ପ୍ରତିରକ୍ଷା କ୍ଷେତ୍ରରେ ନୂଆ ଅଧ୍ୟାୟ । ରାଜପଥରେ ଯୁଦ୍ଧ ବିମାନ । ଆସାମର ମୋରାନ୍ ବାଇପାସରେ ବାୟୁସେନାର ଐତିହାସିକ ପ୍ରଦର୍ଶନ ଚୀନ ଓ ପାକିସ୍ତାନର ନିଦ ହଜାଇଛି । ଜରୁରୀକାଳୀନ ଅବତରଣ ଏୟାରଷ୍ଟ୍ରିପ୍‌ର ଉଦ୍‌ଘାଟନ କରିଛନ୍ତି ପ୍ରଧାନମନ୍ତ୍ରୀ ମୋଦି । ଯୁଦ୍ଧ ଓ ପ୍ରାକୃତିକ ବିପର୍ଯ୍ୟୟ ବେଳେ ଏହି ରାଜପଥ ରନୱେ ବିମାନ ଚଳାଚଳ ପାଇଁ ହେବ ବ୍ୟବହାର । କୁମାର ଭାସ୍କର ବର୍ମା ସେତୁ, IIM ସମେତ ପୂର୍ବୋତ୍ତରକୁ ୫ ହଜାର ୪୫୦ କୋଟି ମୂଲ୍ୟର ପ୍ରକଳ୍ପ ଉପହାର ଦେଇଛନ୍ତି ମୋଦି ।

ଶତ୍ରୁ ଶିବିରରେ ଆତଙ୍କ । ଜାତୀୟ ରାଜପଥ ପାଲଟିଲା ରନୱେ । ଆସାମର ଦିବ୍ରୁଗଡ଼ରେ ବାୟୁସେନାର ଐତିହାସିକ ପ୍ରଦର୍ଶନ । ଉତ୍ତର-ପୂର୍ବ ଭାରତର ପ୍ରଥମ ହାଇୱେ ଏୟାରଷ୍ଟ୍ରିପରେ ଚିତ୍ତାକର୍ଷକ ଏୟାର-ଶୋ' । ଆସାମ ଆକାଶରେ ଦମ୍‌ ଦେଖାଇଲେ ସୁଖୋଇ ଓ ରାଫେଲ ଯୁଦ୍ଧ ବିମାନ । ମୋରାନ୍ ବାଇପାସ୍‌ ଜାତୀୟ ରାଜପଥରେ ନବନିର୍ମିତ ଜରୁରୀକାଳୀନ ଏୟାରଷ୍ଟ୍ରିପ୍‌ର ଉଦ୍‌ଘାଟନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । C-130 J ସୁପର ହରକ୍ୟୁଲେସ୍ ବିମାନରେ ହାଇୱେରେ ଓହ୍ଲାଇଛନ୍ତି ମୋଦି ।

ଉଦ୍‌ଘାଟନୀ ଉତ୍ସବ ପରେ ଆୟୋଜିତ ଏୟାର-ଶୋ’ରେ ରାଫେଲ ଯୁଦ୍ଧ ବିମାନ ରନୱେରୁ ଉଡ଼ାଣ ଭରି ନିଜର ପ୍ରସ୍ତୁତି ପ୍ରଦର୍ଶନ କରିଛି । ଯୁଦ୍ଧବିମାନର ଏହି କୌଶଳ ଦେଖି ଚମତ୍କୃତ ହୋଇଛନ୍ତି ଦେଶବାସୀ । ଏହି ଅବସରରେ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମାଙ୍କ ସମେତ ଉପସ୍ଥିତ ଥିଲେ ବାୟୁସେନାର ବରିଷ୍ଠ ଅଧିକାରୀ ।

