Commonwealth Games 2030: ୨୦୩୦ରେ ଭାରତରେ ହେବ ରାଜ୍ୟଗୋଷ୍ଠୀ କ୍ରୀଡ଼ା ! ଜାଣନ୍ତୁ କେଉଁ ସହରରେ ହେବ ଆୟୋଜନ...
Key Points
ଭାରତରେ ହେବ ଆଉ ଏକ ବଡ଼ କ୍ରୀଡ଼ା ମହାକୁମ୍ଭ । ୨୦୩୦ରେ ଭାରତରେ ହେବ ରାଜ୍ୟଗୋଷ୍ଠୀ କ୍ରୀଡ଼ । କେନ୍ଦ୍ର କ୍ୟାବିନେଟ ବୈଠକରେ ମିଳିଲା ମଞ୍ଜୁରୀ ।
ରାଜ୍ୟଗୋଷ୍ଠୀ କ୍ରୀଡ଼ା ୨୦୩୦ ଆୟୋଜନ ପାଇଁ ନିଲାମୀରେ ଭାଗ ନେବ ଭାରତ । ଗୁଜରାଟ ସରକାରଙ୍କ ସହିତ ପ୍ରତିଯୋଗିତା ଆୟୋଜନ ସହଯୋଗ ରାଜିନାମା ଏବଂ ଅନୁଦାନ ସହାୟତା ପ୍ରଦାନକୁ ମଞ୍ଜୁରି ଦେଇଛି କେନ୍ଦ୍ର କ୍ୟାବିନେଟ । ୨୦୩୦ ରାଜ୍ୟଗୋଷ୍ଠୀ କ୍ରୀଡା ବା CWG ଆୟୋଜନ ପାଇଁ ଭାରତ ନିଲାମୀରେ ଭାଗ ନେବା ସହ ବିଡ୍ ଦାଖଲ କରିବ । ଏ ସଂକ୍ରାନ୍ତରେ ଯୁବ ବ୍ୟାପାର ଏବଂ କ୍ରୀଡା ମନ୍ତ୍ରଣାଳୟର ପ୍ରସ୍ତାବକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ମଞ୍ଜୁରି ମିଳିଛି । ସମ୍ପୃକ୍ତ ମନ୍ତ୍ରଣାଳୟ, ବିଭାଗ ଏବଂ କର୍ତ୍ତୃପକ୍ଷଙ୍କଠାରୁ ଆବଶ୍ୟକ ଗ୍ୟାରେଣ୍ଟି ସହିତ ଆୟୋଜକ ସହଯୋଗ ଚୁକ୍ତିନାମା ସ୍ୱାକ୍ଷର କରିବାକୁ କ୍ୟାବିନେଟ୍ ଅନୁମୋଦନ ପ୍ରଦାନ କରିଛି ।
ରାଜ୍ୟଗୋଷ୍ଠୀ କ୍ରୀଡ଼ାରେ ୭୨ଟି ଦେଶର ଖେଳାଳି ଯୋଗଦେବାର ଆଶା କରାଯାଉଛି ଏବଂ ବିଶ୍ୱର ସର୍ବବୃହତ ଷ୍ଟାଡିୟମରେ ଖେଳାଯିବାର ଆଶା କରାଯାଉଛି। ଗୁଜରାଟର ଅହମ୍ମଦାବାଦକୁ ୨୦୩୦ ରାଜ୍ୟଗୋଷ୍ଠୀ କ୍ରୀଡ଼ା ଆୟୋଜନ ପାଇଁ ପ୍ରସ୍ତାବିତ ସହର ଭାବରେ ଚୟନ କରାଯାଇଛି । ବିଶ୍ୱର ସର୍ବବୃହତ ନରେନ୍ଦ୍ର ମୋଦୀ ଷ୍ଟାଡିୟମ ୨୦୨୩ କ୍ରିକେଟ୍ ବିଶ୍ୱକପ୍ ଫାଇନାଲ୍ ଭଳି ବଡ଼ ପ୍ରତିଯୋଗିତା ସଫଳତାର ସହିତ ଆୟୋଜନ କରି ବଡ଼ ଇଭେଣ୍ଟ ଆୟୋଜନ କରିବାର ନିଜର ଦକ୍ଷତା ପ୍ରମାଣିତ କରିସାରିଛି।
ସାଧାରଣତଃ ଯେତେବେଳେ ଏହି ସ୍ତରର ଏକ ଇଭେଣ୍ଟ ଆୟୋଜନ କରାଯାଏ, ସେତେବେଳେ ସାରା ବିଶ୍ୱରୁ ଖେଳାଳି, ପ୍ରଶିକ୍ଷକ, ଦଳ ଅଧିକାରୀ, କର୍ମଚାରୀ, ପର୍ଯ୍ୟଟକ ଏବଂ ଗଣମାଧ୍ୟମ କର୍ମଚାରୀମାନେ ମଧ୍ୟ ଏଥିରେ ଯୋଗ ଦିଅନ୍ତି। ଯଦି ଭାରତକୁ ଆୟୋଜକତା ମିଳେ, ତେବେ ଏହା ଆର୍ଥିକ ଦୃଷ୍ଟିକୋଣରୁ ଏହି ଅଞ୍ଚଳ ପାଇଁ ବହୁତ ଲାଭଦାୟକ ହୋଇପାରେ।
ପ୍ରେସ୍ ଇନଫର୍ମେସନ୍ ବ୍ୟୁରୋ ଏକ ପ୍ରେସ୍ ବିଜ୍ଞପ୍ତି ଜାରି କରି କହିଛି ଯେ ରାଜ୍ୟଗୋଷ୍ଠୀ କ୍ରୀଡ଼ା ଆୟୋଜନ କେବଳ କ୍ରୀଡ଼ା ଜଗତରେ ଭାରତର ନାମକୁ ବୃଦ୍ଧି କରିବ ନାହିଁ । ବରଂ ଏହା ପର୍ଯ୍ୟଟନକୁ ମଧ୍ୟ ପ୍ରୋତ୍ସାହିତ କରିବ, ଲୋକଙ୍କୁ ଚାକିରି ମିଳିବ ଏବଂ ଯୁବ ଖେଳାଳିମାନେ ମଧ୍ୟ ପ୍ରେରଣା ପାଇବେ।
ସୂଚନା ଅନୁସାରେ ୨୦୩୦ ରାଜ୍ୟଗୋଷ୍ଠୀ କ୍ରୀଡା ପାଇଁ ବିଡ୍ ଦାଖଲର ଶେଷ ତାରିଖ ୩୧ ଅଗଷ୍ଟ। କୁହାଯାଉଛି ଯେ IOA ଆଗାମୀ ୪୮ ଘଣ୍ଟା ମଧ୍ୟରେ ସମସ୍ତ ପ୍ରକ୍ରିୟା ସମାପ୍ତ କରିବ। ଯଦି ଏହି ବିଡ୍ ସଫଳ ହୁଏ, ତେବେ ଭାରତ ଦ୍ବିତୀୟ ଥର ରାଜ୍ୟଗୋଷ୍ଠୀ କ୍ରୀଡାର ଆୟୋଜନ କରିବ। ଏହା ପୂର୍ବରୁ ୨୦୧୦ ରେ ନୂଆ ଦିଲ୍ଲୀ ଆୟୋଜନ ହୋଇଥିଲା। ୨୦୨୬ ରେ ସ୍କଟଲ୍ୟାଣ୍ଡର ଗ୍ଲାସଗୋରେ ରାଜ୍ୟଗୋଷ୍ଠୀ କ୍ରୀଡ଼ା ଅନୁଷ୍ଠିତ ହେବ।
