India Asian Games Contingent / ପଦକ ପାଇଁ ଭାରତର ମହାପ୍ରସ୍ତୁତି, ଏସିଆନ୍ ଗେମ୍ସରେ ଲଢ଼ିବେ ୫୦୩ ଖେଳାଳି

ଜାପାନରେ ହେବାକୁ ଥିବା ଏସିଆନ୍ ଗେମ୍ସ ୨୦୨୬ ପାଇଁ ପୂରା ପ୍ରସ୍ତୁତ ଭାରତ । ଆସନ୍ତା ୧୯ ସେପ୍ଟେମ୍ବରରୁ ୪ ଅକ୍ଟୋବର ପର୍ଯ୍ୟନ୍ତ ଜାପାନରେ ଆୟୋଜିତ ହେବ ଏହି ବୃହତ୍ କ୍ରୀଡ଼ା ମହାକୁମ୍ଭ । ଏଥିପାଇଁ କ୍ରୀଡ଼ା ମନ୍ତ୍ରଣାଳୟ ୭୫୮ ସଦସ୍ୟ ବିଶିଷ୍ଟ ଭାରତୀୟ ଦଳକୁ ମଞ୍ଜୁରୀ ଦେଇଛି । ଏହି ଦଳରେ ୫୦୩ ଜଣ ଖେଳାଳି ଏବଂ ୨୪୬ ଜଣ ସପୋର୍ଟ ଷ୍ଟାଫ୍ ରହିଛନ୍ତି ।

ଚଳିତ ଏସିଆନ୍ସ ଗେମ୍ସରେ ୪୨ଟି ଖେଳ ମଧ୍ୟରୁ ୩୫ଟି ଖେଳରେ ଭାରତ ଅଂଶଗ୍ରହଣ କରିବ । ଭାରତ ଗତ ଏସିଆନ୍‌ ଗେମ୍ସରେ ଐତିହାସିକ ପ୍ରଦର୍ଶନ କରି ପ୍ରଥମ ଥର ପାଇଁ ୧୦୦ ପଦକର ମାଇଲଷ୍ଟୋନ୍ ପାର୍ କରିଥିଲା । ହାଙ୍ଗଝୋଉରେ ଭାରତୀୟ ଖେଳାଳିମାନେ ମୋଟ ୧୦୭ଟି ପଦକ ଜିତିଥିଲେ । ଏବେ ଜାପାନରେ ଏହି ପ୍ରଦର୍ଶନକୁ ଆହୁରି ଭଲ କରିବା ଲକ୍ଷ୍ୟରେ ରହିଛି ଭାରତ ।

ଭାରତୀୟ ଦଳରେ ୨୬୯ ଜଣ ପୁରୁଷ ଏବଂ ୨୩୪ ଜଣ ମହିଳା ଖେଳାଳି ରହିଛନ୍ତି । ପ୍ରାରମ୍ଭିକ ଭାବେ ୪୯୨ ଜଣ ଖେଳାଳିଙ୍କୁ ମଞ୍ଜୁରୀ ମିଳିଥିଲା। ପରେ ଆଉ ୧୧ ଜଣ ଖେଳାଳିଙ୍କୁ ଦଳରେ ସାମିଲ କରାଯାଇଛି । ଏଥିରେ ଆଥଲେଟିକ୍ସର ୬ ଜଣ, ସର୍ଫିଂର ୪ ଜଣ ଏବଂ ମିକ୍ସଡ୍ ମାର୍ସିଆଲ୍ ଆର୍ଟ୍ସ ବା MMAର ଜଣେ ଖେଳାଳି ରହିଛନ୍ତି ।

ଆଥଲେଟିକ୍ସରେ ପ୍ରବୀଣ କୁମାର, ହରିତା ଭଦ୍ରା, କିରଣ ପହଲ, ଆଶା ଇଲାଙ୍ଗୋ, ସିନ୍ଧୁଶ୍ରୀ ଗଣେଶା ଏବଂ ସାନ୍ୟା ଯାଦବଙ୍କୁ ଭାରତୀୟ ଦଳରେ ସ୍ଥାନ ମିଳିଛି । ସେହିପରି MMAରେ ବରୁଣ ସନ୍ୟାଲ ଏବଂ ସର୍ଫିଂରେ କିଶୋର କୁମାର, ଶିବରାଜ ବାବୁ, କମାଲି ପ୍ରକାଶ ଓ ଶୁଗର ଶାନ୍ତି ଗାୟେନ ଭାରତ ପାଇଁ ମଇଦାନକୁ ଓହ୍ଲାଇବେ ।

