Manav Suthar 10 Wickets / ଗଲ୍‌ରେ ଇତିହାସ ରଚିଲେ ମାନବ ସୁତାର, ୧୦ ୱିକେଟ୍‌ ନେଇ ସାଜିଲେ ବିଜୟର ହିରୋ

ଗଲ୍‌ରେ ଭାରତର ଐତିହାସିକ ବିଜୟ ୘ ୩୭୨ ରନ୍‌ର ବିଶାଳ ଲକ୍ଷ୍ୟ ଆଗରେ ଶ୍ରୀଲଙ୍କାର ବ୍ୟାଟିଂ ଲାଇନ୍‌ ଅଫ୍‌ ମାତ୍ର ୨୦୬ ରନ୍‌ କରି ଅଲଆଉଟ ହୋଇଥିଲା । ଯାହା ଫଳରେ ଭାରତ ଏହି ମ୍ୟାଚ୍‌କୁ ୧୬୫ ରନ୍‌ରେ ବିଜୟଲାଭ କରିଛି । ତେବେ ଟିମ୍‌ ଇଣ୍ଡିଆର ଏହି ବଡ଼ ବିଜୟର ସବୁଠୁ ବଡ଼ ନାୟକ ହେଲେ ଯୁବ ସ୍ପିନର ମାନବ ସୁତାର । ଦ୍ୱିତୀୟ ଟେଷ୍ଟରେ ହିଁ ୧୦ ୱିକେଟ୍‌ ନେଇ ରଚିଲେ ଇତିହାସ ।

ଗଲ୍‌ ଟେଷ୍ଟରେ ଶ୍ରୀଲଙ୍କାକୁ ୧୬୫ ରନ୍‌ରେ ପରାସ୍ତ କରି ଭାରତ ହାସଲ କରିଛି ଦମଦାର ବିଜୟ । ଚତୁର୍ଥ ଇନିଂସରେ ଶ୍ରୀଲଙ୍କା ସାମ୍ନାରେ ୩୭୨ ରନ୍‌ର ବିଶାଳ ଲକ୍ଷ୍ୟ ଥିଲା । କିନ୍ତୁ ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ଶ୍ରୀଲଙ୍କାର ବ୍ୟାଟିଂ ଲାଇନ୍‌ଅପ୍‌ ତିଷ୍ଠି ପାରିନଥିଲା ଏବଂ ଦଳ ମାତ୍ର ୨୦୬ ରନ୍‌ରେ ଅଲଆଉଟ୍‌ ହୋଇଥିଲା ।
ଏହି ବିଜୟର ସବୁଠାରୁ ବଡ଼ ହିରୋ ହେଲେ ଯୁବ ସ୍ପିନର ମାନବ ସୁତାର । କ୍ୟାରିୟରର ମାତ୍ର ଦ୍ୱିତୀୟ ଟେଷ୍ଟରେ ସେ ମ୍ୟାଚ୍‌ରେ ମୋଟ ୧୦ଟି ୱିକେଟ୍‌ ନେଇ ଇତିହାସ ରଚିଛନ୍ତି । ପ୍ରଥମ ଇନିଂସରେ ୪ଟି ୱିକେଟ୍‌ ନେଇଥିବା ସୁତାର ଦ୍ୱିତୀୟ ଇନିଂସରେ ୬ଟି ୱିକେଟ୍‌ ହାସଲ କରିଥିଲେ । ଦ୍ୱିତୀୟ ଇନିଂସର ୭୬ତମ ଓଭରରେ ସେ ଏକାସାଙ୍ଗରେ ୩ ଜଣ ବ୍ୟାଟ୍ସମ୍ୟାନ୍‌ଙ୍କୁ ଆଉଟ୍‌ କରି ଶ୍ରୀଲଙ୍କାର ବିଜୟ ଆଶାକୁ ସମ୍ପୂର୍ଣ୍ଣ ଭାଙ୍ଗି ଦେଇଥିଲେ ।

