Hardik Pandya GT Return / ଗୁଜରାଟ ଫେରିବାକୁ ଚାହୁଁଥିଲେ ହାର୍ଦ୍ଦିକ ! କିନ୍ତୁ ପାଣ୍ଡ୍ୟାଙ୍କ ଏହି ସର୍ତ୍ତ ପାଇଁ ହୋଇପାରିଲାନି ଡିଲ୍‌...

ମୁମ୍ବାଇ ଇଣ୍ଡିଆନ୍ସରେ ଏବେ କ’ଣ ସବୁକିଛି ଠିକ୍ ଚାଲିନାହିଁ ? ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କୁ ନେଇ IPLରେ ଚର୍ଚ୍ଚା ଜୋର ଧରିଛି । ରିପୋର୍ଟ ଅନୁସାରେ, ଆଗାମୀ ଆଇପିଏଲ ସିଜିନ୍‌ ପୂର୍ବରୁ ଗୁଜରାଟ ଟାଇଟନ୍ସକୁ ଫେରିବା ନେଇ ହାର୍ଦ୍ଦିକଙ୍କ ପକ୍ଷରୁ ଆଲୋଚନା ହୋଇଥିଲା, କିନ୍ତୁ ଅଧିନାୟକ ପଦକୁ ନେଇ ରଖାଯାଇଥିବା ସର୍ତ୍ତ ହିଁ ଡିଲ୍‌ରେ ବଡ଼ ବାଧା ସାଜିଥିବା ଦାବି କରାଯାଉଛି । ତେବେ ହାର୍ଦ୍ଦିକ କାହିଁକି ଗୁଜରାଟ ଫେରିବାକୁ ଚାହୁଁଥିଲେ ଏବଂ ତାଙ୍କ ଏହି ସର୍ତ୍ତକୁ କାହିଁକି ମନା କଲା ଗୁଜରାଟ ଟାଇଟନ୍ସ ?

ମୁମ୍ବାଇ ଇଣ୍ଡିଆନ୍ସ ଓ ହାର୍ଦ୍ଦିକ ପାଣ୍ଡ୍ୟାଙ୍କ ସମ୍ପର୍କକୁ ନେଇ IPLରେ ଚର୍ଚ୍ଚା ଜୋର ଧରିଛି । ରିପୋର୍ଟ ଅନୁସାରେ, ହାର୍ଦ୍ଦିକ ଅନ୍ୟ ଫ୍ରାଞ୍ଚାଇଜିର ବିକଳ୍ପ ଖୋଜୁଥିବା ବେଳେ ନିଜ ପୁରୁଣା ଦଳ ଗୁଜରାଟ ଟାଇଟନ୍ସକୁ ଫେରିବା ନେଇ ମଧ୍ୟ ଆଲୋଚନା ହୋଇଥିଲା । କିନ୍ତୁ ଏହି ଡିଲ୍‌ରେ ଆସିଲା ଏକ ବଡ଼ ଟ୍ୱିଷ୍ଟ । ହାର୍ଦ୍ଦିକଙ୍କ ଅଧିନାୟକ ସର୍ତ୍ତ ପାଇଁ ଏହି ଡିଲ୍‌ ଆଗକୁ ବଢ଼ିପାରିଲା ନାହିଁ । ଗୁଜରାଟ ତାଙ୍କୁ ଫେରାଇବାକୁ ପ୍ରସ୍ତୁତ ଥିଲା କିନ୍ତୁ ଅଧିନାୟକ ସର୍ତ୍ତରେ ରାଜି ନଥିବା ରିପୋର୍ଟ ସାମ୍ନାକୁ ଆସିଛି ।

