ଜାନୁଆରୀ ୧୧ରୁ ଆରମ୍ଭ ହେବାକୁ ଯାଉଛି ଭାରତ-ନ୍ୟୁଜିଲାଣ୍ଡ ମଧ୍ୟରେ ଦିନିକିଆ ସିରିଜ୍‌ । ଏହି ହାଇ-ଭୋଲଟେଜ୍ ମ୍ୟାଚ୍ ପ୍ରଶଂସକଙ୍କ ମଧ୍ୟରେ ପ୍ରବଳ ଉତ୍ସାହ ସୃଷ୍ଟି କରୁଛି । ବରୋଦାରେ ଖେଳାଯିବାକୁ ଥିବା ପ୍ରଥମ ଦିନିକିଆ ପାଇଁ ଅନଲାଇନ୍ ଟିକେଟ୍ ମାତ୍ର ୮ ମିନିଟ୍ ମଧ୍ୟରେ ବିକ୍ରି ହୋଇଯାଇଛି । ଯାହା ସ୍ପଷ୍ଟ କରୁଛି ଯେ ବିରାଟ କୋହଲି ଏବଂ ରୋହିତ ଶର୍ମାଙ୍କୁ ପଡ଼ିଆରେ ଖେଳୁଥିବାର କ୍ରେଜ୍‌ ଏବେ ବି ବଜାୟ ରହିଛି ।

ଅନଲାଇନ୍ ଟିକେଟ୍ ବିକ୍ରି ୮ ମିନିଟ୍ ମଧ୍ୟରେ ଶେଷ ହେଲା

ଭାରତ ବନାମ ନ୍ୟୁଜିଲାଣ୍ଡ ପ୍ରଥମ ଦିନିକିଆ ପାଇଁ ଅନଲାଇନ୍ ଟିକେଟ୍ ବିକ୍ରି ଜାନୁଆରୀ ୧ ରେ BookMyShow ୱେବସାଇଟ୍ ଏବଂ ଆପରେ ଆରମ୍ଭ ହୋଇଥିଲା । ରିପୋର୍ଟ ଅନୁସାରେ, ପ୍ରଶଂସକମାନେ ଟିକେଟ୍ ବୁକିଂ ଆରମ୍ଭ ହେବା ମାତ୍ରେ ଦର୍ଶକମାନେ ଅନଲାଇନ୍‌ରେ ଟିକେଟ୍‌ ବୁକ୍ କରିଥିଲେ । ତେବେ ସମସ୍ତ ଅନଲାଇନ୍ ଟିକେଟ୍ ୮ ମିନିଟ୍ ମଧ୍ୟରେ ବିକ୍ରି ହୋଇଯାଇଥିଲା । ସୂଚନା ଅନୁସାରେ, ଏପର୍ଯ୍ୟନ୍ତ କେବଳ ଅନଲାଇନ୍‌ ଟିକେଟ୍‌ ବିକ୍ରି ହୋଇଛି । ଅଫଲାଇନ୍ ଟିକେଟ୍ ବିକ୍ରି ପାଇଁ ତାରିଖ ଏପର୍ଯ୍ୟନ୍ତ ଘୋଷଣା କରାଯାଇ ନାହିଁ ।

