Pratika Rawal Wheelchair Entry / ବିଶ୍ବକପ୍ ଜିତିଲା ଭାରତ, ହ୍ବିଲ୍ ଚେୟାରରେ ପଡ଼ିଆକୁ ଆସିଲେ ଷ୍ଟାର ବ୍ୟାଟ୍ସମ୍ୟାନ୍

ଇତିହାସ ରଚିଲେ ଭାରତୀୟ ନାରୀ । ୫୨ ବର୍ଷ ପରେ ଜିତିଲେ ବିଶ୍ବକପ୍‌ ଟ୍ରଫି । ଆଇସିସି ମହିଳା ଦିନିକିଆ ବିଶ୍ବକପ୍‌ରେ ପ୍ରଥମ ଥର ପାଇଁ ଟାଇଟଲ୍ ଜିତିଛି ଟିମ୍ ଇଣ୍ଡିଆ । ନଭି ମୁମ୍ବାଇର DY ପାଟିଲ ଷ୍ଟାଡିୟମରେ ଖେଳାଯାଇଥିବା ଫାଇନାଲ ମ୍ୟାଚ୍‌ରେ ଦକ୍ଷିଣ ଆଫ୍ରିକାକୁ ୫୨ ରନ୍‌ରେ ପରାସ୍ତ କରିଛି । ତେବେ ବିଶ୍ବ ବିଜୟୀ ହେବା ପରେ ସାରା ଦେଶରେ ଖୁସିର ମାହୋଲ ଚାଲିଥିବା ବେଳେ ଷ୍ଟାଡିୟମରେ ଏମିତି ଏକ ଦୃଶ୍ୟ ଦେଖିବାକୁ ମିଳିଥିଲା ଯାହା କ୍ରିକେଟ୍‌ ପ୍ରେମୀଙ୍କୁ ଏତେ ଖୁସି ଭିତରେ ଟିକେ ନିରାଶା ଦେଇଥିଲା । ଭାରତର ଐତିହାସିକ ବିଜୟ ପରେ ଟିମ୍ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ୍‌ ପ୍ରତୀକା ରାଓ୍ବଲ ହ୍ବିଲଚେୟାରରେ ପଡ଼ିଆ ମଧ୍ୟକୁ ଆସିଥିଲେ ଏବଂ ଦଳ ସହିତ ବିଜୟ ଉତ୍ସବ ପାଳନ କରିଥିଲେ ।

ପ୍ରତୀକା ରାୱଲ ଭାରତୀୟ ଦଳର ବିଶ୍ୱକପ୍ ଦଳ ପାଇଁ ପ୍ରଥମ ପସନ୍ଦ ଥିଲେ । ତାଙ୍କୁ ଓପନିଂ ବ୍ୟାଟସମ୍ୟାନ୍ ଭାବରେ ସାମିଲ କରାଯାଇଥିଲା । ସେ ସ୍ମୃତି ମନ୍ଧନାଙ୍କ ସହ ଦମଦାର ଓପନିଂ ପାର୍ଟନରସିପ୍‌ କରୁଥିଲେ । କିନ୍ତୁ ଦୁର୍ଭାଗ୍ୟବଶତଃ ଶେଷ ଲିଗ୍‌ ମ୍ୟାଚ୍‌ରେ ସେ ଗୁରୁତର ଭାବେ ଆହାତ ହୋଇଥିଲେ । ଯାହାଫଳରେ ସେ ବିଶ୍ବକପ୍‌ର ସେମିଫାଇନାଲ ଓ ଫାଇନାଲ ମ୍ୟାଚ୍‌ରୁ ବାଦ୍ ପଡ଼ିଥିଲେ । ପ୍ରତୀକା ଏହି ବିଶ୍ୱକପରେ ଚମତ୍କାର ଖେଳିଥିଲେ, କିନ୍ତୁ ଆଘାତ କାରଣରୁ ତାଙ୍କୁ ବିଶ୍ବକପ୍‌ ଅଧାରୁ ଦଳ ଛାଡ଼ିବାକୁ ବାଧ୍ୟ କରିଥିଲା ।


ପ୍ରତୀକାଙ୍କ ଆଘାତ ଯୋଗୁଁ ଶେଫାଲି ବର୍ମାଙ୍କୁ ଦଳରେ ସାମିଲ କରାଯାଇଥିଲା । ଅଷ୍ଟ୍ରେଲିଆ ବିପକ୍ଷ ସେମିଫାଇନାଲରେ ଶେଫାଳି ଭଲ ପ୍ରଦର୍ଶନ କରିପାରି ନଥିଲେ । ଅଷ୍ଟ୍ରେଲିଆ ବିପକ୍ଷ ମ୍ୟାଚ୍‌ରେ ମାତ୍ର ୧୦ ରନ୍‌ କରିଥିଲେ । ତଥାପି, ସେ ଫାଇନାଲରେ ଚମତ୍କାର ପ୍ରଦର୍ଶନ କରିଥିଲେ। ଶେଫାଳୀ ବ୍ୟାଟିଂ କରି ୮୭ ରନ୍‌ର ଗୁରୁତ୍ବପୂର୍ଣ୍ଣ ଇନିଂସ ଖେଳିଥିବା ବେଳେ ବୋଲିଂ କରି ଦୁଇଟି ଓ୍ବିକେଟ ଅକ୍ତିଆର କରିଥିଲେ । ଶେଫାଳୀଙ୍କ ଏହି ଅଲରାଉଣ୍ଡ ପ୍ରଦର୍ଶନ ଫଳରେ ଭାରତ ପ୍ରଥମ ଥର ପାଇଁ ବିଶ୍ବବିଜୟୀ ହୋଇଥିଲା ।

