Hardik Pandya KKR / CSK ନୁହେଁ, KKRରେ ଯୋଗ ଦେବେ ହାର୍ଦ୍ଦିକ ପାଣ୍ଡ୍ୟା ? ୨୫ କୋଟି ସହ ଅଧିନାୟକ ପଦ ଅଫର୍ !

IPL ୨୦୨୭ ପୂର୍ବରୁ ସବୁଠାରୁ ବଡ଼ ପ୍ରଶ୍ନ—ହାର୍ଦ୍ଦିକ ପାଣ୍ଡ୍ୟା କେଉଁ ଦଳ ପାଇଁ ଖେଳିବେ ? ସେ ମୁମ୍ବାଇ ଇଣ୍ଡିଆନ୍ସ ଛାଡ଼ିବେ ? ନା ଆଉ ଥରେ ନୂଆ ଜର୍ସିରେ ମଇଦାନକୁ ଓହ୍ଲାଇବେ ? ଏହି ଚର୍ଚ୍ଚା ମଧ୍ୟରେ ଆସିଛି ଏକ ବଡ଼ ଅପଡେଟ୍ । ଏପର୍ଯ୍ୟନ୍ତ ଚେନ୍ନାଇ ସୁପର କିଙ୍ଗ୍ସକୁ ରେସରେ ସବୁଠାରୁ ଆଗରେ ଧରାଯାଉଥିଲା, କିନ୍ତୁ ଏବେ ଖେଳ ବଦଳିଯାଇଛି । କୋଲକାତା ନାଇଟ୍ ରାଇଡର୍ସ ମଧ୍ୟ ହାର୍ଦ୍ଦିକଙ୍କୁ ଦଳରେ ସାମିଲ କରିବାକୁ ଆଗ୍ରହ ଦେଖାଇଛି । ଏମିତିକି ଖବର ଆସୁଛି ଯେ, KKR ହାର୍ଦ୍ଦିକଙ୍କୁ କେବଳ ଦଳରେ ନୁହେଁ, ସିଧାସଳଖ ଅଧିନାୟକ ମଧ୍ୟ କରିପାରେ ।

ଆଇପିଏଲ୍ ୨୦୨୭ ପୂର୍ବରୁ ସବୁଠାରୁ ବଡ଼ ଚର୍ଚ୍ଚାର ବିଷୟ ପାଲଟିଛନ୍ତି ଭାରତୀୟ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା । ସେ ଆସନ୍ତା ସିଜିନରେ କେଉଁ ଦଳ ପାଇଁ ଖେଳିବେ, ତାହାକୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳୁଛି । ଗୋଟିଏ ପଟେ ସେ ମୁମ୍ବାଇ ଇଣ୍ଡିଆନ୍ସ ଛାଡ଼ିପାରନ୍ତି ବୋଲି ଚର୍ଚ୍ଚା ଚାଲିଥିବା ବେଳେ, ଅନ୍ୟପଟେ ଅନେକ ଫ୍ରାଞ୍ଚାଇଜି ତାଙ୍କୁ ନିଜ ଦଳରେ ସାମିଲ କରିବାକୁ ଆଗ୍ରହୀ ଥିବା ଖବର ସାମ୍ନାକୁ ଆସୁଛି ।

କିଛିଦିନ ପୂର୍ବରୁ ହାର୍ଦ୍ଦିକଙ୍କୁ ନେଇ ଚେନ୍ନାଇ ସୁପର କିଙ୍ଗ୍ସ ସବୁଠାରୁ ଆଗରେ ଥିବା କୁହାଯାଉଥିଲା । କିନ୍ତୁ ବର୍ତ୍ତମାନ ସମୀକରଣ ବଦଳିଯାଇଛି। ରିପୋର୍ଟ ଅନୁସାରେ କୋଲକାତା ନାଇଟ୍ ରାଇଡର୍ସ ମଧ୍ୟ ହାର୍ଦ୍ଦିକ ପାଣ୍ଡ୍ୟାଙ୍କୁ ନିଜ ଦଳରେ ନେବାକୁ ଆଗ୍ରହ ଦେଖାଇଛି ।

ଖବର ଅନୁଯାୟୀ, KKR କେବଳ ହାର୍ଦ୍ଦିକଙ୍କୁ ଦଳରେ ନେବାକୁ ଚାହୁଁନାହିଁ, ବରଂ ତାଙ୍କୁ ଦଳର ଅଧିନାୟକ ମଧ୍ୟ କରିପାରେ । ଗତ ଦୁଇ ସିଜିନରେ ଅଜିଙ୍କ୍ୟ ରାହାଣେଙ୍କ ନେତୃତ୍ୱରେ କୋଲକାତାର ପ୍ରଦର୍ଶନ ଆଶାଅନୁଯାୟୀ ହୋଇନଥିବାରୁ ଦଳ ଏବେ ଜଣେ ଅଭିଜ୍ଞ ଅଧିନାୟକଙ୍କୁ ଖୋଜୁଛି। ହାର୍ଦ୍ଦିକ ଜଣେ ଅଲରାଉଣ୍ଡର ହୋଇଥିବାରୁ ବ୍ୟାଟିଂ, ବୋଲିଂ ଓ ନେତୃତ୍ୱ - ତିନୋଟି କ୍ଷେତ୍ରରେ ଦଳକୁ ଶକ୍ତିଶାଳୀ କରିପାରିବେ ।

