ରବିବାର ଟି-୨୦ ବିଶ୍ବକପ୍‌ରେ ଖେଳାଯିବ ସବୁଠୁ ବଡ଼ ମ୍ୟାଚ୍‌ । ମୁହାଁମୁହିଁ ହେବେ ଦୁଇ ପାରମ୍ପାରିକ ପ୍ରତିଦ୍ବନ୍ଦୀ ଭାରତ-ପାକିସ୍ତାନ । କଲମ୍ବୋରେ ଖେଳାଯିବ ଏହି ହାଇଭୋଲଟେଜ୍‌ ମ୍ୟାଚ୍ । ଏହି ମ୍ୟାଚ୍‌ରେ ସମସ୍ତଙ୍କର ନଜର କେବଳ କ୍ୟାପଟେନ୍‌ ସୂର୍ଯ୍ୟକୁମାର ଯାଦବ କିମ୍ବା ଅଭିଷେକ ଶର୍ମା ଉପରେ ନୁହେଁ ବରଂ ସେହି ଖେଳାଳିଙ୍କ ଉପରେ ମଧ୍ୟ ରହିବ ଯିଏ ପାକିସ୍ତାନ ବିରୋଧରେ ସବୁବେଳେ ନିଜର ସର୍ବଶ୍ରେଷ୍ଠ ପ୍ରଦର୍ଶନ କରିଛନ୍ତି । ସେହି ଖେଳାଳି ଅନ୍ୟ କେହି ନୁହେଁ ହାର୍ଦ୍ଦିକ ପାଣ୍ଡ୍ୟା । ସେ ଅନେକ ଅବସରରେ ପାକିସ୍ତାନକୁ ଚାପରେ ପକାଇଛନ୍ତି ଏବଂ ପାକିସ୍ତାନୀ ଖେଳାଳିମାନଙ୍କୁ ଅସୁବିଧାରେ ପକାଇବା ପାଇଁ ଅନେକ ଉପାୟ ମଧ୍ୟ ଜାଣନ୍ତି ।

ଅହମ୍ମଦାବାଦର ସେହି ମନ୍ତ୍ର ଓ ପାକିସ୍ତାନ ହୋଇଥିଲା ପରାସ୍ତ

କ୍ରିକେଟ୍‌ ପ୍ରେମୀମାନେ ଆଜି ମଧ୍ୟ ୨୦୨୩ ଦିନିକିଆ ବିଶ୍ବକପ୍‌ ସମୟର ସେହି ମୁହୂର୍ତ୍ତକୁ ଭୁଲିପାରିନାହାନ୍ତି । ଯେତେବେଳେ ଅହମ୍ମମଦାବାଦର ନରେନ୍ଦ୍ର ମୋଦି ଷ୍ଟାଡିଅମ୍‌ରେ ହାର୍ଦ୍ଦିକ ପାଣ୍ଡ୍ୟା ବଲ୍‌କୁ ଧରି କିଛି ମନ୍ତ୍ର ପଢ଼ୁଥିବା ପରି ମନେ ହେଉଥିଲା । ଆଉ ଏହାର ପରବର୍ତ୍ତୀ ବଲ୍‌ରେ ପାକିସ୍ତାନର ସେଟ୍ ବ୍ୟାଟ୍ସମାନ୍ ଇମାମ-ଉଲ-ହକ୍ ଆଉଟ୍ ହୋଇଗଲେ । ଇମାମ ସେହି ମ୍ୟାଚରେ ୩୮ ବଲ୍‌ରେ ୩୬ ରନ୍ କରିଥିଲେ । ଯଦିଓ ଏହା କୌଣସି ମନ୍ତ୍ର ନଥିଲା, କିନ୍ତୁ କ୍ରିକେଟ୍ ଜଗତରେ ଏହାକୁ ତାଙ୍କର “କଳା ଯାଦୁ” ବୋଲି କହି ସୋସିଆଲ ମିଡିଆରେ ଭାଇରାଲ କରାଯାଇଥିଲା । ଆଜି କଲମ୍ବୋରେ କ୍ରିକେଟ୍‌ପ୍ରେମୀ ଆଶା କରୁଛନ୍ତି ଯେ ହାର୍ଦ୍ଦିକ ତାଙ୍କର ସେହି ଯାଦୁକର ବୋଲିଂ ମାଧ୍ୟମରେ ପାକିସ୍ତାନକୁ ବ୍ୟାକଫୁଟ୍‌କୁ ନେବେ ।

ବିଗତ କିଛି ବର୍ଷ ମଧ୍ୟରେ ପାକିସ୍ତାନ ବିରୋଧରେ ହାର୍ଦ୍ଦିକ ଭାରତର ସବୁଠାରୁ ବଡ଼ ମ୍ୟାଚ୍ ୱିନର୍ ମଧ୍ୟରୁ ଜଣେ ହୋଇଛନ୍ତି । ଭାରତ-ପାକିସ୍ତାନ ଟି-୨୦ ଇତିହାସରେ ସେ ସବୁଠାରୁ ଅଧିକ ୧୫ଟି ୱିକେଟ୍ ନେଇଛନ୍ତି । ସେ ପାକିସ୍ତାନ ବିରୋଧରେ ପ୍ରତ୍ୟେକ ପାରିରେ କମ୍ ସେ କମ୍ ଗୋଟିଏ ୱିକେଟ୍ ନେଇଛନ୍ତି । କେବଳ ବଲ୍‌ରେ ନୁହେଁ ବ୍ୟାଟିଂରେ ମଧ୍ୟ ଚମତ୍କାର ପ୍ରଦର୍ଶନ କରିଛନ୍ତି । ତେଣୁ ଏହି ଗୁରୁତ୍ବପୂର୍ଣ୍ଣ ମ୍ୟାଚ୍‌ରେ ସେ ଉଭୟ ବ୍ୟାଟ୍ ଓ ବଲ୍‌ରେ କମାଲ କରିପାରନ୍ତି ।

ଏହି ଟି-୨୦ ବିଶ୍ବକପ୍‌ରେ ହାର୍ଦ୍ଦିକ ପାଣ୍ଡ୍ୟା ତାଙ୍କ ଜୀବନର ସର୍ବଶ୍ରେଷ୍ଠ ଫର୍ମରେ ରହିଛନ୍ତି । ନାମିବ୍ୟା ବିପକ୍ଷ ମ୍ୟାଚ୍‌ରେ ସେ ମାତ୍ର ୨୮ ବଲ୍‌ରେ ୫୨ ରନ୍‌ କରିଥିଲେ ଏବଂ ୨ ଓ୍ବିକେଟ୍‌ ମଧ୍ୟ ନେଇଥିଲେ । ମ୍ୟାଚ୍ ପରେ ସେ କହିଥିଲେ ଯେ ସେ ଗତ ଦୁଇ ମାସ ଧରି ସକାଳ-ସନ୍ଧ୍ୟା କଠିନ ପ୍ରଶିକ୍ଷଣ କରୁଛନ୍ତି । ଯାହାର ପ୍ରଭାବ ତାଙ୍କର ଫିଟ୍‌ନେସ୍ ଓ ଖେଳରେ ସ୍ପଷ୍ଟ ଦେଖାଯାଉଛି ।
ପଢନ୍ତୁ ଏହି ଖବର: ସୂର୍ଯ୍ୟକୁମାର ଦେଲେ ବଡ଼ ବୟାନ, ପାକିସ୍ତାନ ବିପକ୍ଷରେ ଖେଳିବେ ଅଭିଷେକ ଶର୍ମା