ଟି-୨୦ ବିଶ୍ବକପ୍‌ରେ ଟିମ୍‌ ଇଣ୍ଡିଆର ଲଗାତର ଦ୍ବିତୀୟ ବିଜୟ । ପ୍ରଥମେ ଆମେରିକା ଆଉ ଏବେ ନାମିବ୍ୟା ବିପକ୍ଷରେ ବଡ଼ ବିଜୟ ହାସଲ କରିଛି ଟିମ୍ ଇଣ୍ଡିଆ । ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍‌କୁ ଭାରତ ୯୩ ରନ୍‌ରେ ବିଜୟ ହାସଲ କରିଛି । ଏହି ବିଜୟ ସହ ଚଳିତ ଟି-୨୦ ବିଶ୍ବକପ୍‌ରେ ଭାରତ ଲଗାତର ଦ୍ବିତୀୟ ବିଜୟ ହାସଲ କରିଛି ।

ଦିଲ୍ଲୀରେ ଖେଳାଯାଇଥିବା ଏହି ମ୍ୟାଚ୍‌ରେ ପ୍ରଥମେ ଟସ୍‌ ଜିତି ବୋଲିଂ ନିଷ୍ପତ୍ତି ନେଇଥିଲା ନାମିବ୍ୟା । ପ୍ରଥମେ ବ୍ୟାଟିଂ କରି ଆରମ୍ଭରୁ ବିସ୍ଫୋରକ ଇନିଂସ ଖେଳିଥିଲେ ଭାରତୀୟ ବ୍ୟାଟ୍ସମ୍ୟାନ୍‌ । ଦୁଇ ଓପନର ଇଶାନ କିଶାନ ଓ ସଞ୍ଜୁ ସାମସନ ଭଲ ଆରମ୍ଭ ଦେଇଥିଲେ । ସଞ୍ଜୁ ୨୨ ରନ୍‌ କରି ଆଉଟ୍‌ ହୋଇଥିଲେ । ଏହା ପରେ ତିଲକଙ୍କ ସହ ମିଶି ଇଶାନ ଟିମ୍‌ ଇଣ୍ଡିଆର ସ୍କୋରକୁ ଦ୍ରୁତ ଗତିରେ ଆଗକୁ ବଢ଼ାଇଥିଲେ । ସପ୍ତମ ଓଭରରେ ଭାରତର ସ୍କୋର ୧୦୦ରେ ପହଞ୍ଚିଥିଲା । ଇଶାନ କିଶାନ ୨୪ ବଲ୍‌ରେ ୬୧ ରନ୍‌ ଧୁଆଁଧାର ଇନିଂସ ଖେଳି ପ୍ୟାଭିଲିୟନ ଫେରିଥିଲେ । ଏହା ପରେ ହାର୍ଦ୍ଦିକ ପାଣ୍ଡ୍ୟା ଦ୍ରୁତଗତିରେ ୫୨ ରନ୍‌ କରି ଟିମ୍‌ ଇଣ୍ଡିଆର ସ୍କୋର ୨୦୯ ରନ୍‌ରେ ପହଞ୍ଚାଇଥିଲେ । ଭାରତ ପକ୍ଷରୁ ଇଶାନ କିଶାନ ୬୧ ରନ୍‌ କରିଥିବା ବେଳେ ହାର୍ଦ୍ଦିକ ୫୨, ତିଲକ ବର୍ମା ୨୫ ରନ୍‌ କରିଥିଲେ ।

୨୧୦ ରନ୍‌ର ଟାର୍ଗେଟ ନେଇ ପଡ଼ିଆକୁ ଓହ୍ଲାଇଥିବା ନାମିବ୍ୟା ଭଲ ଆରମ୍ଭ କରିଥିଲା । ପାଓ୍ବାର ପ୍ଲେ'ରେ ୧ ଓ୍ବିକେଟ୍‌ ବିନିମୟରେ ୫୭ ରନ୍‌ କରିଥିଲା । କିନ୍ତୁ ବରୁଣ ଚକ୍ରବର୍ତ୍ତୀ ବୋଲିଂ କରିବା ପରେ ନାମିବ୍ୟା ବ୍ୟାଟ୍ସମ୍ୟାନ୍‌ କ୍ରିଜ୍‌ରେ ଅଧିକ ସମୟ ତିଷ୍ଠି ପାରିନଥିଲେ । ଲଗାତର ବ୍ୟବଧାନରେ ଗୋଟିଏ ପରେ ଗୋଟିଏ ଓ୍ବିକେଟ୍‌ ପଡ଼ିଥିଲା । ନାମିବ୍ୟା ୧୧୬ ରନ୍‌ରେ ଅଲଆଉଟ୍‌ ହୋଇଥିଲା । ଯାହାଫଳରେ ଭାରତ ଏହି ମ୍ୟାଚ୍‌କୁ ୯୩ ରନ୍‌ରେ ବିଜୟ ଲାଭ କରିଥିଲା । ଭାରତ ପକ୍ଷରୁ ବରୁଣ ଚକ୍ରବର୍ତ୍ତୀ ସର୍ବାଧିକ ୩ଟି ଓ୍ବିକେଟ୍‌ ନେଇଥିବା ବେଳେ ଅକ୍ଷର ପଟେଲ ଓ ହାର୍ଦ୍ଦିକ ପାଣ୍ଡ୍ୟା ଦୁଇଟି ଓ୍ବିକେଟ୍‌ ଅକ୍ତିଆର କରିଥିଲେ ।