Asian Games Gold Medal / ଭାରତକୁ ମିଳିଲା ୧୦ମ ସ୍ୱର୍ଣ୍ଣ, ତୀରନ୍ଦାଜଙ୍କ ହ୍ୟାଟ୍ରିକ୍‌ ପରେ ସୁଟର ବି ଆଣିଲେ ସ୍ବର୍ଣ୍ଣ

ଏସିଆନ୍ ଗେମ୍ସରେ ବୁଧବାର ଭାରତୀୟ କ୍ରୀଡ଼ା ଜଗତ ପାଇଁ ପାଲଟିଛି ସ୍ୱର୍ଣ୍ଣିମ ଦିନ । ଭାରତୀୟ କ୍ରୀଡ଼ାବିତ୍‌ମାନେ ଗୋଟିଏ ଦିନରେ ୪ଟି ସ୍ୱର୍ଣ୍ଣ ପଦକ ଜିତି ଦେଶର ଗୌରବ ବଢ଼ାଇଛନ୍ତି । ବିଶେଷକରି କମ୍ପାଉଣ୍ଡ ତୀରନ୍ଦାଜୀରେ ଭାରତ ଏକାଥରେ ୩ଟି ସ୍ୱର୍ଣ୍ଣ ଜିତି ଗୋଲ୍ଡ ହ୍ୟାଟ୍ରିକ୍ କରିଛି ।

ବୁଧବାର ଦିନର ଆରମ୍ଭ ହୋଇଥିଲା ମହିଳା କମ୍ପାଉଣ୍ଡ ଟିମ୍ ଇଭେଣ୍ଟରୁ । ଚିକିଥା ତନିପର୍ଥୀ, ଜ୍ୟୋତି ସୁରେଖା ଭେନ୍ନମ ଏବଂ ପ୍ରିଥିକା ପ୍ରଦୀପଙ୍କ ଭାରତୀୟ ଟିମ୍ ଚୀନକୁ ୨୩୮-୨୩୪ରେ ପରାସ୍ତ କରି ସ୍ୱର୍ଣ୍ଣ ଜିତିଥିଲା । ଫାଇନାଲରେ ଭାରତୀୟ ଟିମ୍ ଆରମ୍ଭରୁ ନିଜର ଦବଦବା ବଜାୟ ରଖିଥିଲା ।

ପ୍ରଥମ ରାଉଣ୍ଡରେ ଭାରତ ୬୦-୫୮ରେ ଆଗୁଆ ଥିବାବେଳେ ଦ୍ୱିତୀୟ ରାଉଣ୍ଡରେ ମଧ୍ୟ ସମାନ ୬୦-୫୮ ସ୍କୋର କରିଥିଲା । ତୃତୀୟ ରାଉଣ୍ଡ ଶେଷରେ ଭାରତର ଅଗ୍ରଣୀ ୧୭୮-୧୭୬ ହୋଇଥିଲା । ଶେଷ ରାଉଣ୍ଡରେ ଭାରତୀୟ ତୀରନ୍ଦାଜମାନେ ଛଅଟି ଯାକ ତୀରକୁ ୧୦ ପଏଣ୍ଟରେ ଲଗାଇ ୨୩୮ ସ୍କୋର କରିଥିଲେ । ଏହି ସ୍କୋର ସହିତ ଭାରତ ୨୦୧୪ ଏସିଆନ୍ ଗେମ୍ସରେ ଦକ୍ଷିଣ କୋରିଆ କରିଥିବା ୨୩୮ ପଏଣ୍ଟର ବିଶ୍ୱ ରେକର୍ଡର ସମକକ୍ଷ ହୋଇଥିଲା ।

ଏହାପରେ ମିକ୍ସଡ୍ ଟିମ୍ ଇଭେଣ୍ଟରେ ଚିକିଥା ତନିପର୍ଥୀ ଓ ସାହିଲ ଯାଦବଙ୍କ ଯୋଡ଼ି ଆଉ ଏକ ସ୍ୱର୍ଣ୍ଣ ଜିତିଥିଲା । ଦକ୍ଷିଣ କୋରିଆ ବିପକ୍ଷ ଫାଇନାଲ ଅତ୍ୟନ୍ତ ରୋମାଞ୍ଚକର ଥିଲା। ଭାରତୀୟ ଯୋଡ଼ି ଆରମ୍ଭରେ ୪୦-୩୯ରେ ଆଗୁଆ ରହିଥିଲେ ଏବଂ ଦ୍ୱିତୀୟ ରାଉଣ୍ଡ ପରେ ଅଗ୍ରଣୀ ଦୁଇ ପଏଣ୍ଟକୁ ବୃଦ୍ଧି ପାଇଥିଲା ।
ତୃତୀୟ ରାଉଣ୍ଡରେ ଚିକିଥାଙ୍କ ୯ ପଏଣ୍ଟର ତୀର ପରେ ଭାରତର ଅଗ୍ରଣୀ ଗୋଟିଏ ପଏଣ୍ଟକୁ ଖସିଥିଲା । ଶେଷ ରାଉଣ୍ଡରେ କୋରିଆ ପର୍ଫେକ୍ଟ ସ୍କୋର କରି ଭାରତ ଉପରେ ଚାପ ବଢ଼ାଇଥିଲା । ଭାରତକୁ ଜିତିବା ପାଇଁ ଶେଷ ଦୁଇଟି ତୀରରେ ୧୦ ଆବଶ୍ୟକ ଥିଲା । ଚିକିଥା ୯ ପଏଣ୍ଟର ତୀର ମାରିଥିଲେ ମଧ୍ୟ ସାହିଲ ଚାପ ମଧ୍ୟରେ ୧୦ ପଏଣ୍ଟ ହାସଲ କରି ସ୍କୋର ସମାନ କରିଦେଇଥିଲେ ।

