India vs New Zealand / ROKO ଫେଲ୍ ! ଈଶାନ-ଅକ୍ଷର ବଞ୍ଚାଇଲେ ଟିମ୍ ଇଣ୍ଡିଆର ଇଜ୍ଜତ, ୨୦୯ରେ ଅଲଆଉଟ୍

ଭାରତ-ନ୍ୟୁଜିଲାଣ୍ଡ ମଧ୍ୟରେ ରବିବାର ଖେଳାଯାଉଛି ଅନ୍ତିମ ତଥା ପଞ୍ଚମ ଦିନିକିଆ ମ୍ୟାଚ୍‌ । ଏହି ମ୍ୟାଚ୍‌ରେ ଭାରତୀୟ ଦଳର ବ୍ୟାଟିଂ ବିପର୍ଯ୍ୟୟ ଦେଖିବାକୁ ମିଳିଛି । ମାଉଣ୍ଟ ମାଉଙ୍ଗାନୁଇସ୍ଥିତ ବେ ଓଭାଲ ଷ୍ଟାଡିୟମ୍‌ରେ ଭାରତୀୟ ବ୍ୟାଟ୍ସମ୍ୟାନ୍‌ମାନେ ପୁଣି ଥରେ ନିରାଶ କରିଛନ୍ତି । ନ୍ୟୁଜିଲାଣ୍ଡର ଦ୍ରୁତ ବୋଲରମାନଙ୍କ ସ୍ୱିଙ୍ଗ୍‌ ଓ ଘାତକ ବୋଲିଂ ଆଗରେ ଭାରତୀୟ ବ୍ୟାଟ୍ସମ୍ୟାନ୍‌ କୟିଜ୍‌ରେ ଅଧିକ ସମୟ ତିଷ୍ଠି ପାରିନଥିଲେ । ଫଳରେ ପୂରା ଟିମ୍ ମାତ୍ର ୨୦୯ ରନ୍‌ରେ ଅଲଆଉଟ୍‌ ହୋଇଛି ।
ବେ ଓଭାଲ ଗ୍ରାଉଣ୍ଡରେ ଦିନିକିଆ କ୍ରିକେଟ୍‌ ଇତିହାସରେ ଏହା ତୃତୀୟ ସର୍ବନିମ୍ନ ସ୍କୋର । ରୋହିତ ଶର୍ମା ଓ ବିରାଟ କୋହଲିଙ୍କ ଭଳି ଷ୍ଟାର ବ୍ୟାଟ୍ସମ୍ୟାନ୍‌ ଦୁଇ ଅଙ୍କ ଛୁଇଁବାରେ ମଧ୍ୟ ବିଫଳ ହୋଇଛନ୍ତି । ତେବେ ଈଶାନ କିଶାନ ଓ ଅକ୍ଷର ପଟେଲଙ୍କ ଲଢୁଆ ଇନିଂସ ଯୋଗୁଁ ଭାରତ ୨୦୦ ରନ୍‌ ଅତିକ୍ରମ କରିପାରିଛି ।

ରୋହିତ-କୋହଲି ଫ୍ଲପ୍‌, ଅକ୍ଷର-ଈଶାନଙ୍କ ଲଢୁଆ ବ୍ୟାଟିଂ

ଭାରତୀୟ ଦଳର ଟପ୍‌ ଅର୍ଡର ଆରମ୍ଭରୁ ହିଁ ଭୁଶୁଡ଼ି ପଡ଼ିଥିଲା । ରୋହିତ ଶର୍ମା ୧୩ଟି ବଲ୍‌ରୁ ମାତ୍ର ୭ ରନ୍‌ କରି ମାଥ୍ୟୁ ଫିସରଙ୍କ ଶିକାର ହୋଇଥିଲେ। ସେହିପରି ବିରାଟ କୋହଲି ମଧ୍ୟ ୭ଟି ବଲ୍‌ ଖେଳି ମାତ୍ର ୫ ରନ୍‌ କରି ଆଉଟ୍‌ ହୋଇଥିଲେ। ମାଥ୍ୟୁ ଫିସର ନିଜ ଚମତ୍କାର ବୋଲିଂରେ ଉଭୟ ଷ୍ଟାର ବ୍ୟାଟରଙ୍କୁ ପାଭିଲିୟନ୍‌ ପଠାଇଥିଲେ ।