ତେବେ ଏପର୍ଯ୍ୟନ୍ତ ଏହା ସ୍ପଷ୍ଟ ହୋଇନାହିଁ ଯେ KKR, ମୁମ୍ବାଇ ଇଣ୍ଡିଆନ୍ସ ସହ ଖେଳାଳି ବଦଳ କରିବ ନା କେବଳ ଟଙ୍କା ଦେଇ ଏହି ଡିଲ୍ ସମ୍ପୂର୍ଣ୍ଣ କରିବ । ରିପୋର୍ଟ ଅନୁସାରେ ଖେଳାଳି ଅଦଳବଦଳ ପାଇଁ KKR ପାଖରେ ବହୁତ ବିକଳ୍ପ ନାହିଁ । ଏହି ଚର୍ଚ୍ଚା ମଧ୍ୟରେ ଅଜିଙ୍କ୍ୟ ରାହାଣେଙ୍କ ଭବିଷ୍ୟତକୁ ନେଇ ମଧ୍ୟ ପ୍ରଶ୍ନ ଉଠିଛି ।

ଅନ୍ୟପଟେ କ୍ୟାମେରନ୍ ଗ୍ରୀନ୍‌ଙ୍କ ନାମ ମଧ୍ୟ ଏହି ଟ୍ରେଡ୍‌ରେ ଚର୍ଚ୍ଚାକୁ ଆସିଛି । ଯଦି ହାର୍ଦ୍ଦିକ KKRରେ ଯୋଗ ଦିଅନ୍ତି, ତେବେ ଦଳରେ ଦୁଇଜଣ ଦ୍ରୁତ ବୋଲିଂ ଅଲରାଉଣ୍ଡର ରହିବାରୁ ପ୍ଲେଇଂ ଇଲେଭେନର ସନ୍ତୁଳନ ବିଗିଡ଼ିପାରେ । ସେଥିପାଇଁ କ୍ୟାମେରନ୍ ଗ୍ରୀନ୍ ଓ ହାର୍ଦ୍ଦିକଙ୍କ ମଧ୍ୟରେ ଅଦଳବଦଳ ହୋଇପାରେ ବୋଲି ମଧ୍ୟ ଆଲୋଚନା ଜାରି ରହିଛି । କୁହାଯାଉଛି, ଗ୍ରୀନ୍‌ଙ୍କୁ ମିଳିଥିବା ପ୍ରାୟ ୨୫ କୋଟି ଟଙ୍କାର ମୂଲ୍ୟରେ KKR ହାର୍ଦ୍ଦିକଙ୍କୁ ସାଇନ୍ କରିବାକୁ ଚେଷ୍ଟା କରିପାରେ । ଯଦିଓ ମୁମ୍ବାଇ ଇଣ୍ଡିଆନ୍ସ କେବଳ ଗ୍ରୀନ୍‌ଙ୍କୁ ନେଇ ଏହି ଡିଲ୍‌ରେ ରାଜି ହେବ କି ନାହିଁ, ତାହା ଏବେ ସ୍ପଷ୍ଟ ନୁହେଁ ।

ଏହା ପୂର୍ବରୁ ଚେନ୍ନାଇ ସୁପର କିଙ୍ଗ୍ସ ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ମଧ୍ୟ ଏକ ସମ୍ଭାବ୍ୟ ଡିଲ୍‌ର ଚର୍ଚ୍ଚା ହୋଇଥିଲା। ପ୍ରଥମେ ଆୟୁଷ ମାତ୍ରେ ଓ ଶିଭମ ଦୁବେଙ୍କ ନାମ ସାମ୍ନାକୁ ଆସିଥିଲା। ପରେ ଖବର ଆସିଥିଲା ଯେ CSK, ହାର୍ଦ୍ଦିକଙ୍କ ବଦଳରେ ଶିଭମ ଦୁବେ ଓ ଡେୱାଲ୍ଡ ବ୍ରେଭିସଙ୍କୁ ନେଇ ଏକ କାଉଣ୍ଟର ଅଫର ଦେଇଥିଲା ।

ହାର୍ଦ୍ଦିକ ପାଣ୍ଡ୍ୟାଙ୍କ IPL କ୍ୟାରିୟର ଯଦି ଦେଖିବା ତାହାଲେ, ସେ ଏପର୍ଯ୍ୟନ୍ତ ୧୬୨ଟି ମ୍ୟାଚ୍ ଖେଳି ୨୯୫୫ ରନ୍ ସଂଗ୍ରହ କରିବା ସହ ୮୨ଟି ୱିକେଟ୍ ମଧ୍ୟ ନେଇଛନ୍ତି । ନିଜ ଅଲରାଉଣ୍ଡ ପ୍ରଦର୍ଶନ ପାଇଁ ସେ IPLର ଅନ୍ୟତମ ପ୍ରଭାବଶାଳୀ ଖେଳାଳି ଭାବେ ପରିଚିତ। ତେବେ IPL ୨୦୨୭ରେ ସେ କେଉଁ ଦଳର ଜର୍ସି ପିନ୍ଧିବେ, ତାହା ଆଗାମୀ ଦିନରେ ସ୍ପଷ୍ଟ ହେବ ।