ଅଣ୍ଡର-୧୯ ବିଶ୍ବକପ୍‌ ଫାଇନାଲରେ ଟିମ୍‌ ଇଣ୍ଡିଆ । ଆଫଗାନିସ୍ତାନକୁ ୭ ଓ୍ବିକେଟରେ ପରାସ୍ତ କରି ଫାଇନାଲରେ ନିଜ ସ୍ଥାନ ପକ୍କା କରିଛି ଭାରତ । ଟିମ୍ ଇଣ୍ଡିଆ ଏବେ ୧୦ମ ଥର ପାଇଁ ଅଣ୍ଡର-୧୯ ବିଶ୍ବକପ୍‌ ଫାଇନାଲ ଖେଳିବ । ବୁଧବାର ହରାରେର ହରାରେ ସ୍ପୋର୍ଟସ୍ କ୍ଲବରେ ଭାରତ ଏବଂ ଆଫଗାନିସ୍ତାନ ମଧ୍ୟରେ ୧୯ ବର୍ଷରୁ କମ୍ ବିଶ୍ୱକପ୍ ୨୦୨୬ର ଦ୍ୱିତୀୟ ସେମିଫାଇନାଲ ଖେଳାଯାଇଥିଲା । ଟିମ୍ ଇଣ୍ଡିଆ ଏହି ମ୍ୟାଚ୍‌କୁ ୭ ୱିକେଟରେ ଜିତି ଫାଇନାଲରେ ସ୍ଥାନ ପକ୍କା କରିଛି । ଟିମ୍ ଇଣ୍ଡିଆ ସାମ୍ନାରେ ୩୧୧ ରନର ଲକ୍ଷ୍ୟ ରଖାଯାଇଥିଲା । ଯାହାକୁ ଭାରତୀୟ ଦଳ ୪୧.୧ ଓଭରରେ ସହଜରେ ହାସଲ କରିଥିଲେ । ଓପନର ଆରନ୍ ଜର୍ଜ ଦଳ ପାଇଁ ସର୍ବାଧିକ ୧୧୫ ରନ୍ କରିଥିଲେ ।

୧୯ ବର୍ଷରୁ କମ୍ ବିଶ୍ୱକପ୍ ଇତିହାସରେ ଏହା ସର୍ବାଧିକ ରନ୍‌ ଚେଜ୍‌ ଥିଲା । ପୂର୍ବରୁ, ନ୍ୟୁଜିଲ୍ୟାଣ୍ଡ ୨୦୦୬ରେ ଆୟରଲ୍ୟାଣ୍ଡ ବିପକ୍ଷରେ ୩୦୫ ରନର ପିଛା କରିଥିଲା । ଏବେ ଭାରତ ଏହି ବିଶ୍ୱ ରେକର୍ଡ ଭାଙ୍ଗି ଫାଇନାଲରେ ସ୍ଥାନ ପକ୍କା କରିଛି ।

ଦ୍ୱିତୀୟ ସେମିଫାଇନାଲରେ ଆଫଗାନିସ୍ତାନ ପ୍ରଥମେ ବ୍ୟାଟିଂ କରି ୫୦ ଓଭରରେ ୪ ୱିକେଟରେ ୩୧୦ ରନ୍‌ କରିଥିଲା । ଦଳ ପକ୍ଷରୁ ଫୈସଲ ସିଂନୋଜାଦା ସର୍ବାଧିକ ୯୩ ବଲରୁ ୧୫ ଚୌକା ସହିତ ୧୧୦ ରନ୍ କରିଥିଲେ । ଉଜୈରୁଲ୍ଲା ମଧ୍ୟ ୮୬ ବଲରୁ ୧୨ ଚୌକା ଏବଂ ୨ ଛକା ମାରି ୧୦୧* ରନ୍ କରିଥିଲେ । ଭାରତ ପକ୍ଷରୁ ଦୀପେଶ ଦେବେନ୍ଦ୍ରନ୍ ଏବଂ କନିଷ୍କ ଚୌହାନ ଦୁଇଟି ଲେଖାଏଁ ୱିକେଟ୍ ନେଇଥିଲେ ।

ଟିମ୍ ଇଣ୍ଡିଆର ପ୍ରଭାବଶାଳୀ ରନ୍ ପିଛା

୩୧୧ ରନ୍‌ର ଟାର୍ଗେଟକୁ ପିଛା କରି ଟିମ୍ ଇଣ୍ଡିଆ ମାତ୍ର ୪୧.୧ ଓଭରରେ ତିନୋଟି ୱିକେଟ୍ ହରାଇ ବିଜୟ ହାସଲ କରିଥିଲା । ଓପନର୍ ଆରନ୍ ଜର୍ଜ ଦଳ ପକ୍ଷରୁ ସର୍ବାଧିକ ରନ୍‌ ସ୍କୋର କରିଥିଲେ । ବୈଭବ ସୂର୍ଯ୍ୟବଂଶୀ ଏବଂ ଅଧିନାୟକ ଆୟୁଷ ମହାତ୍ରେ ମଧ୍ୟ ଅର୍ଦ୍ଧଶତକ ହାସଲ କରିଥିଲେ । ଆଫଗାନିସ୍ତାନ ପାଇଁ ନୁରିସ୍ତାନି ଉମରଜାଇ ଦୁଇଟି ୱିକେଟ୍ ନେଇଥିଲେ ।

ଫେବୃଆରୀ ୬ ତାରିଖରେ ଫାଇନାଲ୍

ଟୁର୍ଣ୍ଣାମେଣ୍ଟର ଫାଇନାଲ୍ ମ୍ୟାଚ୍ ଏବେ ରବିବାର, ଫେବୃଆରୀ ୬ ତାରିଖରେ ଭାରତ ଏବଂ ଇଂଲଣ୍ଡ ମଧ୍ୟରେ ଖେଳାଯିବ । ହାରାରେର ହରାରେ ସ୍ପୋର୍ଟ୍ସ କ୍ଲବରେ ଖେଳାଯିବାକୁ ଥିବା ଫାଇନାଲ୍ ମ୍ୟାଚ୍ ଭାରତୀୟ ସମୟ ଅପରାହ୍ନ ୧:୦୦ରେ ଆରମ୍ଭ ହେବ । ଏହି ମ୍ୟାଚ୍‌ ଜିତି ଟିମ୍ ଇଣ୍ଡିଆ ଷଷ୍ଠ ଥର ପାଇଁ ଟାଇଟଲ୍ ଜିତିବାକୁ ଲକ୍ଷ୍ୟ ରଖିବ ।