India vs Zimbabwe T20 / ଜିମ୍ବାୱେ ବିପକ୍ଷରେ ଡେବ୍ୟୁ କରିପାରନ୍ତି ଏହି ୩ ଷ୍ଟାର, IPL ରେ କରିସାରିଛନ୍ତି କମାଲ

ଆଜିଠୁ ଭାରତ-ଜିମ୍ବାଓ୍ବେ ମଧ୍ୟରେ ଆରମ୍ଭ ହେବାକୁ ଯାଉଛି ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍‌ । ସମସ୍ତ ତିନୋଟି ମ୍ୟାଚ୍ ଜିମ୍ବାଓ୍ବେର ହରାରେ ସ୍ପୋର୍ଟ୍ସ କ୍ଲବରେ ଖେଳାଯିବ । ଯାହାକୁ ନେଇ ସମସ୍ତ କ୍ରିକେଟ ପ୍ରେମୀ ଉତ୍ସାହିତ ଅଛନ୍ତି । ଶ୍ରେୟସ ଆୟରଙ୍କ ଅଧିନାୟକତ୍ୱରେ ଲଗାତାର ଛଅଟି ଟି-୨୦ ମ୍ୟାଚ୍‌ ଏବଂ ଦୁଇଟି ସିରିଜ୍‌ ହାରିବା ପରେ ଟିମ୍ ଇଣ୍ଡିଆ ଏବେ ଚାପରେ ଅଛି । ଏହି ଫର୍ମାଟରେ ଭାରତକୁ ତିନିଥର ପରାସ୍ତ କରିଥିବା ଜିମ୍ବାୱେ ଘରୋଇ ପରିବେଶରେ ଏକ ବଡ଼ ବିପର୍ଯ୍ୟୟ ଆଣିବାକୁ ଚେଷ୍ଟା କରିବ । ତେବେ ନିକଟରେ ଶେଷ ହୋଇଥିବା ଇଂଲଣ୍ଡ ବିପକ୍ଷ ସିରିଜ୍‌ରେ ବୈଭବ ସୂର୍ଯ୍ୟବଂଶୀ ଡେବ୍ୟୁ କରିଥିଲେ । ଏହି ସିରିଜ୍‌ରେ ମଧ୍ୟ ୩ ଜଣ ଯୁବ ଖେଳାଳି ଅଛନ୍ତି ଯେଉଁମାନେ ଟି-୨୦ ଡେବ୍ୟୁ କରିପାରିବେ ।

ପ୍ରଭସିମରନ ସିଂହ

ୱିକେଟକିପର-ବ୍ୟାଟ୍ସମ୍ୟାନ୍ ପ୍ରଭସିମରନ ସିଂହ ଆଇପିଏଲରେ ପଞ୍ଜାବ କିଙ୍ଗ୍ସ ପାଇଁ ଚମତ୍କାର ପ୍ରଦର୍ଶନ କରିଥିଲେ । ଓପନର ଭାବରେ ଅନେକ ପ୍ରଭାବଶାଳୀ ଇନିଂସ ମଧ୍ୟ ଖେଳିଥିଲେ । ଜିମ୍ବାୱେ ବିପକ୍ଷ ଏହି ସିରିଜରେ ସଞ୍ଜୁ ସାମସନଙ୍କ ସ୍ଥାନରେ ତାଙ୍କୁ ସାମିଲ କରାଯାଇଥିଲା । ଓପନିଂ ବ୍ୟାଟିଂ ପାଇଁ ବୈଭବ ସୂର୍ଯ୍ୟବଂଶୀ ଏବଂ ଅଭିଷେକ ଶର୍ମାଙ୍କୁ ବିଚାର କରାଯାଇପାରେ । କିନ୍ତୁ ପୂର୍ବ ସିରିଜରେ ୩ଟି ମ୍ୟାଚ୍‌ରେ ଖରାପ ପ୍ରଦର୍ଶନ ପରେ ବୈଭବ ସୂର୍ଯ୍ୟବଂଶୀଙ୍କୁ ପ୍ଲେଇଂ ଇଲେଭେନରୁ ବାଦ୍ ଦିଆଯାଇଥିଲା । ଆଉ ଏବେ ପ୍ରଭସିମରନ୍ ସିଂହଙ୍କୁ ପ୍ଲେଇଂ ଇଲେଭେନ୍‌ରେ ସ୍ଥାନ ମିଳିପାରେ।

ହର୍ଷ ଦୁବେ

ଜିମ୍ବାୱେ ଗସ୍ତରେ ହର୍ଷ ଦୁବେଙ୍କ ଡେବ୍ୟୁ ପ୍ରାୟ ନିଶ୍ଚିତ । ସେ ଏହି ସିରିଜ୍‌ରେ ଏକମାତ୍ର ସ୍ପିନ୍‌ ବୋଲିଂ ଅଲରାଉଣ୍ଡର । ସେ ଆଫଗାନିସ୍ତାନ ବିପକ୍ଷ ଦିନିକିଆ ସିରିଜ୍‌ରେ ତାଙ୍କର ଦିନିକିଆ ଡେବ୍ୟୁ କରିସାରିଛନ୍ତି । ସେ ୨ଟି ମ୍ୟାଚ୍‌ରେ ୪ ୱିକେଟ୍‌ ନେଇଥିଲେ । ସେ ଆଇପିଏଲ୍‌ ୨୦୨୬ରେ ସନରାଇଜର୍ସ ହାଇଦ୍ରାବାଦ ପାଇଁ ଖେଳିଥିଲେ।

ଅଶୋକ ଶର୍ମା

ଦ୍ରୁତ ବୋଲର ଅଶୋକ ଶର୍ମା ଆଇପିଏଲ୍‌ରେ ତାଙ୍କ ଗତିରେ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲେ । ରାଜସ୍ଥାନର ଏହି ବୋଲର ଗୁଜରାଟ ଟାଇଟାନ୍ସ ପାଇଁ ଖେଳିବା ସମୟରେ ନିରନ୍ତର ୧୫୦ କିଲୋମିଟର୍‌ ଘଣ୍ଟା ବେଗରେ ବୋଲିଂ କରିଥିଲେ । ସେ ୬ ମ୍ୟାଚ୍‌ରେ ୬ ୱିକେଟ୍‌ ନେଇଥିଲେ, ତାଙ୍କ ଗତି ଚୟନକର୍ତ୍ତାଙ୍କୁ ପ୍ରଭାବିତ କରିଥିଲେ । ସେ ନିମ୍ନ କ୍ରମରେ ମଧ୍ୟ ବ୍ୟାଟିଂ କରିପାରିବେ । ତେଣୁ ଏହି ସିରିଜ୍‌ରେ ଅଶୋକ ଡେବ୍ୟୁ କରିପାରନ୍ତି ।

ଭାରତର ସମ୍ଭାବ୍ୟ ୧୧: ଅଭିଷେକ ଶର୍ମା, ବୈଭବ ସୂର୍ଯ୍ୟବଂଶୀ, ଇଶାନ କିଶନ (ୱିକେଟ୍ କିପର), ଶ୍ରେୟସ୍ ଆୟର (ଅଧିନାୟକ), ତିଲକ ବର୍ମା, ଶିବମ୍ ଦୁବେ, ରିଙ୍କୁ ସିଂ, ହର୍ଷ ଦୁବେ / ରବି ବିଶ୍ନୋଇ, ଅଶୋକ ଶର୍ମା / ମୟଙ୍କ ଯାଦବ, ୟଶ ଠାକୁର, ପ୍ରିନ୍ସ ଯାଦବ