ଇତିହାସ ରଚିଲା ଟିମ୍ ଇଣ୍ଡିଆ । ଷଷ୍ଠ ଥର ପାଇଁ ଅଣ୍ଡର-୧୯ ବିଶ୍ବକପ୍‌ ଟ୍ରଫି ହାତେଇଛି ଭାରତ । ଭାରତୀୟ ଯୁବ ଦଳ ଟ୍ରଫି ଜିତିବା ପରେ ଟିମ୍‌ ଉପରେ ହୋଇଛି ଟଙ୍କା ବର୍ଷା । ବିସିସିଆଇ ଚାମ୍ପିଅନ୍ ଭାରତୀୟ ଦଳ ପାଇଁ ୭.୫ କୋଟି ନଗଦ ପୁରସ୍କାର ଘୋଷଣା କରିଛି । ବିଶ୍ବକପ୍‌ ଫାଇନାଲରେ ଭାରତର ବଡ଼ ବିଜୟ ପରେ ଏହି ପୁରସ୍କାର ଘୋଷଣା କରାଯାଇଛି । ଫେବୃଆରୀ ୬ ତାରିଖରେ ହରାରେ ସ୍ପୋର୍ଟ୍ସ କ୍ଲବରେ ଖେଳାଯାଇଥିବା ଫାଇନାଲରେ ଭାରତ ଇଂଲଣ୍ଡକୁ ୧୦୦ ରନରେ ପରାସ୍ତ କରିଥିଲା । ଭାରତୀୟ ଦଳ ସମଗ୍ର ଟୁର୍ଣ୍ଣାମେଣ୍ଟରେ ଅପରାଜିତ ରହିଥିଲା ।

ଆୟୁଷ ମହାତ୍ରେଙ୍କ ଅଧିନାୟକତ୍ୱରେ ଦଳର ବିଜୟ ପରେ, ବିସିସିଆଇ ସଚିବ ଦେବଜିତ ସାଇକିଆ ପୁରସ୍କାର ରାଶି ଘୋଷଣା କରିବା ସହ ଦଳର ଉତ୍କୃଷ୍ଟ ପ୍ରଦର୍ଶନକୁ ପ୍ରଶଂସା କରିଥିଲେ ।

ଦେବଜିତ ସାଇକିଆ କହିଛନ୍ତି, "ଆମର ୧୯ ବର୍ଷରୁ କମ୍ ଦଳର ବିଜୟ ପାଇଁ ସମଗ୍ର ଦେଶ ଏବଂ ବିସିସିଆଇ ଗର୍ବିତ । ଫାଇନାଲରେ ଇଂଲଣ୍ଡ ଯେଭଳି ଭାବରେ ପରାସ୍ତ ହେଲା ଏବଂ ସମଗ୍ର ଟୁର୍ଣ୍ଣାମେଣ୍ଟରେ ଦଳର ଅପରାଜିତ ଧାରା ଆମ ସମସ୍ତଙ୍କ ପାଇଁ ଗର୍ବର ବିଷୟ । ବିସିସିଆଇ ଦଳକୁ ୭.୫ କୋଟି ପୁରସ୍କାର ପ୍ରଦାନ କରିବ ।

ଫାଇନାଲରେ ଭାରତର ବିଜୟରେ ପ୍ରମୁଖ ଭୂମିକା ତୁଲାଇଥିଲେ ଟିମ୍ ଇଣ୍ଡିଆ ଷ୍ଟାର ବ୍ୟାଟ୍ସମ୍ୟାନ୍‌ ବୈଭବ ସୂର୍ଯ୍ୟବଂଶୀ । ପ୍ରଥମେ ବ୍ୟାଟିଂ କରି, ଅଧିନାୟକ ଆୟୁଷ ମହାତ୍ରେଙ୍କ ନେତୃତ୍ୱରେ ଭାରତ ୯ ୱିକେଟରେ ୪୧୧ ରନ୍ କରିଥିଲା ।

ବୈଭବ ସୂର୍ଯ୍ୟବଂଶୀ ଏକାକୀ ୧୭୫ ରନ୍‌ର ଏକ ବିସ୍ଫୋରକ ଇନିଂସ ଖେଳି ଫାଇନାଲକୁ ଏକପାଖିଆ କରିଦେଇଥିଲେ । ସୂର୍ଯ୍ୟବଂଶୀ ମାତ୍ର ୫୫ ବଲ୍‌ରେ ତାଙ୍କର ଶତକ ପୂରଣ କରିଥିଲେ, ଯାହା ୧୯ ବର୍ଷରୁ କମ୍ ବିଶ୍ୱକପ୍ ଇତିହାସର ଦ୍ୱିତୀୟ ଦ୍ରୁତତମ ଶତକ ।

୪୧୨ ରନ୍‌ର ଲକ୍ଷ୍ୟ ପିଛା କରି ଇଂଲଣ୍ଡ କେବେ ବି ତା’ର ଲୟ ପାଇପାରିଲା ନାହିଁ । ଯଦିଓ କାଲେବ ଫକନର ଶତକ ହାସଲ କରିଥିଲେ କିନ୍ତୁ ଅନ୍ୟ ବ୍ୟାଟ୍ସମ୍ୟାନ୍‌ଙ୍କ ପକ୍ଷରୁ ତାଙ୍କୁ ସମର୍ଥନ ମିଳିପାରିନଥିଲା । ଭାରତୀୟ ବୋଲରମାନେ ୱିକେଟ୍ ନେଇ ଚାଲିଥିଲେ ଏବଂ ଇଂଲଣ୍ଡକୁ କେବେ ପ୍ରତ୍ୟାବର୍ତ୍ତନ କରିବାକୁ ଦେଇ ନଥିଲେ । ଶେଷରେ ଇଂଲଣ୍ଡ ୩୧୧ ରନରେ ଅଲଆଉଟ୍ ହୋଇଥିଲା ଏବଂ ଭାରତ ୧୦୦ ରନ୍‌ରେ ଫାଇନାଲ୍ ଜିତିଲା ।