ଆନ୍ତର୍ଜାତୀୟ କ୍ରିକେଟ ପରିଷଦ (ICC) ବାଂଲାଦେଶ କ୍ରିକେଟ ବୋର୍ଡ (BCB)ର ଆବେଦନକୁ ଖାରଜ କରିଛି । ଆଗାମୀ ଟି-୨୦ ବିଶ୍ବକପ୍‌ରେ ବାଂଲାଦେଶ ତା'ର ସମସ୍ତ ମ୍ୟାଚ୍‌ ଭାରତ ବାହାରକୁ ସ୍ଥାନାନ୍ତର କରିବାକୁ ଆଇସିସି ନିକଟରେ ଅନୁରୋଧ କରିଥିଲା । ଆଉ ଏହି ଆବେଦନକୁ ଆଇସିସି ଖାରଜ କରିଛି । ତେବେ ବାଂଲାଦେଶ ପକ୍ଷରୁ କରାଯାଇଥିବା ଆବେଦନକୁ ନେଇ ଭୋଟିଂ କରାଯାଇଥିଲା । ଯେଉଁଥିରେ ବାଂଲାଦେଶ କ୍ରିକେଟ୍‌ ବୋର୍ଡକୁ ପରାଜୟ ବରଣ କରିବାକୁ ପଡ଼ିଥିଲା ।

ଭୋଟ୍ ଦେଉଥିବା ୧୬ଟି ଦେଶ ମଧ୍ୟରୁ ୧୪ଟି ଦେଶ ବାଂଲାଦେଶର ପ୍ରସ୍ତାବ ବିରୁଦ୍ଧରେ ଭୋଟ୍ ଦେଇଥିଲେ । ଯେତେବେଳେ କେବଳ ଦୁଇଟି ଦେଶ, ପାକିସ୍ତାନ ଏବଂ ବାଂଲାଦେଶ ସମର୍ଥନରେ ଭୋଟ୍ ଦେଇଥିଲେ । ICC ଏବେ ସ୍ପଷ୍ଟ ଭାବରେ BCBକୁ ଏହି ନିଷ୍ପତ୍ତି ବିଷୟରେ ତାଙ୍କ ସରକାରଙ୍କୁ ଜଣାଇବାକୁ ନିର୍ଦ୍ଦେଶ ଦେଇଛି । ଏହା ମଧ୍ୟ ଚେତାବନୀ ଦେଇଛି ଯେ ଯଦି ବାଂଲାଦେଶ ନିଜ ମତରେ ଅଟଳ ରହେ ଏବଂ ଭାରତରେ ଖେଳିବାକୁ ମନା କରେ, ତେବେ ତାଙ୍କୁ ଏହି ବଡ଼ ଟୁର୍ଣ୍ଣାମେଣ୍ଟରୁ ବହିଷ୍କାର କରାଯିବ ।

ଜାତୀୟ ଗଣମାଧ୍ୟମର ସୂଚନା ଅନୁସାରେ, ଏପରି ପରିସ୍ଥିତିରେ ବାଂଲାଦେଶ ବଦଳରେ ସ୍କଟଲାଣ୍ଡକୁ ଟୁର୍ଣ୍ଣାମେଣ୍ଟରେ ସାମିଲ କରାଯାଇପାରେ । ICC ଏହି ସମ୍ପୂର୍ଣ୍ଣ ମାମଲାରେ ଏକ ଅତ୍ୟନ୍ତ କଠୋର ମନୋଭାବ ଗ୍ରହଣ କରିଛି ଏବଂ ଖୁବ୍ ଶୀଘ୍ର ଏକ ଚୂଡ଼ାନ୍ତ ନିଷ୍ପତ୍ତି ନିଆଯାଇପାରେ ।

ମୁସ୍ତାଫିଜୁର ରହମାନଙ୍କ IPL ଚୁକ୍ତିନାମା ସମାପ୍ତ ହେବା ପରେ ବିବାଦ ଆରମ୍ଭ ହୋଇଥିଲା । ଯାହା ପରେ BCB ଆନୁଷ୍ଠାନିକ ଭାବରେ ICC କୁ ବାଂଲାଦେଶର ମ୍ୟାଚ୍ ଭାରତ ବାହାରକୁ ସ୍ଥାନାନ୍ତର କରିବାକୁ ଅନୁରୋଧ କରିଥିଲା । ଖେଳାଳିଙ୍କ ସୁରକ୍ଷା ଚିନ୍ତାକୁ ଦର୍ଶାଇ BCB ଭାରତକୁ ଦଳ ପଠାଇବାକୁ ମନା କରିଦେଇଥିଲା । ତଥାପି ICCର ଏହି ମତ ଏବେ BCBର ଅହଂକାରକୁ ପ୍ରକାଶ କରିଛି ।

ବାଂଲାଦେଶ ସରକାରଙ୍କ ଚାପରେ BCB ଆର୍ୟାଲ୍ୟାଣ୍ଡ ସହିତ ଗ୍ରୁପ୍‌ ପରିବର୍ତ୍ତନ କରିବାକୁ ପ୍ରସ୍ତାବ ଦେଇଥିଲା । ବାଂଲାଦେଶ ଗ୍ରୁପ୍ 'C' ରେ ଅଛି, ଯେଉଁଠାରେ ଏହା କୋଲକାତାରେ ତିନୋଟି ଏବଂ ମୁମ୍ବାଇରେ ଗୋଟିଏ ମ୍ୟାଚ୍ ଖେଳିବାର କାର୍ଯ୍ୟକ୍ରମ ଅଛି ।

ସେପଟେ ୨୦୨୬ ଟି୨୦ ବିଶ୍ୱକପ୍ ପାଇଁ ବାଂଲାଦେଶ ଦଳ ଭାରତ ଆସିବ କି ନାହିଁ ସେ ବିଷୟରେ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ବାଂଲାଦେଶ କ୍ରିକେଟ୍ ବୋର୍ଡ ବୁଧବାର ସୁଦ୍ଧା ୨୦୨୬ ଟି୨୦ ବିଶ୍ୱକପ୍ ବିଷୟରେ ଚୂଡ଼ାନ୍ତ ନିଷ୍ପତ୍ତି ଦେବାକୁ ସ୍ଥିର ହୋଇଥିଲା । କିନ୍ତୁ ଆଇସିସି ବିସିବିକୁ ସତର୍କ କରାଇ ଆଉ ଗୋଟିଏ ଦିନ ସମୟ ଦେଇଛି ।

ଆଇସିସି ବିସିବିକୁ ଜଣାଇ ଦେଇଛି ଯେ ଯଦି ବାଂଲାଦେଶ ଦଳ ୨୦୨୬ ଟି୨୦ ବିଶ୍ୱକପ୍ ପାଇଁ ଭାରତ ଯାତ୍ରା ନ କରେ, ତେବେ ତାଙ୍କ ସ୍ଥାନରେ ଅନ୍ୟ ଏକ ଦଳକୁ ବିଶ୍ୱକପରେ ସାମିଲ କରାଯିବ ।