଥର ଏସିଆ କପ୍ ଜିତିଥିବା ଦଳର ପୁରସ୍କାର ରାଶି ବୃଦ୍ଧି କରାଯାଇଛି । ବିଜେତା ଦଳ ଏଥର ୩ ଲକ୍ଷ ଆମେରିକୀୟ ଡଲାର ପାଇବ, ଯାହା ଭାରତୀୟ ମୁଦ୍ରାରେ ପ୍ରାୟ ୨.୬ କୋଟି ଟଙ୍କା।

Argus News | argus news | -Argusnews Home: Odisha Latest News, Breaking News, Trending News, Live TV and more