ହାର୍ଦ୍ଦିକଙ୍କ ନେତୃତ୍ୱରେ ଗୁଜରାଟ ଟାଇଟନ୍ସ ୨୦୨୨ର ଡେବ୍ୟୁ ସିଜନ୍‌ରେ IPL ଟ୍ରଫି ଜିତିଥିଲା । ଆଉ ପର ସିଜିନ୍‌ରେ ବି ହାର୍ଦ୍ଦିକଙ୍କ ନେତୃତ୍ବରେ ଗୁଜରାଟ ଫାଇନାଲରେ ପ୍ରବେଶ କରିଥିଲା । କିନ୍ତୁ ଫାଇନାଲ ମ୍ୟାଚ୍‌ରେ ପରାଜୟ ବରଣ କରିଥିଲା । ପରେ ୨୦୨୪ ପୂର୍ବରୁ ହାର୍ଦ୍ଦିକ ମୁମ୍ବାଇ ଇଣ୍ଡିଆନ୍ସକୁ ଫେରିଥିଲେ ଏବଂ ରୋହିତ ଶର୍ମାଙ୍କ ସ୍ଥାନରେ ଅଧିନାୟକ ହୋଇଥିଲେ ।

ରିପୋର୍ଟ ଅନୁସାରେ, ହାର୍ଦ୍ଦିକଙ୍କୁ ପୁଣି ଦଳକୁ ନେବା ନେଇ ଗୁଜରାଟ ଟାଇଟନ୍ସର ଆପତ୍ତି ନଥିଲା । ଏପରିକି ବର୍ତ୍ତମାନର ଅଧିନାୟକ ଶୁଭମନ ଗିଲଙ୍କ ସହ ମଧ୍ୟ ଏନେଇ ଆଲୋଚନା ହୋଇଥିବା ଦାବି କରାଯାଇଛି । କିନ୍ତୁ ହାର୍ଦ୍ଦିକ ପୁଣି ଗୁଜରାଟର ଅଧିନାୟକ ହେବାକୁ ଚାହିଁଥିବାରୁ ଡିଲ୍‌ଟି ଆଗକୁ ବଢ଼ିନଥିବା କୁହାଯାଉଛି ।

ଅନ୍ୟପଟେ, ହାର୍ଦ୍ଦିକଙ୍କ ଭବିଷ୍ୟତକୁ ନେଇ କୋଲକାତା ନାଇଟ୍ ରାଇଡର୍ସ ଏବଂ ଚେନ୍ନାଇ ସୁପର କିଙ୍ଗ୍ସ ଭଳି ଦଳ ମଧ୍ୟ ମୁମ୍ବାଇ ଇଣ୍ଡିଆନ୍ସ ସହ ଯୋଗାଯୋଗ କରିଥିବା ସୂଚନା ମିଳିଛି । ତେବେ ହାର୍ଦ୍ଦିକଙ୍କ ପ୍ରବକ୍ତା ଫ୍ରାଞ୍ଚାଇଜିଗୁଡ଼ିକ ସହ ତାଙ୍କର ସିଧାସଳଖ ଟ୍ରେଡ୍ ଆଲୋଚନା ହୋଇଥିବା ଖବରକୁ ଖଣ୍ଡନ କରିଛନ୍ତି । ତାଙ୍କ କହିବା ଅନୁସାରେ, ଯଦି କୌଣସି ପଦକ୍ଷେପ ନିଆଯାଇଥାଏ, ତେବେ ତାହା ମୁମ୍ବାଇ ଇଣ୍ଡିଆନ୍ସ ମାଧ୍ୟମରେ ହିଁ ହୋଇଛି ।

ତେଣୁ ଏବେ ବଡ଼ ପ୍ରଶ୍ନ—ହାର୍ଦ୍ଦିକ ପାଣ୍ଡ୍ୟା ମୁମ୍ବାଇ ଇଣ୍ଡିଆନ୍ସରେ ରହିବେ ନା ଆଗାମୀ IPL ସିଜନ୍‌ରେ ନୂଆ ଦଳର ଜର୍ସି ପିନ୍ଧିବେ ? ଏହି ଚର୍ଚ୍ଚା ଉପରେ ଏବେ ସମସ୍ତଙ୍କ ନଜର ।