ନୂଆଦିଲ୍ଲୀ: ଇଂଲଣ୍ଡ ବିରୋଧରେ ଲର୍ଡ୍ସରେ ଖେଳାଯାଉଥିବା ତୃତୀୟ ତଥା ଅନ୍ତିମ ମ୍ୟାଚରେ ବେହାଲ ହୋଇଥିଲେ ଭାରତୀୟ ବୋଲର । ଷ୍ଟାର ବୋଲର ଜସପ୍ରୀତ ବୁମରାହଙ୍କ ଆଣ୍ଠୁରେ ଆଘାତ ଯୋଗୁଁ ସେ ମ୍ୟାଚରୁ ବାଦ୍ ପଡ଼ିଥିଲେ ଓ ତାଙ୍କ ସ୍ଥାନରେ ଅର୍ଶଦୀପ ସିଂହଙ୍କୁ ସୁଯୋଗ ଦିଆଯାଇଥିଲା । ମ୍ୟାଚ୍ ଯେତେବେଳେ ଆରମ୍ଭ ହୋଇଥିଲା ପ୍ରସିଦ୍ଧ କୃଷ୍ଣ ଦମଦାର ଚମତ୍କାର ବୋଲିଂ କରି ଦୁଇଟି ମେଡେନ୍ ଓଭର ସହିତ ୨୦ଟି ଡଟ୍ ବଲ୍ ଦେଇଥିଲେ । ମାତ୍ର ମ୍ୟାଚ ଯେମିତି ଆଗକୁ ବଢିଲା ଚାପଗ୍ରସ୍ତ ହେଲା ଭାରତୀୟ ଟିମ । ଏବେ ଇଂଲଣ୍ଡଠୁ ଟି-୨୦ ପରେ ODI ସିରିଜ ହାରିବା ପରେ ଦଳ କାହିଁକି ହାରିଲା ତାକୁ ନେଇ ଅନେକ ପ୍ରଶ୍ନ ଠିଆ ହୋଇଛି ।

ଇଂଲଣ୍ଡର ବ୍ୟାଟ୍ସମ୍ୟାନ ଜ୍ୟାକବ ବେଥେଲ୍ ଓ ବେନ ଡକେଟ୍ ୩୬ବର୍ଷରେ ପ୍ରଥମ ଥର ଲାଗି ଭାରତ ବିରୋଧରେ ଶତକୀୟ ଓପନିଂ ପାର୍ଟନରସିପ୍ ହାସଲ କରିଥିଲେ । ପ୍ରଥମ ୱିକେଟ୍ ପଡ଼ିବା ପୂର୍ବରୁ ଉଭୟ ୧୯୨ ରନ୍ ଯୋଡ଼ିଥିଲେ । ଡକେଟ୍ ୧୩୫ ବଲରେ ୧୪୧ ରନ୍ କରିଥିବାବେଳେ ବେଥେଲ୍ ୯୧ ରନ୍ କରି ଆଉଟ୍ ହୋଇଥଲେ । ଭାରତ ଖରାପ ବୋଲିଂ ଦଳ ପାଇଁ ଭାରି ପଡ଼ିଲା । ଭାରତ ବିପକ୍ଷ ଇଂଲଣ୍ଡ ଟିମକୁ କେବଳ ଅତିରିକ୍ତ ୨୬ ରନ୍ ଦେଇଥିଲା, ଯେଉଁଥିରେ ୧୬ଟି ୱାଇଡ୍‌ ୯ଟି ଲେଗ୍ ବାଇ ଓ ଗୋଟିଏ ନୋ ବଲ୍ ଥିଲା ।

