ମୁମ୍ବାଇ: ଫେବ୍ରୁଆରୀ ୭ରୁ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ବକପ୍‌ । ବିଶ୍ୱକପ୍ ଆରମ୍ଭ ହେବାକୁ ଆଉ ୨୪ ଘଣ୍ଟାରୁ କମ୍‌ ସମୟ ବାକି ଅଛି । ଏହି ବିଶ୍ୱସ୍ତରୀୟ ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ଟିମ୍ ଇଣ୍ଡିଆକୁ ଏକ ବଡ଼ ଝଟକା ଲାଗିଛି । ଷ୍ଟାର ଫାଷ୍ଟ ବୋଲର ହର୍ଷିତ ରାଣା ଆଘାତ ଯୋଗୁଁ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରୁ ବାଦ ପଡ଼ିଛନ୍ତି ।

୨୦୨୬ ଟି-୨୦ ବିଶ୍ୱକପ୍ ଆସନ୍ତାକାଲି ଅର୍ଥାତ ଫେବୃଆରୀ ୭ ତାରିଖରୁ ଆରମ୍ଭ ହେବ । ଟୁର୍ଣ୍ଣାମେଣ୍ଟର ପ୍ରଥମ ଦିନରେ ମୋଟ ତିନୋଟି ମ୍ୟାଚ୍ ଖେଳାଯିବ। ଟିମ୍ ଇଣ୍ଡିଆ ମଧ୍ୟ ଫେବୃଆରୀ ୭ ତାରିଖ ଶନିବାର ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍ ଖେଳିବ। ଭାରତ ଶନିବାର ଟି୨୦ ବିଶ୍ୱକପରେ ଆମେରିକା ସହିତ ମୁକାବିଲା କରିବ। ତଥାପି, ହର୍ଷିତ ରାଣାଙ୍କ ବଦଳ ଖେଳାଳିଙ୍କ ନାମ ଏପର୍ଯ୍ୟନ୍ତ ଘୋଷଣା କରାଯାଇ ନାହିଁ ।

ଦେଖନ୍ତୁ ଏହି ଖବର: ବିଶ୍ବକପ୍‌ ଫାଇନାଲରେ ସୂର୍ଯ୍ୟବଂଶୀଙ୍କ 'ଛକା' ବର୍ଷା, ଇଂଲଣ୍ଡ ବୋଲରଙ୍କୁ ନିର୍ଦ୍ଧୁମ ଛେଚିଲେ

ସୂଚନା ଅନୁସାରେ, ୪ ଫେବୃଆରୀ, ୨୦୨୬ରେ ଖେଳାଯାଇଥିବା ଏକ ଅଭ୍ୟାସ ମ୍ୟାଚ୍ ସମୟରେ ବୋଲିଂ କରୁଥିବା ସମୟରେ ସେ ତାଙ୍କ ଡାହାଣ ଆଣ୍ଠୁରେ ଆଘାତ ଲାଗିଥିଲା ।

ଆଘାତର ପରଦିନ, ଫେବୃଆରୀ ୫ ତାରିଖରେ ହର୍ଷିତ ରାଣା ଏକ କ୍ଲିନିକାଲ ପରୀକ୍ଷା କରାଇଥିଲେ । ଫେବୃଆରୀ ୬ ତାରିଖରେ, ପ୍ରସିଦ୍ଧ ଅର୍ଥୋପେଡିକ୍ ସର୍ଜନ ଡକ୍ଟର ଦିନଶା ପାରଦିୱାଲାଙ୍କ ସହିତ ପରାମର୍ଶ କରିବା ପରେ ରାଣାଙ୍କୁ ଅସ୍ତ୍ରୋପଚାର କରିବାକୁ ପରାମର୍ଶ ଦିଆଯାଇଥିଲା । ଡାକ୍ତରୀ ଦଳ ବିଶ୍ୱାସ କରନ୍ତି ଯେ ଅସ୍ତ୍ରୋପଚାର ବିନା ସମ୍ପୂର୍ଣ୍ଣ ଆରୋଗ୍ୟ ସମ୍ଭବ ହେବ ନାହିଁ ।

ଏହି ଅସ୍ତ୍ରୋପଚାର ପ୍ରକ୍ରିୟା ଯୋଗୁଁ ରାଣାଙ୍କୁ ଆଗାମୀ ଟି-୨୦ ବିଶ୍ୱକପରୁ ବାଦ ଦିଆଯାଇଛି। ଏହା ଟିମ୍ ଇଣ୍ଡିଆ ପାଇଁ ଏକ ବଡ଼ ଧକ୍କା ବୋଲି ବିବେଚନା କରାଯାଉଛି, କାରଣ ହର୍ଷିତ ସାମ୍ପ୍ରତିକ ମାସଗୁଡ଼ିକରେ ଦ୍ରୁତ ବୋଲିଂ ଆକ୍ରମଣରେ ଏକ ଗୁରୁତ୍ୱପୂର୍ଣ୍ଣ ଭୂମିକା ତୁଲାଉଥିଲେ । ସେ ନିମ୍ନକ୍ରମରେ ମଧ୍ୟ ବିସ୍ଫୋରକ ବ୍ୟାଟିଂ କରିଥାନ୍ତି ।