ଫେବ୍ରୁଆରୀ ୭ରୁ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ବକପ୍‌ । କିନ୍ତୁ ଏପର୍ଯ୍ୟନ୍ତ ବିବାଦ ଥମିବାରେ ନାଁ ନେଉନି । ପାକିସ୍ତାନ ୨୦୨୬ ଟି-୨୦ ବିଶ୍ୱକପରେ ଭାରତ ବିପକ୍ଷରେ ନ ଖେଳିବାକୁ ନିଷ୍ପତ୍ତି ନେଇଛି । ଆଉ ଏହି ନିଷ୍ପତ୍ତି ଫଳରେ ପାକିସ୍ତାନ ବଡ଼ ସମସ୍ୟାର ସମ୍ମୁଖୀନ ହୋଇପାରେ । ନ୍ୟୁଜ ଏଜେନ୍ସି ପିଟିଆଇ ରିପୋର୍ଟରେ ଏବେ ପ୍ରକାଶ ପାଇଛି ଯେ ଆଇସିସି ପାକିସ୍ତାନ କ୍ରିକେଟ୍ ବୋର୍ଡ (ପିସିବି)କୁ ଚେତାବନୀ ଦେଇଛି ଯେ ଯଦି ଏହା ଭାରତ ବିପକ୍ଷରେ ଖେଳିବାକୁ ମନା କରେ ତେବେ ଏହା ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇପାରେ ।

ପାକିସ୍ତାନ ଫେବୃଆରୀ ୧୫ ତାରିଖ ରବିବାର ଦିନ ହେବାକୁ ଥିବା ଭାରତ ବିପକ୍ଷ ମ୍ୟାଚ୍ ଖେଳିବାକୁ ମନା କରିଦେଇଛି । ତଥାପି, ପିସିବି ଏପର୍ଯ୍ୟନ୍ତ ଏହି ନିଷ୍ପତ୍ତି ବିଷୟରେ ଆଇସିସିକୁ ଆନୁଷ୍ଠାନିକ ଭାବରେ ଜଣାଇନାହିଁ । ସମ୍ବାଦ ସରବରାହ ସଂସ୍ଥା ପିଟିଆଇ ଅନୁଯାୟୀ, ଯଦି ପାକିସ୍ତାନ ଭାରତ ବିପକ୍ଷରେ ମ୍ୟାଚ୍ ନ ଖେଳେ, ତେବେ ଆଇସିସି ଏହାର ବାର୍ଷିକ ରାଜସ୍ୱ, ଯାହା ପ୍ରାୟ ୩୫ ନିୟୁତ ଆମେରିକୀୟ ଡଲାର ବନ୍ଦ କରିପାରେ ।

ପାକିସ୍ତାନକୁ ଦଣ୍ଡ ଦେବାକୁ ପ୍ରସ୍ତୁତ ହେଉଛି

ପିସିବିର ଏକ ସୂତ୍ର କହିଛି ଯେ ଯଦି ପାକିସ୍ତାନ ଭାରତ ବିପକ୍ଷରେ ମ୍ୟାଚ୍ ଖେଳିବାକୁ ମନା କରେ, ତେବେ ଏହା କେବଳ ଆର୍ଥିକ ଦଣ୍ଡ ନୁହେଁ ବରଂ ୨୦୨୬ ଟି-୨୦ ବିଶ୍ୱକପର ପ୍ରସାରଣକାରୀଙ୍କଠାରୁ ଆଇନଗତ କାର୍ଯ୍ୟାନୁଷ୍ଠାନର ମଧ୍ୟ ସମ୍ମୁଖୀନ ହୋଇପାରେ । ଯଦି ପାକିସ୍ତାନ ICCର ବିବାଦ ସମାଧାନ କମିଟି ପାଖକୁ ଯାଏ, ତେବେ ଏପରି ପ୍ରୟାସ ବିଫଳ ହେବାର ସମ୍ଭାବନା ଅଧିକ ।"

ପାକିସ୍ତାନକୁ କାହିଁକି ଦଣ୍ଡ ଦିଆଯିବ ?

ରିପୋର୍ଟ ଅନୁଯାୟୀ ଅନ୍ୟ ଏକ PCB ସୂତ୍ର କହିଛି ଯେ ପାକିସ୍ତାନ ସରକାର ଯାହା କହୁଛନ୍ତି ତାହା ସତ୍ତ୍ୱେ PCB ଭାରତ ସହିତ ନ ଖେଳିବା ପାଇଁ ଗମ୍ଭୀର ପରିଣାମ ଭୋଗ କରିବ, କାରଣ ଏହାର ମ୍ୟାଚ୍ ତାଙ୍କ ଇଚ୍ଛା ଅନୁଯାୟୀ ଏକ ନିରପେକ୍ଷ ସ୍ଥାନରେ (ଶ୍ରୀଲଙ୍କା) ସ୍ଥିର କରାଯାଇଛି । ତଥାପି, ଏକ ନିରପେକ୍ଷ ଭେନ୍ୟୁ ପ୍ରଦାନ କରାଯିବା ପରେ ମଧ୍ୟ ପାକିସ୍ତାନ ଭାରତ ସହିତ ଖେଳିବାକୁ ମନା କରୁଛି ।

ଯେହେତୁ ଭାରତ ବନାମ ପାକିସ୍ତାନ ମ୍ୟାଚ୍‌ରେ ଅଧିକ ଟଙ୍କା ଥାଏ । ଯାହାଫଳରେ ଏହି ମ୍ୟାଚ୍‌ ଯେକୌଣସି ପ୍ରସାରକ ପାଇଁ ଏକ ଲାଭଜନକ ମ୍ୟାଚ୍ ହେବ । ଆଉ ଏବେ ଯଦି ଭାରତ ବନାମ ପାକିସ୍ତାନ ମ୍ୟାଚ୍ T-୨୦ ବିଶ୍ୱକପରେ ନ ହୁଏ, ତେବେ ପ୍ରସାରକମାନେ ICC ଏବଂ PCB ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଅଧିକାର ପାଇବେ ।