Hardik Pandya Trade / ହାର୍ଦ୍ଦିକଙ୍କୁ ନେଇ ବଡ଼ ଚର୍ଚ୍ଚା, CSK ନା KKR—କେଉଁ ଦଳକୁ ଯିବେ ଷ୍ଟାର ଅଲରାଉଣ୍ଡର ?

IPL ୨୦୨୭ ପୂର୍ବରୁ ହାର୍ଦ୍ଦିକ ପାଣ୍ଡ୍ୟାଙ୍କୁ ନେଇ ବେଶ୍‌ ଚର୍ଚ୍ଚା ଜାରି ରହିଛି । ମୁମ୍ବାଇ ଇଣ୍ଡିଆନ୍ସର ଅଧିନାୟକ ହିସାବରେ ଆଶାନୁରୂପ ସଫଳତା ନମିଳିବା ପରେ ଏବେ ଦଳ ବଦଳାଇବେ କି ହାର୍ଦ୍ଦିକ ? ତାଙ୍କୁ ନିଜ ଦଳରେ ସାମିଲ କରିବାକୁ CSK ଓ KKR ମଧ୍ୟରେ ଟକ୍କର ଲାଗିଥିବା ଚର୍ଚ୍ଚା ଜୋର ଧରିଛି । ତେବେ ହାର୍ଦ୍ଦିକଙ୍କ ଆଗାମୀ ଠିକଣା କେଉଁଠି—ଚେନ୍ନାଇ ନା କୋଲକାତା ? ଏହାକୁ ନେଇ ଏବେ କ୍ରିକେଟ୍ ପ୍ରଶଂସକଙ୍କ ଉତ୍ସୁକତା ବଢ଼ିଛି ।

ଏହି ଚର୍ଚ୍ଚା ମଧ୍ୟରେ ଆଇପିଏଲ ଇତିହାସର ଏକ ବଡ଼ ଟ୍ରେଡ୍ ମଧ୍ୟ ଚର୍ଚ୍ଚାରେ ରହିଛି । ଲକ୍ଷ୍ନୌ ସୁପର ଜାଏଣ୍ଟସ୍ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ହୋଇଥିବା ଟ୍ରେଡ୍‌ରେ ୨୭ କୋଟି ଟଙ୍କାରେ ଋଷଭ ପନ୍ତ ପୁଣିଥରେ ତାଙ୍କ ପୁରୁଣା ଦଳ ଦିଲ୍ଲୀକୁ ଫେରିଛନ୍ତି । ଏବେ ହାର୍ଦ୍ଦିକଙ୍କୁ ନେଇ ମଧ୍ୟ ଏଭଳି ବଡ଼ ଟ୍ରେଡ୍ ହେବ କି ନାହିଁ, ତାହା ଉପରେ ନଜର ରହିଛି ।

CSK ନା KKR—ହାର୍ଦ୍ଦିକଙ୍କ ପରବର୍ତ୍ତୀ ଠିକଣା କେଉଁଠି ?

କ୍ରିକବଜ୍‌ର ଏକ ରିପୋର୍ଟ ଅନୁସାରେ, ହାର୍ଦ୍ଦିକଙ୍କ ଟ୍ରେଡ୍‌ ଡିଲ୍‌ ଏବେ ମଧ୍ୟ ପ୍ରାରମ୍ଭିକ ପର୍ଯ୍ୟାୟରେ ରହିଛି । କୋଲକାତା ନାଇଟ୍ ରାଇଡର୍ସ ହାର୍ଦ୍ଦିକଙ୍କୁ ଦଳରେ ସାମିଲ କରିବାକୁ ଆଗ୍ରହୀ ଥିବା ଚର୍ଚ୍ଚା ହେଉଥିଲେ ମଧ୍ୟ, ତାଙ୍କ ପାଇଁ କୌଣସି ବଡ଼ ଖେଳାଳିଙ୍କୁ ଛାଡ଼ିବାକୁ ଫ୍ରାଞ୍ଚାଇଜି ପ୍ରସ୍ତୁତ ନଥିବା କୁହାଯାଉଛି ।

ଅନ୍ୟପଟେ କ୍ୟାମେରନ୍ ଗ୍ରୀନ୍‌ଙ୍କୁ ନେଇ ମଧ୍ୟ କିଛି ସମସ୍ୟା ରହିଛି। ଅଷ୍ଟ୍ରେଲିଆର କ୍ରିକେଟ୍ ସୂଚୀକୁ ନେଇ ତାଙ୍କ ଉପଲବ୍ଧତା ଏକ ପ୍ରସଙ୍ଗ ହୋଇପାରେ। ଏହା ସହିତ ଅଜିଙ୍କ୍ୟ ରାହାଣେଙ୍କ ଅବସର ପରେ KKR ମଧ୍ୟ ନୂଆ ଅଧିନାୟକଙ୍କ ସନ୍ଧାନରେ ରହିଛି । ତେଣୁ ହାର୍ଦ୍ଦିକଙ୍କୁ ନେଇ କୋଲକାତା କେଉଁ ନିଷ୍ପତ୍ତି ନେବ, ତାହା ଦେଖିବା ରୋଚକ ହେବ ।

ହାର୍ଦ୍ଦିକଙ୍କୁ ନେଇ CSKର ମନୋଭାବ କ’ଣ ?

ହାର୍ଦ୍ଦିକଙ୍କୁ ନେଇ ଚେନ୍ନାଇ ସୁପର କିଙ୍ଗ୍ସର ନାଁ ମଧ୍ୟ ଚର୍ଚ୍ଚାରେ ରହିଛି । ତେବେ CSKର CEO କାଶୀ ବିଶ୍ୱନାଥନ୍ ଟ୍ରେଡ୍‌କୁ ନେଇ କୌଣସି ସ୍ପଷ୍ଟ ସୂଚନା ଦେଇନାହାନ୍ତି । ତାଙ୍କ କହିବା ଅନୁସାରେ, ବର୍ତ୍ତମାନ ଦଳର ପୂରା ଧ୍ୟାନ ନୂଆ ହେଡ୍ କୋଚ୍ ଖୋଜିବା ଉପରେ ରହିଛି। କୋଚ୍ ନିଯୁକ୍ତି ପରେ ହିଁ ଟ୍ରେଡ୍‌ ସମ୍ପର୍କରେ ଧ୍ୟାନ ଦିଆଯିବ ।

କେମିତି ରହିଛି ହାର୍ଦ୍ଦିକଙ୍କ IPL କ୍ୟାରିୟର ?

ହାର୍ଦ୍ଦିକ ପାଣ୍ଡ୍ୟା ଏପର୍ଯ୍ୟନ୍ତ IPLରେ ୧୬୨ଟି ମ୍ୟାଚ୍ ଖେଳିଛନ୍ତି। ୧୫୦ଟି ଇନିଂସରେ ବ୍ୟାଟିଂ କରି ସେ ୨୭.୮୭ ହାରାହାରି ଓ ୧୪୬.୨୮ ଷ୍ଟ୍ରାଇକ୍ ରେଟ୍‌ରେ ୨୯୫୫ ରନ୍ କରିଛନ୍ତି। ତାଙ୍କ ନାମରେ ୧୦ଟି ଅର୍ଦ୍ଧଶତକ ମଧ୍ୟ ରହିଛି। ବୋଲିଂରେ ମଧ୍ୟ ହାର୍ଦ୍ଦିକ ପ୍ରଭାବଶାଳୀ ରହିଛନ୍ତି। ୧୬୨ଟି ଇନିଂସରେ ସେ ୮୨ଟି ୱିକେଟ୍ ନେଇଛନ୍ତି ।