ଜିମ୍ବାଓ୍ବେ ବିପକ୍ଷରେ ଟିମ୍ ଇଣ୍ଡିଆର ବଡ଼ ବିଜୟ । ଟି-୨୦ ବିଶ୍ବକପର ଗୁରୁତ୍ବପୂର୍ଣ୍ଣ ମ୍ୟାଚରେ ଜିମ୍ବାଓ୍ବେକୁ ୭୨ ରନରେ ପରାସ୍ତ କଲା ଭାରତ । ପ୍ରଥମେ ବ୍ୟାଟିଂ କରି ଜିମ୍ବାଓ୍ବେ ସାମ୍ନାରେ ୨୫୭ ରନର ଟାର୍ଗେଟ ରଖିଥିଲା । ଆଉ ଜିମ୍ବାଓ୍ବେ ଏହି ଟାର୍ଗେଟକୁ ପିଛା କରି ନିର୍ଦ୍ଧାରିତ ୨୦ ଓଭରରେ ୬ ଓ୍ବିକେଟ୍ ହରାଇ ମାତ୍ର ୧୮୬ ରନ୍ କରିପାରିଥିଲା । ଯାହାଫଳରେ ଭାରତ ଏହି ମ୍ୟାଚକୁ ୭୨ ରନରେ ନିଜ ନାମରେ କରିଛି । ଏହି ବିଜୟ ସହ ଟିମ୍ ଇଣ୍ଡିଆ ସେମିଫାଇନାଲରେ ନିଜ ସ୍ଥାନ ପକ୍କା କରିବାକୁ ଆଉ ପାଦେ ଆଗେଇଛି । ସୁପର-୮ର ଶେଷ ମ୍ୟାଚ୍ରେ ଓ୍ବେଷ୍ଟଇଣ୍ଡିଜକୁ ପରାସ୍ତ କରି ଭାରତ ସେମିଫାଇନାଲରେ ନିଜ ସ୍ଥାନ ପକ୍କା କରିବାକୁ ଚେଷ୍ଟା କରିବ ।

ଚେନ୍ନାଇରେ ଖେଳାଯାଇଥିବା ମ୍ୟାଚ୍ରେ ଆରମ୍ଭରୁ ଆକ୍ରମଣାତ୍ମକ ଢଙ୍ଗରେ ଖେଳିଥିଲା ଭାରତ । ଦୁଇ ଓପନର ସଞ୍ଜୁ ସାମସନ୍ ଓ ଅଭିଷେକ ଶର୍ମା ଧୁଆଁଧାର ବ୍ୟାଟିଂ କରିଥିଲେ । ତେବେ ସଞ୍ଜୁ ୨୪ ରନ୍ କରି ଆଉଟ୍ ହେବା ପରେ ଇଶାନ କିଶାନ କ୍ରିଜ୍କୁ ଆସିଥିଲେ । ଉଭୟ ଦ୍ବିତୀୟ ଓ୍ବିକେଟ୍ ପାଇଁ ୭୨ ରନ୍ର ପାର୍ଟନରସିପ୍ କରିଥିଲେ । ତେବେ ଇଶାନ ୩୮ ରନ୍ କରି ପ୍ୟାଭିଲିୟନ୍ ଫେରିବା ପରେ ସୂର୍ଯ୍ୟକୁମାର ଯାଦବ ଆସିଥିଲେ । ଆଉ ସେ ଅଭିଷେକଙ୍କ ସହ ମିଶି ଦ୍ରୁତ ଗତିରେ ୩୩ ରନ୍ କରିଥିଲେ । ସେହିପରି ଅଭିଷେକ ଶର୍ମା ଚଳିତ ଟି-୨୦ ବିଶ୍ବକପ୍ରେ ପ୍ରଥମ ଥର ପାଇଁ ଅର୍ଦ୍ଧଶତକ ହାସଲ କରିଥିଲେ । ସୂର୍ଯ୍ୟକୁମାର ଓ ଅଭିଷେକ ଆଉଟ୍ ହେବା ପରେ ପାଳି ସମ୍ଭାଳିଥିଲେ ହାର୍ଦ୍ଦିକ ପାଣ୍ଡ୍ୟ ଓ ତିଲକ ବର୍ମା । ଉଭୟ ଆକ୍ରମଣାତ୍ମକ ବ୍ୟାଟିଂ କରି ଦଳର ସ୍କୋରକୁ ୨୫୬ ରନର ପହଞ୍ଚାଇଥିଲେ । ହାର୍ଦ୍ଦିକ ପାଣ୍ଡ୍ୟା ୨୩ ବଲରେ ୫୦ ରନ କରିଥିବା ବେଳେ ତିଲକ ବର୍ମା ୧୬ ବଲରେ ୪୪ ରନ୍ କରିଥିଲେ ।

୨୫୭ ରନର ଟାର୍ଗେଟ୍ ନେଇ ପଡ଼ିଆକୁ ଓହ୍ଲାଇଥିବା ଜିମ୍ବାଓ୍ବେ ନିର୍ଦ୍ଧାରିତ ୨୦ ଓଭରରେ ୬ ଓ୍ବିକେଟ୍ ହରାଇ ୧୮୪ ରନ୍ କରିଥିଲା । ଜିମ୍ବାଓ୍ବେ ପକ୍ଷରୁ ବ୍ରିଆନ୍ ବେନେଟ୍ ସର୍ବାଧିକ ୯୭ ରନ୍ କରିଥିବା ବେଳେ ଭାରତ ପକ୍ଷରୁ ଅର୍ଶଦୀପ ସିଂ ସର୍ବାଧିକ ୩ଟି ଓ୍ବିକେଟ୍ ଅକ୍ତିଆର କରିଥିଲେ ।

ଏଥିସହ ପଢ଼ନ୍ତୁ: ଜିମ୍ବାୱେ ବିପକ୍ଷର ଭାରତର ବଡ଼ ସ୍କୋର୍, ଅନେକ ଦିନ ପରେ ପରୀକ୍ଷାରେ ପାସ୍ ହେଲେ ସଞ୍ଜୁ