• କୁଲଦୀପଙ୍କ ଅନୁପସ୍ଥିତିକୁ ନେଇ ସମାଲୋଚନା

ବୁମରାହଙ୍କ ଅନୁପସ୍ଥିତି ଭାରତ ପାଇଁ ଭାରି ପଡ଼ିଲା । ମାତ୍ର ଏହାଠୁ ସବୁଠୁ ବଡ଼ ପ୍ରଶ୍ନ ହେଉଛି କୁଲଦୀପ ଯାଦବଙ୍କୁ କାହିଁକି ଦଳରୁ ବାଦ୍ ଦିଆଯାଇଥିଲା । ଚାମ୍ପିଆନ୍ସ ଟ୍ରଫି ଜିତିବା ପରେ ମଧ୍ୟ ଭାରତ ୧୫ଟି ଏକଦିବସୀୟ ଅନ୍ତର୍ଜାତୀୟ ମ୍ୟାଚ୍ ଖେଳିଛି, ଯେଉଁଥିରୁ କୁଲଦୀପ କେବଳ ୮ଟି ମ୍ୟାଚ୍ ଖେଳିଛନ୍ତି । ସେହିପରି ୱାଶିଂଟନ ସୁନ୍ଦର ଆହତ ହେବାପରେ ଆଶା ଥିଲା ଏବେ କୁଲଦୀପଙ୍କୁ ସୁଯୋଗ ମିଳିବ, କାରଣ ମିଡିଲ୍ ଓଭରରେ ୱିକେଟ୍ ନେବାରେ ସେ ସିଦ୍ଧଗସ୍ତ । ଏହାପରେ ମଧ୍ୟ ମ୍ୟାନେଜମେଣ୍ଟ ତାଙ୍କୁ ପ୍ଲେଇଙ୍ଗ-୧୧ରୁ ବାଦ୍ ରଖିଥିଲା ।

ପଢନ୍ତୁ ଏହି ଖବର: ଭାରତୀୟ ବୋଲରଙ୍କ ଅବସ୍ଥା ଖରାପ; ବେନ୍-ଜ୍ୟାକବ ରଚିଲେ ଇତିହାସ

• ୨୦୨୭ ବିଶ୍ଵକପ ପୂର୍ବରୁ ସତର୍କ ଘଣ୍ଟି

ଇଂଲଣ୍ଡ ଅଧିନାୟକ ହ୍ୟାରି ବ୍ରୁକ୍ ମ୍ୟାଚ୍ ପୂର୍ବରୁ କହିଥିଲେ ଯେ ଟିମ ମିଡିଲ ଓଭରରେ ୱିକେଟ୍ ବାହାର କରେ ଓ ରନ୍ ରୋକିଥାଏ । ଏପରି ଭାବରେ ମ୍ୟାଚ୍ ଉପରେ ନିୟନ୍ତ୍ରଣ ରଖିଥାଏ । ଭାରତର ସବୁଠୁ ବଡ଼ ସମସ୍ୟା ମଧ୍ୟ ଏହା ହେବାରେ ଲାଗିଛି । ପ୍ରଥମେ ନ୍ୟୁଜିଲାଣ୍ଡ ଓ ଏବେ ଇଂଲଣ୍ଡ...ଭାରତୀୟ ବୋଲର ଲଗାତାର ମିଡିଲ ଓଭରରେ ୱିକେଟ୍ ନେଇ ରନ୍ ରୋକିବାରେ ବିଫଳ ହେଉଛନ୍ତି । ଲର୍ଡସ୍ ବିପର୍ଯ୍ୟୟ କେବଳ ଏକ ମ୍ୟାଚ୍ ହାରିବା ନୁହେଁ, ବରଂ ଏହା ସ୍ପଷ୍ଟ କରିଦେଇଛି ଯେ କେବଳ ଦଳ ଜସପ୍ରୀତ ବୁମରାହଙ୍କ ଉପରେ ନିର୍ଭର କରିବା ଯଥେଷ୍ଟ ନୁହେଁ ବରଂ ମିଡିଲ ଓଭର ବୋଲିଂ ଉପରେ ମଧ୍ୟ ଧ୍ୟାନ ଦେବାକୁ ପଡ଼ିବ ।