୨୦୨୬ରେ ରୋହିତ ଏବଂ ବିରାଟଙ୍କ ପ୍ରଥମ ଅନ୍ତର୍ଜାତୀୟ ମ୍ୟାଚ୍

ଏହି ମ୍ୟାଚ୍ ରୋହିତ ଶର୍ମା ଏବଂ ବିରାଟ କୋହଲିଙ୍କ ୨୦୨୬ରେ ପ୍ରଥମ ଅନ୍ତର୍ଜାତୀୟ ମ୍ୟାଚ୍ ହେବ । ଉଭୟ କିମ୍ବଦନ୍ତୀଙ୍କୁ ଶେଷ ଥର ପାଇଁ ଡିସେମ୍ବର ୨୦୨୫ରେ ଦକ୍ଷିଣ ଆଫ୍ରିକା ବିପକ୍ଷ ସିରିଜରେ ଏକାଠି ଦେଖିବାକୁ ମିଳିଥିଲା । ୨୦୨୪ରେ ଟି-୨୦ ଅନ୍ତର୍ଜାତୀୟ ଏବଂ ୨୦୨୫ରେ ଟେଷ୍ଟ କ୍ରିକେଟରୁ ଅବସର ନେବା ପରେ ରୋହିତ ଏବଂ ବିରାଟ ଏବେ କେବଳ ଦିନିକିଆ ଫର୍ମାଟରେ ଖେଳୁଛନ୍ତି । କିନ୍ତୁ ଏବେ ବି ସେମାନଙ୍କ ଲୋକପ୍ରିୟତା ହ୍ରାସ ପାଇନାହିଁ।

ରୋହିତ ଏବଂ ବିରାଟ ଉତ୍କୃଷ୍ଟ ଫର୍ମରେ ଅଛନ୍ତି

ସାମ୍ପ୍ରତିକ ସମୟରେ ରୋହିତ-ବିରାଟ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ବିପକ୍ଷରେ ଚମତ୍କାର ପ୍ରଦର୍ଶନ କରିଛନ୍ତି । ଉଭୟ ପ୍ରମାଣ କରିଛନ୍ତି ଯେ କେବଳ ଗୋଟିଏ ଫର୍ମାଟ୍ ଖେଳିବା ସେମାନଙ୍କ ଫର୍ମ ଏବଂ ଫିଟନେସକୁ ପ୍ରଭାବିତ କରିନାହିଁ । ଚୟନ କମିଟି ମୁଖ୍ୟ ଅଜିତ ଅଗରକରଙ୍କ ୨୦୨୭ ବିଶ୍ୱକପ୍ ସମ୍ପର୍କରେ ବୟାନ ସତ୍ତ୍ୱେ, ଉଭୟ ପଡ଼ିଆରେ ବ୍ୟାଟ୍ ସହିତ ଜବାବ ଦେଇଛନ୍ତି ।

ଭାରତୀୟ ଦଳ କେବେ ଘୋଷଣା କରାଯିବ?

ନ୍ୟୁଜିଲାଣ୍ଡ ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ ପାଇଁ ଭାରତୀୟ ଦଳ ଜାନୁଆରୀ ୩ ରେ ଘୋଷଣା କରାଯିବ। ପୂର୍ବ ଦିନିକିଆ ସିରିଜରେ ଅଷ୍ଟ୍ରେଲିଆଠାରୁ ୧-୨ ହାରିବା ପରେ ଭାରତ ଦକ୍ଷିଣ ଆଫ୍ରିକାକୁ ୨-୧ରେ ପରାସ୍ତ କରି ଏକ ଦୃଢ଼ ପ୍ରତ୍ୟାବର୍ତ୍ତନ କରିଛି ।

ଭାରତ ବନାମ ନ୍ୟୁଜିଲ୍ୟାଣ୍ଡ 2026 ପାଇଁ ପୂର୍ଣ୍ଣ କାର୍ଯ୍ୟସୂଚୀ

ପ୍ରଥମ ODI: ଜାନୁଆରୀ ୧୧ - ବରୋଦା (୧:୩୦ PM)
ଦ୍ୱିତୀୟ ODI: ଜାନୁଆରୀ ୧୪ - ରାଜକୋଟ
ତୃତୀୟ ODI: ଜାନୁଆରୀ ୧୮ - ଇନ୍ଦୋର
ଏହାପରେ ଜାନୁଆରୀ ୨୧ରୁ ପାଞ୍ଚ ମ୍ୟାଚ୍ ବିଶିଷ୍ଟ T20 ସିରିଜ୍ ଆରମ୍ଭ ହେବ ।