India Wales Hockey World Cup / ସ୍ୱାଧୀନତା ଦିବସରେ ଟିମ୍ ଇଣ୍ଡିଆର ଧମାକା ! ୱେଲ୍ସକୁ ୩-୧ରେ ହରାଇଲା ଭାରତ

ବିଜୟରୁ ବିଶ୍ବକପ୍‌ ଅଭିଯାନ ଆରମ୍ଭ କଲା ଭାରତ । ଭାରତର ୮୦ତମ ସ୍ୱାଧୀନତା ଦିବସରେ ଦେଶକୁ ମିଳିଲା ଖେଳ ମଇଦାନରୁ ବଡ଼ ଉପହାର । ପୁରୁଷ ହକି ବିଶ୍ବକପ୍‌ ବିଶ୍ୱକପ୍‌ର ପ୍ରଥମ ମ୍ୟାଚ୍‌ରେ ୱେଲ୍ସକୁ ୩-୧ ଗୋଲ୍‌ରେ ହରାଇ ଅଭିଯାନ ଆରମ୍ଭ କରିଛି ଭାରତୀୟ ହକି ଟିମ୍‌ ।

ଆଜିଠାରୁ ଆରମ୍ଭ ହୋଇଛି ପୁରୁଷ ହକି ବିଶ୍ବକପ୍‌ । ଭାରତ ଓ୍ବେଲ୍ସ ବିପକ୍ଷରେ ତା'ର ପ୍ରଥମ ମ୍ୟାଚ୍‌ ଖେଳିଥିଲା । ଏହି ମ୍ୟାଚ୍‌ରେ ବିଜୟ ସହ ନିଜର ଅଭିଯାନ ଆରମ୍ଭ କରିଛି ଟିମ୍ ଇଣ୍ଡିଆ । ପ୍ରଥମ ମ୍ୟାଚ୍‌ରେ ଭାରତ ୱେଲ୍ସକୁ ୩-୧ ଗୋଲ୍‌ରେ ପରାସ୍ତ କରି ବିଜୟୀ ହୋଇଛି । ଏବେ ଆସନ୍ତା ୧୭ ଅଗଷ୍ଟରେ ଭାରତ ଶକ୍ତିଶାଳୀ ପ୍ରତିଦ୍ୱନ୍ଦ୍ୱୀ ଇଂଲଣ୍ଡକୁ ଭେଟିବ ।

ମ୍ୟାଚ୍‌ର ଆରମ୍ଭ ଭାରତ ପାଇଁ ସହଜ ନଥିଲା । ୱେଲ୍ସ ଆରମ୍ଭରୁ ଆକ୍ରମଣାତ୍ମକ ଖେଳ ଦେଖାଇ ଭାରତୀୟ ଗୋଲ୍‌ପୋଷ୍ଟ ଉପରେ ଚାପ ସୃଷ୍ଟି କରିଥିଲା । କିନ୍ତୁ ଭାରତୀୟ ଗୋଲକିପର ସୂରଜ ଚମତ୍କାର ପ୍ରଦର୍ଶନ କରି ୱେଲ୍ସର ଆକ୍ରମଣକୁ ରୋକି ଦେଇଥିଲେ। ତାଙ୍କର ଦମଦାର ସେଭ୍‌ ଭାରତକୁ ଆରମ୍ଭର ଚାପରୁ ବାହାରିବାରେ ସାହାଯ୍ୟ କରିଥିଲା ।

India beat Wales 3-1 in their opening Pool D game of the FIH World Cup 2026 in Amstelveen

Swipe through the match-day moments from India’s winning start. 📸🔥#HockeyIndia #IndiaKaGame #HWC2026 #INDvsWAL pic.twitter.com/AwBdOHHogL

— Hockey India (@TheHockeyIndia) August 15, 2026

ଧୀରେ ଧୀରେ ଭାରତ ମ୍ୟାଚ୍‌ରେ ନିଜର ଲୟ ଫେରିପାଇଥିଲା । ଏହାପରେ ଆଉ ପଛକୁ ଫେରିନଥିଲା ଦଳ । ପ୍ରଥମେ ସଞ୍ଜୟ ପେନାଲ୍ଟି କର୍ଣ୍ଣରକୁ ଚମତ୍କାର ଡ୍ରାଗ୍‌-ଫ୍ଲିକ୍‌ରେ ପରିଣତ କରି ଭାରତ ପାଇଁ ପ୍ରଥମ ଗୋଲ୍‌ ସ୍କୋର କରିଥିଲେ ।

ଏହାପରେ କ୍ୟାପଟେନ୍‌ ହରମନପ୍ରୀତ ସିଂହ ଓ ସଞ୍ଜୟଙ୍କ ଚମତ୍କାର ସମନ୍ୱୟ ଦେଖିବାକୁ ମିଳିଥିଲା। ପେନାଲ୍ଟି କର୍ଣ୍ଣରର ସୁଯୋଗକୁ ହରମନପ୍ରୀତ ନିଜର ଦମଦାର ଡ୍ରାଗ୍‌-ଫ୍ଲିକ୍‌ ଜରିଆରେ ଗୋଲ୍‌ରେ ପରିଣତ କରିଥିଲେ। ଫଳରେ ଭାରତ ୨-୦ରେ ଆଗୁଆ ହୋଇଥିଲା ।

ଦ୍ୱିତୀୟ କ୍ୱାର୍ଟରରେ ୱେଲ୍ସ ମ୍ୟାଚ୍‌କୁ ଫେରିବା ପାଇଁ ଜୋରଦାର ପ୍ରୟାସ କରିଥିଲା। ପ୍ରିଚାର୍ଡ ଭାରତୀୟ ଗୋଲକିପରଙ୍କୁ ଚକମା ଦେଇ ଏକ ଜୋରଦାର ଶଟ୍‌ ମାରିଥିଲେ । କିନ୍ତୁ ଗୋଲ୍‌ କରିବାରେ ବିଫଳ ହୋଇଥିଲା । ତେବେ ମ୍ୟାଚର ୪୩ ମିନିଟ୍‌ର କ୍ୟାପଟେନ୍‌ ହରମନପ୍ରୀତ ସିଂହ ଆଉ ଏକ ସୁଯୋଗକୁ ହାତଛଡ଼ା କରିନଥିଲେ । ଚମତ୍କାର ଫ୍ଲିକ୍‌ ଜରିଆରେ ସେ ଭାରତ ପାଇଁ ତୃତୀୟ ଗୋଲ୍‌ ଦେଇଥିଲେ । ମ୍ୟାଚ୍‌ ଶେଷ ପର୍ଯ୍ୟନ୍ତ ଭାରତୀୟ ଦଳ ନିଜର ଲିଡ୍‌ ବଜାୟ ରଖି ଶେଷରେ ୩-୧ ଗୋଲ୍‌ରେ ୱେଲ୍ସକୁ ପରାସ୍ତ କରି ବିଶ୍ୱକପ୍‌ ଅଭିଯାନର ଜବରଦସ୍ତ ଆରମ୍ଭ କରିଛି । ଏବେ ଭାରତର ନଜର ୧୭ ଅଗଷ୍ଟରେ ଇଂଲଣ୍ଡ ବିପକ୍ଷ ମୁକାବିଲା ଉପରେ ରହିଛି ।