ଗଲ୍‌ ଇଣ୍ଟରନ୍ୟାସନାଲ ଷ୍ଟାଡିୟମରେ ଏହା ମଧ୍ୟ ଏକ ବିଶେଷ ରେକର୍ଡ । ସୁତାରଙ୍କ ପୂର୍ବରୁ କେବଳ ରବିଚନ୍ଦ୍ରନ ଅଶ୍ୱିନ ଓ ହରଭଜନ ସିଂହ ଏହି ମୈଦାନରେ ଗୋଟିଏ ଟେଷ୍ଟରେ ୧୦ କିମ୍ବା ତା'ଠାରୁ ଅଧିକ ୱିକେଟ୍‌ ନେଇଥିଲେ । ଏବେ ସୁତାର ଏହି ତାଲିକାରେ ତୃତୀୟ ଭାରତୀୟ ବୋଲର ଭାବେ ସାମିଲ ହୋଇଛନ୍ତି । ସେହିପରି ଗଲ୍‌ରେ ୧୦ ୱିକେଟ୍‌ ନେବାରେ ସେ ଦ୍ୱିତୀୟ ବାମହାତୀ ବିଦେଶୀ ବୋଲର । ତାଙ୍କ ପୂର୍ବରୁ ଅଷ୍ଟ୍ରେଲିଆର ମିଚେଲ ଷ୍ଟାର୍କ ୨୦୧୬ରେ ଶ୍ରୀଲଙ୍କା ବିପକ୍ଷରେ ୧୧ଟି ୱିକେଟ୍‌ ନେଇଥିଲେ ।

ଭାରତର ଏହି ବିଜୟ ପଛରେ କେବଳ ସୁତାରଙ୍କ ବୋଲିଂ ନୁହେଁ, ବ୍ୟାଟିଂରେ ଦେବଦତ୍ତ ପଡିକ୍କଲଙ୍କ ଅବଦାନ ମଧ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ପ୍ରଥମ ଇନିଂସରେ ପଡିକ୍କଲ ଧୂଆଁଧାର ୧୬୭ ରନ୍‌ର ଶତକୀୟ ପାରି ଖେଳି ଭାରତକୁ ବଡ଼ ସ୍କୋର କରିବାରେ ସାହାଯ୍ୟ କରିଥିଲେ । ଦ୍ୱିତୀୟ ଇନିଂସରେ ମଧ୍ୟ ସେ ୪୪ ରନ୍‌ କରିଥିଲେ । ପ୍ରଥମ ଇନିଂସରେ ଭାରତ ୧୭୮ ରନ୍‌ର ବିଶାଳ ଅଗ୍ରଣୀ ହାସଲ କରିଥିବାରୁ ଦ୍ୱିତୀୟ ଇନିଂସରେ ୧୯୩ ରନ୍‌ରେ ଅଲଆଉଟ୍‌ ହେବା ସତ୍ତ୍ୱେ ଶ୍ରୀଲଙ୍କା ସାମ୍ନାରେ ୩୭୨ ରନ୍‌ର ବଡ଼ ଲକ୍ଷ୍ୟ ରଖିପାରିଥିଲା ।

ଗଲ୍‌ ମୈଦାନରେ ପୂର୍ବରୁ ସର୍ବାଧିକ ୩୪୨ ରନ୍‌ର ଲକ୍ଷ୍ୟ ହିଁ ସଫଳତାର ସହ ଚେଜ୍‌ ହୋଇଥିଲା । ତେଣୁ ୩୭୨ ରନ୍‌ର ଲକ୍ଷ୍ୟ ଶ୍ରୀଲଙ୍କା ପାଇଁ ଆରମ୍ଭରୁ ହିଁ କଷ୍ଟକର ଥିଲା । ଶେଷରେ ଭାରତୀୟ ବୋଲରମାନେ ଘରୋଇ ଦଳକୁ ୨୦୬ ରନ୍‌ରେ ଅଟକାଇ ମ୍ୟାଚ୍‌କୁ ନିଜ ନାମରେ କରିଛନ୍ତି ।