କ୍ରିକେଟ୍ ଦଳରେ ୫୦ ସଦସ୍ୟ

ଏସିଆନ୍ ଗେମ୍ସର କ୍ରିକେଟ୍ ଇଭେଣ୍ଟରେ ଭାରତ ଉଭୟ ପୁରୁଷ ଓ ମହିଳା ଦଳ ପଠାଇବ । କ୍ରିକେଟ୍ ପାଇଁ ମୋଟ ୫୦ ସଦସ୍ୟଙ୍କ ଦଳ ରହିବ, ଯେଉଁଥିରେ ୨୦ ଜଣ ସପୋର୍ଟ ଷ୍ଟାଫ୍ ଅଛନ୍ତି । ପୁରୁଷ ଦଳର ହେଡ୍ କୋଚ୍ ଭାବେ ଭିଭିଏସ୍ ଲକ୍ଷ୍ମଣ ଦାୟିତ୍ୱ ନେବେ । ସେହିପରି ମହିଳା ଦଳର କୋଚିଂ ଦାୟିତ୍ୱ ଅମୋଲ ମଜୁମଦାରଙ୍କ ଉପରେ ରହିବ । ଉଭୟ ଭାରତୀୟ ଦଳ ପଦକର ଦୃଢ଼ ଦାବିଦାର ଭାବେ ଟୁର୍ଣ୍ଣାମେଣ୍ଟକୁ ଓହ୍ଲାଇବେ ।

ହକିରେ ୫୪ ସଦସ୍ୟଙ୍କ ଦଳ

ହକିରେ ମଧ୍ୟ ଭାରତର ନଜର ପଦକ ଉପରେ ରହିବ । ପୁରୁଷ ଓ ମହିଳା ହକିକୁ ମିଶାଇ ଭାରତ ମୋଟ ୫୪ ସଦସ୍ୟଙ୍କ ଦଳ ପଠାଇବ । ଏଥିରେ ୪୦ ଜଣ ଖେଳାଳି ଏବଂ ୧୪ ଜଣ ସପୋର୍ଟ ଷ୍ଟାଫ୍ ରହିଛନ୍ତି । ଏସିଆନ୍ ଗେମ୍ସରେ ହକି ଭାରତର ପଦକ ଆଶାର ଏକ ବଡ଼ ମାଧ୍ୟମ ହେବ ।

ଭାରତକୁ ବଡ଼ ଝଟକା, ଖେଳିବେନି ନୀରଜ ଚୋପ୍ରା

ତେବେ ଭାରତୀୟ ଦଳର ସବୁଠାରୁ ବଡ଼ ନାମ ନୀରଜ ଚୋପ୍ରାଙ୍କ ଅନୁପସ୍ଥିତି ଏଥର ନିଶ୍ଚିତ ଭାବେ ଚର୍ଚ୍ଚାରେ ରହିବ । ଷ୍ଟାର ଜାଭେଲିନ୍ ଥ୍ରୋୟର ନୀରଜ ଗୋଡର ଲିଗାମେଣ୍ଟ ଆଘାତ କାରଣରୁ ଏସିଆନ୍ ଗେମ୍ସରୁ ବାଦ୍ ପଡ଼ିଛନ୍ତି ।

ନୀରଜ ୨୦୧୮ ଜାକର୍ତ୍ତା ଏବଂ ୨୦୨୩ ହାଙ୍ଗଝୋଉ ଏସିଆନ୍ ଗେମ୍ସରେ ଜାଭେଲିନ୍ ଥ୍ରୋରେ ସ୍ୱର୍ଣ୍ଣ ପଦକ ଜିତିଥିଲେ । ତେଣୁ ତାଙ୍କ ଅନୁପସ୍ଥିତି ଭାରତର ଆଥଲେଟିକ୍ସ ଅଭିଯାନ ପାଇଁ ଏକ ବଡ଼ ଝଟକା ବୋଲି କୁହାଯାଉଛି ।

ଏବେ ନଜର ରହିଛି ଜାପାନରେ ହେବାକୁ ଥିବା ଏସିଆନ୍ ଗେମ୍ସ ୨୦୨୬ ଉପରେ । ହାଙ୍ଗଝୋଉର ୧୦୭ ପଦକର ରେକର୍ଡକୁ ଟପି ଭାରତ ଏଥର ନୂଆ ଇତିହାସ ରଚିପାରିବ କି ନାହିଁ, ତାହା ଉପରେ ସମସ୍ତଙ୍କ ନଜର ।