India vs Sri Lanka Second Test / ଆଜିଠୁ ଭାରତ-ଶ୍ରୀଲଙ୍କା ଦ୍ୱିତୀୟ ଟେଷ୍ଟ, ସିରିଜ୍‌ କ୍ଲିନ୍‌ ସୁଇପ୍‌ ଲକ୍ଷ୍ୟରେ ଟିମ୍‌ ଇଣ୍ଡିଆ

ଆଜିଠୁ ଭାରତ-ଶ୍ରୀଲଙ୍କା ଦ୍ୱିତୀୟ ଟେଷ୍ଟ । ଭାରତ ଏବଂ ଶ୍ରୀଲଙ୍କା ମଧ୍ୟରେ ଆଜିଠାରୁ ଦ୍ୱିତୀୟ ଟେଷ୍ଟ ମ୍ୟାଚ୍ ଆରମ୍ଭ ହେବାକୁ ଯାଉଛି । ୨ ମ୍ୟାଚ୍‌ ବିଶିଷ୍ଟ ଟେଷ୍ଟ ସିରିଜ୍‌ର ପ୍ରଥମ ମ୍ୟାଚ୍‌ରେ ବିଜୟଲାଭ କରି ଭାରତ ୧-୦ରେ ଆଗୁଆ ରହିଛି । ତେବେ ଆଜିଠୁ ଆରମ୍ଭ ହେଉଥିବା ଦ୍ବିତୀୟ ଟେଷ୍ଟରେ ମଧ୍ୟ ଜିତି ସିରିଜ୍‌କୁ କ୍ଲିନ୍‌ ସୁଇପ୍‌ କରିବା ଲକ୍ଷ୍ୟରେ ରହିଛି ଟିମ୍ ଇଣ୍ଡିଆ । ଯେତେବେଳେ ଶ୍ରୀଲଙ୍କା ପାଇଁ ଏହି ସିରିଜ୍‌ ବଞ୍ଚାଇବାର ଶେଷ ସୁଯୋଗ ହେବ ।

କଲମ୍ବୋରେ ହେବ ଦ୍ୱିତୀୟ ଟେଷ୍ଟ

ଭାରତ ଓ ଶ୍ରୀଲଙ୍କା ମଧ୍ୟରେ ଦ୍ୱିତୀୟ ଟେଷ୍ଟ କଲମ୍ବୋର ସିଂହଳୀ ସ୍ପୋର୍ଟ୍ସ କ୍ଲବ୍ ଗ୍ରାଉଣ୍ଡରେ ଖେଳାଯିବ। ମ୍ୟାଚ୍‌ଟି ଭାରତୀୟ ସମୟ ଅନୁସାରେ ସକାଳ ୧୦ଟାରୁ ଆରମ୍ଭ ହେବ । ପ୍ରଥମ ଟେଷ୍ଟରେ ଭାରତୀୟ ସ୍ପିନର୍‌ମାନେ ଶ୍ରୀଲଙ୍କାର ବ୍ୟାଟିଂକୁ ଖୁବ୍ ଅସୁବିଧାରେ ପକାଇଥିଲେ । ତେଣୁ କଲମ୍ବୋରେ ମଧ୍ୟ ସ୍ପିନ୍ ବୋଲିଂ ଉପରେ ସମସ୍ତଙ୍କ ନଜର ରହିବ ।

Match Day Ready 💪

📍 Colombo
⏰ 10 AM IST
💻 https://t.co/Z3MPyeKtDz
📱 Official BCCI App#TeamIndia | #SLvIND pic.twitter.com/o59IvJDMib

— BCCI (@BCCI) August 23, 2026

କେମିତି ରହିବ କଲମ୍ବୋର ପିଚ୍ ?

ସିଂହଳୀ ସ୍ପୋର୍ଟ୍ସ କ୍ଲବ୍ ଗ୍ରାଉଣ୍ଡରେ ସାଧାରଣତଃ ବ୍ୟାଟ୍ ଓ ବଲ୍ ମଧ୍ୟରେ ଭଲ ଲଢ଼େଇ ଦେଖିବାକୁ ମିଳେ । ନୂଆ ବଲ୍‌ରେ ଦ୍ରୁତ ବୋଲର୍‌ମାନେ ବ୍ୟାଟ୍ସମ୍ୟାନଙ୍କୁ ଅସୁବିଧାରେ ପକାଇପାରନ୍ତି । କିନ୍ତୁ ପିଚ୍ ପୁରୁଣା ହେବା ସହ ସ୍ପିନର୍‌ମାନେ ଅଧିକ ପ୍ରଭାବଶାଳୀ ହୋଇପାରନ୍ତି ।
ରିପୋର୍ଟ ଅନୁସାରେ, ଏଥର ଏଭଳି ପିଚ୍ ପ୍ରସ୍ତୁତ କରାଯାଇପାରେ, ଯେଉଁଠାରେ ବ୍ୟାଟ୍ସମ୍ୟାନ୍‌ ଓ ବୋଲର୍‌—ଦୁଇ ପକ୍ଷଙ୍କୁ ଭଲ ପ୍ରଦର୍ଶନ କରିବାର ସୁଯୋଗ ମିଳିବ। ତେବେ ଶ୍ରୀଲଙ୍କାର ପରିସ୍ଥିତିର ଇତିହାସକୁ ଦେଖିଲେ ଦ୍ୱିତୀୟ ଦିନ ପରେ ସ୍ପିନର୍‌ମାନେ ଅଧିକ ଭାରି ପଡ଼ିପାରନ୍ତି ।

କଲମ୍ବୋର ଏହି ମଇଦାନରେ ଭାରତ ଓ ଶ୍ରୀଲଙ୍କା ମଧ୍ୟରେ ଏପର୍ଯ୍ୟନ୍ତ ୯ଟି ଟେଷ୍ଟ ମ୍ୟାଚ୍ ଖେଳାଯାଇଛି। ଏଥିରୁ ଭାରତ ୩ଟି ମ୍ୟାଚ୍ ଜିତିଥିବା ବେଳେ ଶ୍ରୀଲଙ୍କା ୨ଟି ମ୍ୟାଚ୍‌ରେ ବିଜୟୀ ହୋଇଛି। ୪ଟି ମ୍ୟାଚ୍ ଡ୍ର ରହିଛି । ଏହି ମଇଦାନରେ ଶ୍ରୀଲଙ୍କା ଶେଷ ଥର ପାଇଁ ୨୦୦୮ ମସିହାରେ ଭାରତକୁ ଟେଷ୍ଟରେ ହରାଇଥିଲା ।
ଏହି କ୍ରିକେଟ୍‌ ଗ୍ରାଉଣ୍ଡରେ ସର୍ବାଧିକ ଟେଷ୍ଟ ସ୍କୋର ହେଉଛି ୭୫୬ ରନ୍, ଯାହା ଶ୍ରୀଲଙ୍କା ଦକ୍ଷିଣ ଆଫ୍ରିକା ବିପକ୍ଷରେ କରିଥିଲା । ସେହିପରି ସର୍ବନିମ୍ନ ସ୍କୋର ୮୧ ରନ୍, ଯାହା ଶ୍ରୀଲଙ୍କା ବିପକ୍ଷରେ ଇଂଲଣ୍ଡ କରିଥିଲା । ଏଠାରେ ସର୍ବାଧିକ ସଫଳ ରନ୍ ଚେଜ୍ ୩୨୬ ରନ୍, ଯାହା ଶ୍ରୀଲଙ୍କା ଜିମ୍ବାୱେ ବିପକ୍ଷରେ ହାସଲ କରିଥିଲା ।