ସେପଟେ ହ୍ୱିଲଚେୟାରରେ ପଡ଼ିଆକୁ ଆସିଥିବା ପ୍ରତୀକା ରାୱଲ ବିଜୟ ପରେ କହିଛନ୍ତି, 'ମୁଁ ଏହାକୁ ବର୍ଣ୍ଣନା କରିପାରୁନାହିଁ । ମୋ ପାଖରେ ଶବ୍ଦ ନାହିଁ । ଆଘାତ ଖେଳର ଏକ ଅଂଶ । ମୁଁ ବହୁତ ଖୁସି ଯେ ମୁଁ ଏବେ ବି ଏହି ଦଳର ଏକ ଅଂଶ । ମୁଁ ଏହି ଦଳକୁ ଭଲ ପାଏ । ମୁଁ ଏବେ କ'ଣ ଅନୁଭବ କରୁଛି ତାହା ମୁଁ ବର୍ଣ୍ଣନା କରିପାରିବି ନାହିଁ । ଆମେ ପ୍ରକୃତରେ ଏହା କରିଛୁ ! ଆମେ ବିଶ୍ୱକପ୍ ଜିତିଥିବା ପ୍ରଥମ ଭାରତୀୟ ଦଳ । ସତ କହିବାକୁ ଗଲେ, ପଡ଼ିଆରେ ଖେଳିବା ଅପେକ୍ଷା ଷ୍ଟାଣ୍ଡରେ ବସି ଖେଳ ଦେଖିବା ବହୁତ କଷ୍ଟକର ଥିଲା' ।

ଅଧିକ ପଢ଼ନ୍ତୁ: ଭାରତର ବିଜୟ ପରେ ରୋହିତ,କୋହଲି ଭାବପ୍ରବଣ ହୋଇ କହିଲେ...

ସୂଚନା ଅନୁସାରେ, ଭାରତୀୟ ମହିଳା ଦଳ ସେପ୍ଟେମ୍ବର ୩୦ ତାରିଖରେ ଏହାର ଅଭିଯାନ ଆରମ୍ଭ କରିଥିଲା। ଭାରତୀୟ ଦଳ ଶ୍ରୀଲଙ୍କା ବିପକ୍ଷରେ ମ୍ୟାଚ୍ ଜିତିଥିଲା । ଭାରତର ଦ୍ୱିତୀୟ ମ୍ୟାଚ୍ ଅକ୍ଟୋବର ୫ ତାରିଖରେ ପାକିସ୍ତାନ ବିପକ୍ଷରେ ଥିଲା। ଏହି ମ୍ୟାଚରେ ଭାରତୀୟ ମହିଳା ଦଳ ପାକିସ୍ତାନକୁ ଏକତରଫା ଭାବରେ ପରାସ୍ତ କରିଥିଲା।

ଏହା ପରେ, ଭାରତୀୟ ଦଳର ହ୍ୟାଟ୍ରିକ୍‌ ପରାଜୟ ହୋଇଥିଲା । ଅକ୍ଟୋବର ୯ ତାରିଖରେ ଭାରତ ଦକ୍ଷିଣ ଆଫ୍ରିକାଠାରୁ ପ୍ରଥମ ପରାଜୟ ବରଣ କରିଥିଲା । ତା' ପରେ ଭାରତ ଅଷ୍ଟ୍ରେଲିଆଠାରୁ ପରାସ୍ତ ହୋଇଥିଲା । ତା'ପରେ ଅକ୍ଟୋବର ୧୯ ତାରିଖରେ ଇଂଲଣ୍ଡ ବିପକ୍ଷରେ ଖେଳାଯାଇଥିବା ମ୍ୟାଚରେ ଭାରତ ମଧ୍ୟ ପରାଜୟ ଶିକାର ହୋଇଥିଲା ।

କ୍ରମାଗତ ତିନୋଟି ପରାଜୟ ପରେ ଏହା ମନେ ହେଉଥିଲା ଯେ ଭାରତର ସେମିଫାଇନାଲ୍ ପହଞ୍ଚିବା ସମ୍ଭାବନା କଷ୍ଟକର ହେବ । କିନ୍ତୁ ନ୍ୟୁଜିଲାଣ୍ଡ ବିପକ୍ଷରେ କର ବା ମର ମ୍ୟାଚ୍‌ରେ ଭାରତ ଦମଦାର ବିଜୟ ହାସଲ କରି ସେମିଫାଇନାଲରେ ସ୍ଥାନ ପକ୍କା କରିଥିଲା । ଆଉ ତା'ପରେ ସେମିଫାଇନାଲ ଓ ଫାଇନାଲରେ ଯାହା ହେଲା ତାହା ଇତିହାସ ପାଲଟି ଯାଇଛି ।