ଉତ୍ତର-ପୂର୍ବ ଭାରତରେ ପ୍ରତିରକ୍ଷା କ୍ଷେତ୍ରରେ ନୂଆ ଅଧ୍ୟାୟ । ବାୟୁସେନାର ଐତିହାସିକ ପ୍ରଦର୍ଶନ ଚୀନ ଓ ପାକିସ୍ତାନର ନିଦ ହଜାଇଛି । ଦିବ୍ରୁଗଡ଼ର ମୋରାନ୍ ବାଇପାସ୍ ଏବେ ବାୟୁସେନାର ଶକ୍ତି କେନ୍ଦ୍ର ପାଲଟିଛି । ଜାତୀୟ ରାଜପଥ ୩୭ ଉପରେ ଅତ୍ୟାଧୁନିକ ରାଫେଲ ଓ ସୁଖୋଇ-୩୦ର ଦମଦାର ଅବତରଣ ଓ ଉଡ଼ାଣ ବାୟୁସେନାର ଶକ୍ତିକୁ ବହୁଗୁଣିତ କରିଛି । ଯେଉଁଠାରେ ୧୯୬୨ର କ୍ଷତ ସ୍ମୃତିରେ ଲିପିବଦ୍ଧ ହୋଇ ରହିଛି । ଯୁଦ୍ଧ କିମ୍ବା ପ୍ରାକୃତିକ ବିପର୍ଯ୍ୟୟ ସମୟରେ ଏହି ୪.୨ କିଲୋମିଟର ବିଶିଷ୍ଟ ସ୍ୱତନ୍ତ୍ର ରନୱେକୁ ସାମରିକ ଓ ବେସାମରିକ କାର୍ଯ୍ୟରେ ବ୍ୟବହାର କରାଯିବ । ଏହା ବାୟୁସେନାର ଅପରେସନାଲ୍ କ୍ଷମତାକୁ କରିବ ବହୁଗୁଣିତ ।

ଉଦ୍‌ଘାଟନୀ କାର୍ଯ୍ୟକ୍ରମ ପୂର୍ବରୁ ଦିବ୍ରୁଗଡ଼ରେ ବିଶାଳ ରୋଡ୍‌ ଶୋ' କରି ଶକ୍ତି ପ୍ରଦର୍ଶନ କରିଥିଲେ ପିଏମ ମୋଦି । କଂଗ୍ରେସ ଶାସନ ସମୟରେ ଆସାମର ଭାଗ୍ୟ ପଥର ତଳେ ଚାପିହୋଇ ରହିଥିବା କହିବା ସହ ଏବେ ଚା'ରୁ ଚିପ୍ ନିର୍ମାଣ, ଆସାମ ବିକାଶର ପ୍ରମାଣ ଦେଉଥିବା କହିଛନ୍ତି ପ୍ରଧାନମନ୍ତ୍ରୀ ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୌହାଟୀ ଓ ଉତ୍ତର ଗୌହାଟୀକୁ ସଂଯୋଗ କରୁଥିବା କୁମାର ଭାସ୍କର ବର୍ମା ସେତୁର ଉଦଘାଟନ କରି ଆସାମକୁ ବଡ଼ ଉପହାର ଦେଇଛନ୍ତି । ୩ ହଜାର ୩୦ କୋଟି ଟଙ୍କା ବ୍ୟୟରେ ନିର୍ମିତ ହୋଇଛି ୬ ଲେନ୍ ବିଶିଷ୍ଟ ଏକ୍ସଟ୍ରା ଡୋଜ୍ଡ ପ୍ରିଷ୍ଟ୍ରେସ୍ଡ କଂକ୍ରିଟ୍ ସେତୁ । ଏହା ଗୌହାଟୀ-ଉତ୍ତର ଗୌହାଟୀ ମଧ୍ୟରେ ଯାତ୍ରା ସମୟକୁ ୭ ମିନିଟ୍ ହ୍ରାସ କରିବ । IIMର ଉଦଘାଟନ ସହ ପୂର୍ବୋତ୍ତରକୁ ୫ ହଜାର ୪୫୦ କୋଟି ମୂଲ୍ୟର ପ୍ରକଳ୍ପ ଉପହାର ଦେଇଛନ୍ତି ମୋଦି ।
ଏଥିସହ ପଢ଼ନ୍ତୁ: ବିରୋଧୀଙ୍କ ଉପରେ ବର୍ଷିଲେ ମୋଦି, ଅନୁପ୍ରବେଶକାରୀଙ୍କୁ ବଞ୍ଚାଇବା ଲୋକେ ଆମକୁ ଦେଉଛନ୍ତି ଉପଦେଶ