Argus News - ପୁଣି ଏକ ରବିବାର, ପୁଣି ଥରେ ପାକିସ୍ତାନକୁ ହରାଇଲା ଭାରତ

ପୁଣି ଏକ ରବିବାର । ଆଉ ପୁଣି ଥରେ ପାକିସ୍ତାନକୁ ଧୂଳିଚଟାଇଲା ଭାରତ । ଲଗାତାର ଚାରୋଟି ରବିବାରରେ ଚାରି ଥର ପାକିସ୍ତାନକୁ ହରାଇଛି ଭାରତ। ପ୍ରଥମ ତିନୋଟି ରବିବାରରେ ଭାରତର ପୁରୁଷ ଦଳ ପାକିସ୍ତାନକୁ ଧୂଳି ଚଟାଉଥିଲେ, ଆଉ ଏବେ ଏହି କାରନାମା କରି ଦେଖାଇଛି ମହିଳା ଦଳ । ଦିନିକିଆ ମହିଳା ବିଶ୍ବକପରେ ଭାରତର ବଡ଼ ବିଜୟ । ୮୮ ରନରେ ପାକିସ୍ତାନକୁ ହରାଇଛି ଟିମ୍ ଇଣ୍ଡିଆ । ଏହି ବିଜୟ ସହ ଦିନିକିଆ ମହିଳା ବିଶ୍ବକପରେ ଭାରତ ଲଗାତର ଦୁଇଟି ମ୍ୟାଚ ନିଜ ନାମରେ କରିଛି 

📸 📸

Smiles and celebrations all around! 😊

A massive win in Colombo and #TeamIndia have sealed victory no. 2⃣ in #CWC25 🔝👏

Scorecard ▶ https://t.co/9BNvQl3J59#WomenInBlue pic.twitter.com/LlIeJiGrgX

— BCCI Women (@BCCIWomen) October 5, 2025

ସୂଚନା ଅନୁସାରେ ଆଜି ମହିଳା ବିଶ୍ବକପରେ ଖେଳାଯାଇଥିଲା ବଡ଼ ମ୍ୟାଚ୍ । ମୁହାଁମୁହିଁ ହୋଇଥିଲେ ଦୁଇ ପାରମ୍ପାରିକ ପ୍ରତିଦ୍ବନ୍ଦୀ ଭାରତ-ପାକିସ୍ତାନ । ଏହି ହାଇଭୋଲଟେଜ୍ ମ୍ୟାଚ୍ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ପାକିସ୍ତାନ । ପ୍ରଥମେ ବ୍ୟାଟିଂ କରି ଭାରତ ନିର୍ଦ୍ଧାରିତ ୫୦ ଓଭରରେ ୨୪୭ ରନ୍ କରିଥିଲା । ଭାରତ ପକ୍ଷରୁ ହରଲିନ୍ ଦେଓଲ ସର୍ବାଧିକ ୪୬ ରନ୍ କରିଥିବା ବେଳେ ରିଚା ଘୋଷ ୩୫ ରନ୍ କରିଥିଲେ । ସେହିପରି ପାକିସ୍ତାନ ପକ୍ଷରୁ ଡାଏନା ବେଗ୍ ୪ଟି ଓ୍ବିକେଟ ଅକ୍ତିଆର କରିଥିଲେ ।

୨୪୮ ରନର ଟାର୍ଗେଟ୍ ନେଇ ପଡ଼ିଆ ଓହ୍ଲାଇଥିବା ପାକିସ୍ତାନ ଆରମ୍ଭରୁ ହିଁ ବ୍ୟାକଫୁଟକୁ ଚାଲିଯାଇଥିଲା । ଭାରତୀୟ ବୋଲରଙ୍କ ଆକ୍ରମଣାତ୍ମକ ବୋଲିଂ ଆଗରେ ଅଧିକ ସମୟ ତିଷ୍ଠି ପାରିନଥିଲେ କୌଣସି ପାକିସ୍ତାନୀ ବ୍ୟାଟ୍ସମ୍ୟାନ୍ । ଜଣକ ପରେ ଜଣେ ବ୍ୟାଟ୍ସମ୍ୟାନ୍ ପ୍ୟାଭିଲିୟନ ଫେରିଥିଲେ । ଯାହାଫଳରେ ମାତ୍ର ୪୩ ଓଭରରେ ପାକିସ୍ତାନ ୧୫୯ ରନ୍ କରି ଅଲଆଉଟ୍ ହୋଇଯାଇଥିଲା । ଭାରତ ପକ୍ଷରୁ ଦିପ୍ତି ଶର୍ମା ଓ କ୍ରାନ୍ତି ଗୌଡ ୩ଟ ଲେଖାଏଁ ଓ୍ବିକେଟ ନେଇଥିଲେ । ସେହିପରି ପାକିସ୍ତାନ ପକ୍ଷରୁ ସିଦାର ଅମିନ୍ ସର୍ବାଧିକ ୮୧ ରନ୍ କରିଥିଲେ ।

ସେପଟେ ପ୍ରଥମେ ଏସିଆ କପ୍-୨୦୨୫ । ଆଉ ଏବେ ଦିନିକିଆ ବିଶ୍ବକପରେ ନୋ ହ୍ୟାଣ୍ଡସେକ୍ ବିବାଦ ଜାରି ରହିଛି । ଭାରତ-ପାକିସ୍ତାନ ମ୍ୟାଚ୍ ସମୟରେ ମଧ୍ୟ ନୋ ହ୍ୟାଣ୍ଡସେକ୍ ବିବାଦ ଦେଖିବାକୁ ମିଳିଛି । ମ୍ୟାଚ୍ ଆରମ୍ଭ ପୂର୍ବରୁ ହୋଇଥିବା ଟସ୍ ସମୟରେ ଭାରତୀୟ ଅଧିନାୟକ ହରମନପ୍ରୀତ କୌର, ପାକିସ୍ତାନୀ ଅଧିନାୟକ ଫାତିମା ସାନାଙ୍କ ହାତ ମିଳାଇ ନାହାନ୍ତି । ଟସ୍ ଉପସ୍ଥାପକଙ୍କ ସହ କଥା ହେବା ପରେ ପାକିସ୍ତାନୀ ଅଧିନାୟକ ସିଧାସଳଖ ଡଗ୍ଆଉଟ୍ ଆଡ଼କୁ ଗଲେ। ଭାରତୀୟ ଅଧିନାୟକ ହରମନପ୍ରୀତ କୌର ମଧ୍ୟ ଫାତିମା ସାନାଙ୍କ ସହ ହାତ ମିଳାଇବାକୁ କୌଣସି ଆଗ୍ରହ ଦେଖାଇ ନଥିଲେ ।