India Archery Gold Medal / ତୀରନ୍ଦାଜୀରେ ଭାରତର ଦବଦବା, ଚୀନ୍‌କୁ ହରାଇ ସ୍ୱର୍ଣ୍ଣ ହାତେଇଲା ଟିମ୍ ଇଣ୍ଡିଆ

ଏସିଆନ୍‌ ଗେମ୍ସରେ ଭାରତକୁ ଆଉ ଏକ ସ୍ବର୍ଣ୍ଣ । ମହିଳା ତୀରନ୍ଦାଜ ଟିମ୍‌କୁ ସ୍ବର୍ଣ୍ଣ । ମହିଳା କମ୍ପାଉଣ୍ଡ ତୀରନ୍ଦାଜ ଟିମ୍‌ ଜିତିଲେ ସ୍ବର୍ଣ୍ଣ । ବିଶ୍ବ ରେକର୍ଡ ସହ ହାସଲ କଲେ ସ୍ବର୍ଣ୍ଣ ପଦକ । ମହିଳା କମ୍ପାଉଣ୍ଡ ଇଭେଣ୍ଟର ଫାଇନାଲ୍‌ରେ ଭାରତ ଚୀନ୍‌କୁ ୨୩୮-୨୩୪ରେ ପରାସ୍ତ କରି ଇତିହାସ ରଚିଛି । ଏହି ବିଜୟ ସହ ଏସିଆନ୍ ଗେମ୍ସ ୨୦୨୬ରେ ଭାରତର ସ୍ୱର୍ଣ୍ଣ ପଦକ ସଂଖ୍ୟା ୭ରେ ପହଞ୍ଚିଛି ।

ଭାରତ ପାଇଁ ଚିକିତା ତନିପାର୍ଥୀ, ପୃଥିକା ପ୍ରଦୀପ ଏବଂ ଜ୍ୟୋତି ସୁରେଖା ଭେନ୍ନମ ଏହି ଐତିହାସିକ ବିଜୟ ଆଣିଛନ୍ତି। ଫାଇନାଲ୍‌ରେ ଭାରତୀୟ ତୀରନ୍ଦାଜମାନେ ଆରମ୍ଭରୁ ହିଁ ଚୀନ୍‌ ଉପରେ ଚାପ ବଜାୟ ରଖିଥିଲେ ।

ସେମିଫାଇନାଲ୍‌ରେ ଦକ୍ଷିଣ କୋରିଆକୁ ହରାଇଥିଲା ଭାରତ

ଫାଇନାଲ୍‌ ପୂର୍ବରୁ ଭାରତୀୟ ଦଳ ସେମିଫାଇନାଲ୍‌ରେ ଶକ୍ତିଶାଳୀ ଦକ୍ଷିଣ କୋରିଆକୁ ୨୩୪-୨୩୩ରେ ପରାସ୍ତ କରିଥିଲା । ଏହା ପରେ ଫାଇନାଲ୍‌ରେ ଚୀନ୍‌କୁ ଭେଟିଥିଲା ଭାରତ । ଫାଇନାଲ୍‌ର ପ୍ରଥମ ରାଉଣ୍ଡରେ ଭାରତ ୬୦-୫୭ରେ ଆଗୁଆ ରହିଥିଲା । ଦ୍ୱିତୀୟ ରାଉଣ୍ଡରେ ମଧ୍ୟ ଭାରତୀୟ ଦଳ ନିଜର ୩ ପଏଣ୍ଟ୍‌ର ଅଗ୍ରଣୀ ବଜାୟ ରଖିଥିଲା ।

ତେବେ ତୃତୀୟ ରାଉଣ୍ଡରେ ଚୀନ୍‌ ପ୍ରତ୍ୟାବର୍ତ୍ତନ ପାଇଁ ଜୋରଦାର ପ୍ରୟାସ କରିଥିଲା । ଚୀନ୍‌ର ଖେଳାଳିମାନେ ଲଗାତାର ତିନିଥର ୧୦ ପଏଣ୍ଟ୍‌ ହାସଲ କରିଥିଲେ । ତେବେ ଭାରତୀୟ ଦଳ ମଧ୍ୟ ଦମଦାର ଭାବେ ପ୍ରତ୍ୟାବର୍ତ୍ତନ କରି ୧୭୮-୧୭୫ରେ ଅଗ୍ରଣୀ ହୋଇଥିଲା ।

