ଭାରତ-ଦକ୍ଷିଣ ଆଫ୍ରିକା ଦ୍ବିତୀୟ ଟେଷ୍ଟରେ ଟିମ୍ ଇଣ୍ଡିଆର ଲଜ୍ଜାଜନକ ପରାଜୟ । ୫୪୯ ରନ୍‌ର ଲକ୍ଷ୍ୟ ପିଛା କରୁଥିବା ଭାରତ ମାତ୍ର ୧୪୦ ରନ୍‌ରେ ଅଲଆଉଟ୍‌ ହୋଇଥିଲା । ଯାହାଫଳରେ ଭାରତ ଏହି ମ୍ୟାଚ୍‌କୁ ୪୦୮ ରନ୍‌ରେ ପରାଜୟ ବରଣ କରିଛି । ଏହି ପରାଜୟ ସହ ଭାରତ ୨-୦ରେ ସିରିଜ୍‌ ହାରିଛି । ସେପଟେ ଦକ୍ଷିଣ ଆଫ୍ରିକା ୨୫ ବର୍ଷ ପରେ ଭାରତକୁ ଘରୋଇ ମାଟିରେ ହ୍ବାଇଟ୍‌ ଓ୍ବାଶ୍‌ କରିଛି ।

South Africa seal a clinical win in Guwahati to complete a series sweep in the #INDvSA Test series 👊#WTC27 📝: https://t.co/5B1PcNj4kk pic.twitter.com/SoFCQPkNx1

— ICC (@ICC) November 26, 2025

ଗୌହାଟୀରେ ଖେଳାଯାଇଥିବା ଦ୍ବିତୀୟ ଟେଷ୍ଟରେ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ଦକ୍ଷିଣ ଆଫ୍ରିକା । ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକା ୪୮୯ ରନ୍‌ କରିଥିଲା । ଦକ୍ଷିଣ ଆଫ୍ରିକା ପକ୍ଷରୁ ସେନୁରାନ ମୁଥୁସ୍ବାମୀ ୧୦୯ ରନ୍‌ କରିଥିବା ବେଳେ ମାର୍କୋ ଜାନେସନ ୯୩ ରନ୍ କରିଥିଲେ । ଭାରତ ପକ୍ଷରୁ କୁଲଦୀପ ଯାଦବ ସର୍ବାଧିକ ୪ଟି ଓ୍ବିକେଟ ନେଇଥିଲେ ।

ଭାରତ ପ୍ରଥମ ଇନିଂସରେ ମାତ୍ର ୨୦୧ ରନ୍‌ କରି ଅଲଆଉଟ ହୋଇଥିଲା । ଭାରତ ପକ୍ଷରୁ ଯଶସ୍ବୀ ଜୟସ୍ବାଲ ଓ ଓ୍ବାଶିଂଟନ ସୁନ୍ଦରଙ୍କୁ ଛାଡ଼ି ଦେଲେ ଆଉ କୌଣସି ବ୍ୟାଟ୍ସମ୍ୟାନ୍‌ ଭଲ ପ୍ରଦର୍ଶନ କରିପାରିନଥିଲେ । ଯାହାଫଳରେ ଭାରତ ମାତ୍ର ୨୦୧ ରନ୍‌ରେ ଅଲଆଉଟ ହୋଇଥିଲା । ତେଣୁ ଦକ୍ଷିଣ ଆଫ୍ରିକା ୨୮୮ ରନ୍‌ର ବଡ଼ ଲିଡ୍‌ ନେଇଥିଲା ।

ଦକ୍ଷିଣ ଆଫ୍ରିକା ଦ୍ବିତୀୟ ଇନିଂସରେ ୫ ଓ୍ବିକେଟରେ ୨୬୦ ରନ୍‌ କରି ପାଳି ଘୋଷଣା କରିଥିଲା । ଯାହାଫଳରେ ଭାରତକୁ ଦ୍ବିତୀୟ ଟେଷ୍ଟ ଜିତି ସିରିଜ୍‌ ବରାବର କରିବାକୁ ୫୪୯ ଆବଶ୍ୟକ ଥିଲା । ଆଉ ଏହି ବିଶାଳ ରନ୍‌ ଚେଜ୍‌ କରି ଭାରତ ମାତ୍ର ୧୪୦ ରନ୍‌ କରି ଅଲଆଉଟ ହୋଇଥିଲା । ଭାରତ ପକ୍ଷରୁ ରବୀନ୍ଦ୍ର ଜାଡେଜା ସର୍ବାଧିକ ୫୪ ରନ୍ କରିଥିଲେ । ସେହିପରି ଦକ୍ଷିଣ ଆଫ୍ରିକା ପକ୍ଷରୁ ସିମନ୍ ହାରମର ୬ଟି ଓ୍ବିକେଟ ଅକ୍ତିଆର କରିଥିଲେ । ଏହି ବିଜୟ ସହ ଦକ୍ଷିଣ ଆଫ୍ରିକା ୨୫ ବର୍ଷ ପରେ ଭାରତରେ ସିରିଜ୍‌ ହ୍ବାଇଟ୍‌ ଓ୍ବାଶ୍‌ କରିଛି ।

୨୦୦୦ ମସିହାରେ ହାନ୍ସି କ୍ରୋଞ୍ଜେଙ୍କ ନେତୃତ୍ୱରେ ଦକ୍ଷିଣ ଆଫ୍ରିକା ଘରୋଇ ଟେଷ୍ଟ ସିରିଜରେ ଭାରତକୁ ୨-୦ରେ ହ୍ୱାଇଟ ଓ୍ବାଶ୍ କରିଥିଲା। ଏହା ମଧ୍ୟ ଶେଷ ଥର ପାଇଁ ଥିଲା ଯେତେବେଳେ ଆଫ୍ରିକୀୟ ଦଳ ଭାରତରେ ସିରିଜ ଜିତିଥିଲା । ସେହି ସିରିଜ୍‌ର ପ୍ରଥମ ମ୍ୟାଚ୍ ମୁମ୍ବାଇରେ ଖେଳାଯାଇଥିଲା । ଯାହାକୁ ଦକ୍ଷିଣ ଆଫ୍ରିକା ୪ ଓ୍ବିକେଟ୍‌ରେ ଜିତିଥିଲା । ଦ୍ୱିତୀୟ ଟେଷ୍ଟ ବେଙ୍ଗାଲୁରୁରେ ଅନୁଷ୍ଠିତ ହୋଇଥିଲା । ଯାହାକୁ ଆଫ୍ରିକୀୟ ଦଳ ଏକ ଇନିଂସ ଏବଂ ୭୧ ରନରେ ଜିତିଥିଲେ । ଆଉ ୨୫ ବର୍ଷ ପରେ ଏବେ ତେମ୍ବା ବାଭୁମା କୋଲକାତା ଏବଂ ଗୌହାଟୀ ଟେଷ୍ଟରେ ଜିତି ହାନ୍ସି କ୍ରୋଞ୍ଜେଙ୍କ ରେକର୍ଡର ସମକ୍ଷକ ହୋଇଛନ୍ତି ।