ମାତ୍ର ୩୪ ରନ୍‌ ମଧ୍ୟରେ ଭାରତ ତିନୋଟି ୱିକେଟ୍‌ ହରାଇ ସଙ୍କଟରେ ପଡ଼ିଥିଲା । ଏହି ସମୟରେ ଅକ୍ଷର ପଟେଲ ଓ ଈଶାନ କିଶାନ ଦାୟିତ୍ୱପୂର୍ଣ୍ଣ ବ୍ୟାଟିଂ କରି ଦଳକୁ ସମ୍ଭାଳିଥିଲେ । ଉଭୟ ବ୍ୟାଟ୍ସମ୍ୟାନ୍‌ ୪୬ ରନ୍‌ ଲେଖାଏଁ ସଂଗ୍ରହ କରିଥିଲେ । ୧୨୧ ରନ୍‌ ବେଳକୁ ଭାରତ ୫ଟି ୱିକେଟ୍‌ ହରାଇ ସାରିଥିଲା । ଏକ ସମୟରେ ଭାରତ ୧୬୦-୧୭୦ ରନ୍‌ ମଧ୍ୟ କରିପାରିବ ନାହିଁ ବୋଲି ଲାଗୁଥିଲା । କିନ୍ତୁ ଈଶାନ ଓ ଅକ୍ଷରଙ୍କ ଲଢୁଆ ପ୍ରଦର୍ଶନ ଦଳକୁ ସମ୍ମାନଜନକ ସ୍କୋର ଦେଇଥିଲା ।

ଅର୍ଶଦୀପ-ସିରାଜଙ୍କ ଯୋଗୁଁ ୨୦୦ ପାର୍‌ କଲା ଭାରତ

ଭାରତ ୧୮୩ ରନ୍‌ରେ ନବମ ୱିକେଟ୍‌ ହରାଇଥିଲା । ତେବେ ଶେଷ ଭାଗରେ ଅର୍ଶଦୀପ ସିଂହ ଆକ୍ରମଣାତ୍ମକ ବ୍ୟାଟିଂ କରି ଦୁଇଟି ଜବରଦସ୍ତ ଛକା ମାରିଥିଲେ । ସେ ମାତ୍ର ୪ଟି ବଲ୍‌ରୁ ୧୪ ରନ୍‌ ସଂଗ୍ରହ କରିଥିଲେ । ଅନ୍ୟପଟେ ମହମ୍ମଦ ସିରାଜ ଦୀର୍ଘ ସମୟ ଧରି ଧୈର୍ଯ୍ୟର ସହ ବ୍ୟାଟିଂ କରିଥିଲେ । ଶେଷ ଆଡ଼କୁ ମିଚେଲ ସାଣ୍ଟନରଙ୍କ ବିପକ୍ଷରେ ରନ୍‌ ସଂଗ୍ରହ କରିବାକୁ ଉଦ୍ୟମ କରିଥିଲେ ।

ଡଫି ଓ ସାଣ୍ଟନରଙ୍କୁ ୩-୩ ୱିକେଟ୍‌

ନ୍ୟୁଜିଲାଣ୍ଡ ପକ୍ଷରୁ ଜାକବ ଡଫି ଓ ମିଚେଲ ସାଣ୍ଟନର ସବୁଠାରୁ ସଫଳ ବୋଲର ରହିଥିଲେ । ଉଭୟ ୩ଟି ଲେଖାଏଁ ୱିକେଟ୍‌ ନେଇ ଭାରତୀୟ ବ୍ୟାଟିଂ ଲାଇନ୍‌ଅପ୍‌କୁ ଧ୍ୱଂସ କରିଥିଲେ । ତେବେ ଭାରତକୁ ପ୍ରାରମ୍ଭିକ ଝଟ୍‌କା ଦେଇଥିଲେ ମାଥ୍ୟୁ ଫିସର । ସେ ନିଜର ପ୍ରଥମ ସ୍ପେଲ୍‌ରେ ହିଁ ରୋହିତ ଶର୍ମା ଓ ବିରାଟ କୋହଲିଙ୍କୁ ଆଉଟ୍‌ କରି ନ୍ୟୁଜିଲାଣ୍ଡକୁ ବଡ଼ ସଫଳତା ଦେଇଥିଲେ ।

ଏବେ ସିରିଜ୍‌ ଜିତିବା ପାଇଁ ଭାରତକୁ ଏହି ମ୍ୟାଚ୍‌ ଜିତିବା ଜରୁରୀ। ଅନ୍ୟପକ୍ଷରେ ନ୍ୟୁଜିଲାଣ୍ଡ ଏହି ମ୍ୟାଚ୍‌ ଜିତିଲେ ସିରିଜ୍‌ ୨-୨ରେ ଡ୍ର’ ରହିବ। ତେଣୁ ଭାରତୀୟ ବୋଲରଙ୍କ ଉପରେ ଏବେ ସମସ୍ତଙ୍କ ନଜର ରହିଛି ।