ଏହାପରେ ମୁକାବିଲା ଶୁଟ୍-ଅଫ୍‌କୁ ଯାଇଥିଲା । ଶୁଟ୍-ଅଫ୍‌ରେ ଚିକିଥା ଓ ସାହିଲ ଉଭୟ ୧୦-୧୦ ସ୍କୋର କରିଥିଲେ । କୋରିଆର ଚୋଇ ଉନ୍ ଗ୍ୟୁ ୯ ପଏଣ୍ଟରେ ଅଟକିଯିବାରୁ ଭାରତ ୧୫୮-୧୫୭ରେ ବିଜୟୀ ହୋଇ ସ୍ୱର୍ଣ୍ଣ ଜିତିଥିଲା । ଏହି ବିଜୟ ସହ ଚିକିଥା ଗୋଟିଏ ଦିନରେ ଦୁଇଟି ସ୍ୱର୍ଣ୍ଣ ପଦକ ଜିତିବାର ଗୌରବ ହାସଲ କରିଥିଲେ ।

କମ୍ପାଉଣ୍ଡ ତୀରନ୍ଦାଜୀର ପୁରୁଷ ଟିମ୍ ଇଭେଣ୍ଟରେ ମଧ୍ୟ ଭାରତ ସ୍ୱର୍ଣ୍ଣ ଜିତିଥିଲା । କୁଶଳ ଦଲାଲ, ସାହିଲ ଯାଦବ ଏବଂ ଗଣେଶ ମଣି ରତ୍ନମ ଥିରୁମୁରୁଙ୍କ ୩ ଜଣିଆ ଟିମ୍ ଫାଇନାଲରେ ଚୀନକୁ ୨୩୮-୨୩୭ରେ ପରାସ୍ତ କରିଥିଲା । ମ୍ୟାଚ୍‌ର ଗୋଟିଏ ସମୟରେ ଭାରତ ଦୁଇ ପଏଣ୍ଟ ପଛରେ ଥିଲା । କିନ୍ତୁ ଶେଷ ରାଉଣ୍ଡରେ ଭାରତୀୟ ତୀରନ୍ଦାଜମାନେ ଅସାଧାରଣ ସଂଯମ ଦେଖାଇ ଜୋରଦାର ପ୍ରତ୍ୟାବର୍ତ୍ତନ କରିଥିଲେ । ମାତ୍ର ଗୋଟିଏ ପଏଣ୍ଟରେ ଚୀନକୁ ପଛରେ ପକାଇ ଭାରତ ସ୍ୱର୍ଣ୍ଣ ନିଜ ନାମରେ କରିଥିଲା ।

ତୀରନ୍ଦାଜୀର ଏହି ତିନିଟି ସ୍ୱର୍ଣ୍ଣ ପରେ ସୁଟିଂରେ ମଧ୍ୟ ଭାରତ ଆଉ ଏକ ସ୍ୱର୍ଣ୍ଣ ଜିତିଥିଲା । ମିକ୍ସଡ୍‌ ଟ୍ରାପ୍ ଟିମ୍ ଇଭେଣ୍ଟରେ ନୀରୁ ଧାଣ୍ଡା ଓ କିନ୍ନାନ ଚେନାଇଙ୍କ ଯୋଡ଼ି ଫାଇନାଲରେ ୩୪ ସ୍କୋର କରି ସ୍ୱର୍ଣ୍ଣ ପଦକ ଜିତିଥିଲା । କ୍ୱାଲିଫିକେସନରେ ଚତୁର୍ଥ ସ୍ଥାନରେ ଥିବା ଭାରତୀୟ ଯୋଡ଼ି ଫାଇନାଲରେ ଚମତ୍କାର ପ୍ରତ୍ୟାବର୍ତ୍ତନ କରିଥିଲେ।
ନୀରୁ ଧାଣ୍ଡାଙ୍କ ପାଇଁ ମଧ୍ୟ ବୁଧବାର ଦିନଟି ବିଶେଷ ରହିଥିଲା । ବ୍ୟକ୍ତିଗତ ଟ୍ରାପ୍‌ରେ ସ୍ୱର୍ଣ୍ଣ ଜିତିବା ପରେ ସେ ମିକ୍ସଡ୍ ଟିମ୍‌ରେ ମଧ୍ୟ ସ୍ୱର୍ଣ୍ଣ ହାସଲ କରିଥିଲେ ।
ଏହିପରି ଭାବେ ବୁଧବାର ଭାରତର ପଦକ ତାଲିକାରେ ଯୋଡ଼ି ହୋଇଥିଲା ୪ଟି ସ୍ୱର୍ଣ୍ଣ ପଦକ । କମ୍ପାଉଣ୍ଡ ତୀରନ୍ଦାଜୀରେ ଗୋଲ୍ଡ ହ୍ୟାଟ୍ରିକ୍ ଏବଂ ସୁଟିଂରେ ଏସିଆନ୍ ରେକର୍ଡ ସହ ସ୍ୱର୍ଣ୍ଣ ଭାରତୀୟ ଦଳର ଅଭିଯାନକୁ ଆହୁରି ମଜବୁତ କରିଛି । ଏହି ସଫଳତା ସହ ଏସିଆନ୍ ଗେମ୍ସରେ ଭାରତର ମୋଟ ସ୍ୱର୍ଣ୍ଣ ପଦକ ସଂଖ୍ୟା ୧୦ରେ ପହଞ୍ଚିଛି ।