ଶେଷ ରାଉଣ୍ଡରେ ଭାରତର ଦବଦବା

ଚତୁର୍ଥ ତଥା ଶେଷ ରାଉଣ୍ଡରେ ଭାରତକୁ କେବଳ ନିଜର ଅଗ୍ରଣୀ ବଜାୟ ରଖିବାର ଆବଶ୍ୟକତା ଥିଲା । ଚୀନ୍‌ ୧୦, ୯, ୯, ୧୦, ୧୦ ଓ ୧୦ ପଏଣ୍ଟ୍‌ ହାସଲ କରିଥିଲା । କିନ୍ତୁ ଭାରତୀୟ ତୀରନ୍ଦାଜମାନେ ଚାପରେ ମଧ୍ୟ ଚମତ୍କାର ପ୍ରଦର୍ଶନ କରି ଲଗାତାର ୬ଟି ତୀରକୁ ୧୦ ପଏଣ୍ଟ୍‌ର ମାର୍କରେ ଲକ୍ଷ୍ୟଭେଦ କରିଥିଲେ । ଶେଷରେ ଭାରତ ୨୩୮-୨୩୪ରେ ଚୀନ୍‌କୁ ପରାସ୍ତ କରି ସ୍ୱର୍ଣ୍ଣ ପଦକ ନିଜ ନାମରେ କରିଥିଲା ।

୧୨ ବର୍ଷ ପରେ ରେକର୍ଡର ସମକକ୍ଷ

ଏହି ବିଜୟ ସହ ଭାରତୀୟ ମହିଳା ଦଳ ଆଉ ଏକ ବଡ଼ ସଫଳତା ହାସଲ କରିଛି । ୨୦୧୪ ଏସିଆନ୍ ଗେମ୍ସରେ ଦକ୍ଷିଣ କୋରିଆ ମହିଳା କମ୍ପାଉଣ୍ଡ ଟିମ୍ ଇଭେଣ୍ଟରେ ୨୪୦ରୁ ୨୩୮ ପଏଣ୍ଟ୍‌ ହାସଲ କରି ରେକର୍ଡ କରିଥିଲା । ସେତେବେଳେ ଦଳର ମାତ୍ର ଦୁଇଟି ଶଟ୍‌ ୧୦ ପଏଣ୍ଟ୍‌ରୁ ବାହାରକୁ ଯାଇଥିଲା । ଏବେ ୧୨ ବର୍ଷ ପରେ ଚିକିତା ତନିପାର୍ଥୀ, ପୃଥିକା ପ୍ରଦୀପ ଏବଂ ଜ୍ୟୋତି ସୁରେଖା ଭେନ୍ନମ୍‌ ମଧ୍ୟ ୨୪୦ରୁ ୨୩୮ ପଏଣ୍ଟ୍‌ ହାସଲ କରି ସେହି ରେକର୍ଡର ସମକକ୍ଷ ହୋଇଛନ୍ତି । ଭାରତୀୟ ଦଳ ମଧ୍ୟ ମାତ୍ର ଦୁଇଟି ଶଟ୍‌ରେ ୧୦ ପଏଣ୍ଟ୍‌ ହାସଲ କରିପାରିନଥିଲା ।

ଭାରତୀୟ ମହିଳା ତୀରନ୍ଦାଜଙ୍କ ଏହି ପ୍ରଦର୍ଶନ ଏସିଆନ୍ ଗେମ୍ସରେ ଭାରତର ପଦକ ଅଭିଯାନକୁ ଆହୁରି ମଜବୁତ କରିଛି। ଚିକିତା, ପୃଥିକା ଓ ଜ୍ୟୋତିଙ୍କ ଏହି ସଫଳତା ଆଗାମୀ ପିଢ଼ିର ତୀରନ୍ଦାଜଙ୍କ ପାଇଁ ମଧ୍ୟ ଏକ ନୂଆ ଉଦାହରଣ ସୃଷ୍ଟି କରିଛି ।