World Cup Final / ଆଜି ବିଶ୍ବକପ୍‌ ଫାଇନାଲ, ଅହମ୍ମଦାବାଦରେ ଇତିହାସ ଲେଖିବେ ସୂର୍ଯ୍ୟ ବ୍ରିଗେଡ୍

ଆଜି ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଫାଇନାଲ ମୁକାବିଲା । ଗୁଜରାଟ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯିବ ICC ଟି-୨୦ ବିଶ୍ବକପର ଚୂଡ଼ାନ୍ତ ଲଢ଼େଇ । ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ହେବ ଜୋରଦାର ଟକ୍କର । ସୂର୍ଯ୍ୟକୁମାର ଯାଦବଙ୍କ ଅଧିନାୟକତ୍ୱରେ, ଭାରତୀୟ ଟିମ୍‌ ଲକ୍ଷ ଲକ୍ଷ ପ୍ରଶଂସକଙ୍କ ସମ୍ମୁଖରେ ଘରୋଇ ମାଟିରେ ଇତିହାସ ସୃଷ୍ଟି କରିବାର ଲକ୍ଷ୍ୟ ରଖିଛି । ସେହିପରି ପ୍ରଥମ ଥର ପାଇଁ ଟି-୨୦ ବିଶ୍ବକପ୍‌ ଟ୍ରଫି ଜିତିବା ଲକ୍ଷ୍ୟରେ ଆଜି ପଡ଼ିଆକୁ ଓହ୍ଲାଇବ ନ୍ୟୁଜିଲାଣ୍ଡ ।

ଅନ୍ୟପଟେ ଗତ ଅଢ଼େଇ ବର୍ଷ ମଧ୍ୟରେ ଆଇସିସି ଇଭେଣ୍ଟଗୁଡ଼ିକରେ ଅହମ୍ମଦାବାଦ ଗ୍ରାଉଣ୍ଡ ଟିମ୍ ଇଣ୍ଡିଆ ପାଇଁ ବିଶେଷ ଅନୁକୂଳ ହୋଇନାହିଁ । ୨୦୨୩ ବିଶ୍ୱକପ୍ ଠାରୁ ୨୦୨୬ ଟି-୨୦ ବିଶ୍ୱକପ୍ ପର୍ଯ୍ୟନ୍ତ । ୨୦୨୩ ଦିନିକିଆ ବିଶ୍ବକପ୍‌ ଫାଇନାଲ ଓ ଚଳିତ ଟି-୨୦ ବିଶ୍ବକପ୍‌ର ସୁପର-୮ ପର୍ଯ୍ୟାୟରେ ଦକ୍ଷିଣ ଆଫ୍ରିକା ବିରୋଧରେ ମଧ୍ୟ ଏହି ଷ୍ଟାଡିୟମରେ ପରାଜୟ ବରଣ କରିଛି ଭାରତ ।

ତେବେ ଭାରତୀୟ ଦଳ ଆଇସିସିର ଗତ ଚାରୋଟି ଭିନ୍ନ ଭିନ୍ନ ଟୁର୍ଣ୍ଣାମେଣ୍ଟରେ ମୋଟ ୩୨ଟି ମ୍ୟାଚ୍ ଖେଳିଛି । ଆଉ ମାତ୍ର ଦୁଇଟି ମ୍ୟାଚ୍‌ରେ ହାରିଛି । ଏଥିମଧ୍ୟରୁ ଗୋଟିଏ ଥିଲା ୨୦୨୩ ଦିନିକିଆ ବିଶ୍ବକପ୍‌ ଫାଇନାଲ ଥିଲା ଏବଂ ଅନ୍ୟଟି ଚଳିତ ବିଶ୍ୱକପ୍‌ରେ ଦକ୍ଷିଣ ଆଫ୍ରିକା ବିପକ୍ଷରେ ସୁପର ୮ ମ୍ୟାଚ୍ ଥିଲା ।

ଭାରତ ଏବଂ ନ୍ୟୁଜିଲାଣ୍ଡ ଟି-୨୦ ବିଶ୍ୱକପ୍ ଇତିହାସରେ ତିନିଥର ମୁହାଁମୁହିଁ ହୋଇଛନ୍ତି ଏବଂ ନ୍ୟୁଜିଲାଣ୍ଡ ତିନିଥର ଜିତିଛି । ପ୍ରଥମେ ୨୦୦୭ ଟି-୨୦ ବିଶ୍ୱକପ୍‌ରେ ଭାରତକୁ ୧୦ ରନ୍‌ରେ ପରାସ୍ତ କରିଥିଲେ । ତା'ପରେ ୨୦୧୬ ଟୁର୍ଣ୍ଣାମେଣ୍ଟରେ ଟିମ୍ ଇଣ୍ଡିଆ ୪୭ ରନ୍‌ରେ ହାରିଥିଲା । ୨୦୨୧ ବିଶ୍ୱକପ୍‌ରେ ନ୍ୟୁଜିଲାଣ୍ଡ ୮ ୱିକେଟ୍‌ରେ ଜିତିଥିଲା ।

ସେପଟେ ମଇଦାନରେ ମୁକାବିଲା ପୂର୍ବରୁ ବାହାରେ କ୍ୟାପଟେନଙ୍କ ବାକ୍ ଯୁଦ୍ଧ । ନ୍ୟୁଜିଲାଣ୍ଡ କ୍ୟାପଟେନ ସେଣ୍ଟେନରଙ୍କ ଚେତାବନୀକୁ ଟିମ୍ ଇଣ୍ଡିଆ କ୍ୟାପଟେନ୍ ସୂର୍ଯ୍ୟକୁମାରଙ୍କ କଟାକ୍ଷ । ସୂର୍ଯ୍ୟକୁମାର କହିଛନ୍ତି ବଡ଼ ମ୍ୟାଚ୍ ପୂର୍ବରୁ ସମସ୍ତେ ଏହି କଥା କୁହନ୍ତି, ଖେଳାଳି ଏବେ କିଛି ନୂଆ କଥା କହିବା ଉଚିତ ।

ବଡ଼ ଟୁର୍ଣ୍ଣାମେଣ୍ଟର ଫାଇନାଲ୍ ପୂର୍ବରୁ ଏମିତି ବାକ୍ ଯୁଦ୍ଧ କିଛି ନୂଆ କଥା ନୁହେଁ । ଏହି ଟି-ଟ୍ବେଣ୍ଟି ବିଶ୍ବକପ୍‌ର ସେମିଫାଇନାଲ୍ ପୂର୍ବରୁ ମଧ୍ୟ ଏମିତି କିଛି କହିଥିଲେ ଇଂଲଣ୍ଡର ଅଲରାଉଣ୍ଡର ସାମ୍ କରନ୍ । ଭାରତ ବିପକ୍ଷରେ ସେମିଫାଇନାଲ୍ ଖେଳିଥିଲା ଇଂଲଣ୍ଡ । ସାମ୍ କରନ୍ କହିଥିଲେ ଭାରତୀୟ ଦର୍ଶକଙ୍କୁ ଚୁପ୍ କରାଇ ଦେବେ । କିନ୍ତୁ ଏହି ମ୍ୟାଚରେ ଇଂଲଣ୍ଡ ପରାଜିତ ହେବା ସହ ଟୁର୍ଣ୍ଣାମେଣ୍ଟରୁ ବିଦାୟ ନେଇଥିଲା ।