ଡିସେମ୍ବର ୯ରେ ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଅନ୍ତର୍ଜାତୀୟ ଟି-୨୦ ମ୍ୟାଚ୍‌ ଖେଳାଯିବ । ଏଥିପାଇଁ ସୋମବାର ପ୍ରଥମ ପର୍ଯ୍ୟାୟ ଟିକେଟ୍ ବିକ୍ରି ଆରମ୍ଭ ହୋଇଛି । ପ୍ରଥମ ଟି-୨୦ ମ୍ୟାଚ୍‌ ପାଇଁ ସୋମବାର ଅନଲାଇନ୍‌ ମଧ୍ୟମରେ ଟିକେଟ୍‌ ବିକ୍ରି ଆରମ୍ଭ ହୋଇଥିଲା । ‘ଡିଷ୍ଟ୍ରିକ୍ଟ ବାଏ ଜୋମାଟୋ ଆପ୍‌’ ଏବଂ ୱେବସାଇଟ୍‌ରେ ଲୋକେ ଟିକଟ ବୁକ୍ କରିପାରିବେ ବୋଲି ଗତ ରବିବାର ଓସିଏ ସମ୍ପାଦକ ସାମ୍ବାଦିକ ସମ୍ମିଳନୀରେ କହିଥିଲେ ।
କିନ୍ତୁ ଓ୍ବେବସାଇଟ୍‌ ଖୋଲୁ ଖୋଲୁ ସବୁ ଟିକେଟ୍‌ ସରି ଯାଇଥିଲା । ହଜାର ହଜାର କ୍ରିକେଟ୍‌ ପ୍ରେମୀ ଅନଲାଇନ୍‌ରେ ଟିକେଟ୍‌ ବୁକ୍‌ କରି ମ୍ୟାଚ୍‌ ଦେଖିବାକୁ ଯିବାକୁ ଆଶା କରିଥିଲେ । କିନ୍ତୁ ଅନଲାଇନ୍‌ ବୁକିଂ ଆରମ୍ଭ ହେବା ମାତ୍ରେ ହିଁ ସବୁ ଟିକେଟ୍‌ ସରି ଯାଇଥିଲା । ଯାହାଫଳରେ ଟିକେଟ୍‌ ନପାଇ କ୍ରିକେଟ୍‌ ପ୍ରେମୀ ନିରାଶ ହୋଇଛନ୍ତି ।

ତେବେ ଏଥର ମାତ୍ର ୨ ହଜାର ଟିକେଟ୍‌ ଅନଲାଇନ୍‌ରେ ଉପଲବ୍ଧ ହୋଇଥିଲା । ତେବେ ଯେଉଁମାନେ ଅନଲାଇନ୍‌ରେ ଟିକେଟ୍‌ କରିଛନ୍ତି ସେମାନେ ଆସନ୍ତା ୮ ଓ ୯ ତାରିଖରେ କେମ୍ବ୍ରିଜ ସ୍କୁଲରେ ଖୋଲିଥିବା ସ୍ୱତନ୍ତ୍ର କାଉଣ୍ଟରରେ ଟିକେଟ୍‌ ରିଡିମ୍‌ କରିପାରିବେ । ସେଠାରୁ ସେମାନେ ଟିକଟ୍‌ର ହାର୍ଡକପି ସଂଗ୍ରହ କରି ପାରିବେ ବୋଲି ସାମ୍ବାଦିକ ସମ୍ମିଳନୀରେ କହିଥିଲେ ଓସିଏ ସମ୍ପାଦକ ।

ସେହିପରି ଡିସେମ୍ବର ୩ ଓ ୪ରେ ଓସିଏ ସହ ଅନୁବନ୍ଧିତ ୟୁନିଟ୍‌ଗୁଡ଼ିକୁ ଟିକେଟ ବିକ୍ରି କରାଯିବ । ମୋଟ ୪୨ ହଜାର ଟିକେଟରୁ ୧୧ ହଜାର ଟିକେଟ ଅନୁବନ୍ଧିତ ୟୁନିଟ୍‌ କିଣିବେ । ୧୦ ହଜାର ଟିକେଟ କାଉଣ୍ଟରରେ ବିକ୍ରି କରାଯିବ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି ।

ସୂଚନା ଅନୁସାରେ, ବାରବାଟୀରେ ପୂର୍ବରୁ ସିଟ୍‌ ସଂଖ୍ୟା ୪୪ ହଜାର ୫୦୦ ଥିଲା । କିନ୍ତୁ ଚଳିତ ମ୍ୟାଚ୍‌ରେ ସେଥିରୁ ୨୫୦୦ ସିଟ୍‌ କମିବ ।
ତେବେ ଡିସେମ୍ବର ୯ରେ ଅର୍ଥାତ ମ୍ୟାଚ୍‌ ଦିନ DMX ଲାଇଟ୍‌ ଆଣ୍ଡ୍‌ ସାଉଣ୍ଡ୍ ସୋ' ହେବ । ମ୍ୟାଚ ପାଇଁ ୫୦ କୋଟିର ବୀମା ରହିଛି । ତେବେ ଡିସେମ୍ବର ୮ ତାରିଖରେ ଉଭୟ ଦଳ ଅଭ୍ୟାସ କରିବାକୁ ଷ୍ଟାଡିୟମ ଯିବେ । ୮ ତାରିଖ ଦିନ ୧:୩୦ରୁ ୪:୩୦ ପର୍ଯ୍ୟନ୍ତ ଟିମ୍ ଇଣ୍ଡିଆ ବାରବାଟୀରେ ଅଭ୍ୟାସ କରିବ । ସେହିପରି ସନ୍ଧ୍ୟା ୫:୩୦ରୁ ୮:୩୦ ପର୍ଯ୍ୟନ୍ତ ଦକ୍ଷିଣ ଆଫ୍ରିକା ଅଭ୍ୟାସ କରିବ । ମ୍ୟାଚର ତିନି ଘଣ୍ଟା ପୂର୍ବରୁ ଦର୍ଶକଙ୍କ ପାଇଁ ଷ୍ଟାଡିଅମ ଗେଟ୍‌ ଖୋଲାଯିବ ବୋଲି ଓସିଏ ସଂପାଦକ ସାମ୍ବାଦିକ ସମ୍ମିଳନୀରେ କହିଛନ୍ତି ।

କେତେ ରହିଛି ଟିକେଟ୍‌ ଦର୍‌

ଗ୍ୟାଲେରୀ ନମ୍ବର ୧ ଓ ୩: ୧୧୦୦ ଟଙ୍କା
ଗ୍ୟାଲେରୀ ନମ୍ବର ୨ ଓ ୪: ୯୦୦ ଟଙ୍କା
ଗ୍ୟାଲେରୀ ନମ୍ବର ୫: ୧୨୦୦ ଟଙ୍କା
ଗ୍ୟାଲେରୀ ନମ୍ବର ୭: ୭୦୦ ଟଙ୍କା
କର୍ପୋରେଟର ବକ୍ସ: ୨୦ ହଜାର ଟଙ୍କା
AC ବକ୍ସ: ୮ ହଜାର ଟଙ୍କା
ସ୍ପେଶାଲ ଏନକ୍ଲୋଜର: ୬ ହଜାର ଟଙ୍କା