Historic Gold Medal / ୭୫ ବର୍ଷରେ ପ୍ରଥମଥର...ଚାମ୍ପିଅନ୍ ଦକ୍ଷିଣ କୋରିଆକୁ ହରାଇ ଭାରତ ଜିତିଲା ସ୍ୱର୍ଣ୍ଣ

ସାମ୍ନାରେ ଥିଲା ଏସିଆର ଶକ୍ତିଶାଳୀ ଦକ୍ଷିଣ କୋରିଆ । ଆଉ ମ୍ୟାଚ୍‌ର ପ୍ରତିଟି ଶଟ୍‌ରେ ଥିଲା ରୋମାଞ୍ଚ ଓ ଚାପ । କିନ୍ତୁ ଶେଷ ମୁହୂର୍ତ୍ତରେ ଭାରତୀୟ ତୀରନ୍ଦାଜମାନେ ଦେଖାଇଲେ ଦମଦାର ପ୍ରଦର୍ଶନ । କୀର୍ତ୍ତି, କୁମକୁମ ଓ ଅଙ୍କିତାଙ୍କ ତୀର ଲକ୍ଷ୍ୟଭେଦ କରି ଭାରତକୁ ଦେଲା ଐତିହାସିକ ସ୍ୱର୍ଣ୍ଣ । ୫-୩ରେ ଦକ୍ଷିଣ କୋରିଆକୁ ହରାଇ ଏସିଆନ୍ ଗେମ୍ସର ୭୫ ବର୍ଷର ଇତିହାସରେ ପ୍ରଥମଥର ମହିଳା ରିକର୍ଭ ଟିମ୍ ଜିତିଲା ସ୍ୱର୍ଣ୍ଣ ।

୨୦୨୬ ଏସିଆନ୍ ଗେମ୍ସରେ ଭାରତ ଜିତିଛି ୧୧ତମ ସ୍ୱର୍ଣ୍ଣ ପଦକ । ତୀରନ୍ଦାଜିରେ ଭାରତୀୟ ମହିଳା ରିକର୍ଭ ଟିମ୍ ଦକ୍ଷିଣ କୋରିଆକୁ ୫-୩ରେ ପରାସ୍ତ କରି ଐତିହାସିକ ସଫଳତା ହାସଲ କରିଛି । ଭାରତର କୀର୍ତ୍ତି, କୁମକୁମ ଏବଂ ଅଙ୍କିତା କଠିନ ପରିସ୍ଥିତିରେ ଚମତ୍କାର ପ୍ରଦର୍ଶନ କରି ଦେଶ ପାଇଁ ଏହି ସ୍ୱର୍ଣ୍ଣ ଜିତିଛନ୍ତି । ଏହା ସହ ଏସିଆନ୍ ଗେମ୍ସର ୭୫ ବର୍ଷର ଇତିହାସରେ ପ୍ରଥମ ଥର ପାଇଁ ଭାରତୀୟ ମହିଳା ରିକର୍ଭ ଟିମ୍ ଏହି ଇଭେଣ୍ଟରେ ସ୍ୱର୍ଣ୍ଣ ପଦକ ଜିତିଛି ।

ଆରମ୍ଭରୁ ହୋଇଥିଲା କଡ଼ା ମୁକାବିଲା

ଫାଇନାଲ୍ ମ୍ୟାଚ୍ ଆରମ୍ଭରୁ ହିଁ ଭାରତ ଓ ଦକ୍ଷିଣ କୋରିଆ ମଧ୍ୟରେ ଜୋରଦାର ଲଢ଼େଇ ଦେଖିବାକୁ ମିଳିଥିଲା । ପରିସ୍ଥିତି ଅନୁକୂଳ ନଥିବାରୁ ଉଭୟ ଦଳର ଖେଳାଳିଙ୍କ ପାଇଁ ପରଫେକ୍ଟ ୧୦ ସ୍କୋର କରିବା କଷ୍ଟକର ହୋଇଥିଲା । ମ୍ୟାଚ୍‌ରେ ଉଭୟ ଦଳ ମିଶି ମୋଟ ୪୮ଟି ଶଟ୍ ନେଇଥିଲେ । କିନ୍ତୁ ଏଥିରୁ ମାତ୍ର ୧୨ ଥର ୧୦ ପଏଣ୍ଟ ସ୍କୋର ହୋଇଥିଲା । କଠିନ ପରିସ୍ଥିତିରେ ୭ ଓ ୮ ପଏଣ୍ଟର ଶଟ୍ ମଧ୍ୟ ଦେଖିବାକୁ ମିଳିଥିଲା ।

ପ୍ରଥମ ସେଟ୍‌ରେ ଭାରତ ଓ ଦକ୍ଷିଣ କୋରିଆ ୫୪-୫୪ରେ ସମାନ ଥିଲେ । ଦ୍ୱିତୀୟ ସେଟ୍‌ରେ ମଧ୍ୟ ଉଭୟ ଦଳ ୫୬-୫୬ରେ ସେଟ୍ ଶେଷ କରିଥିଲେ । କିନ୍ତୁ ତୃତୀୟ ସେଟ୍‌ରେ ଭାରତ ଚମତ୍କାର ପ୍ରଦର୍ଶନ କରି ୫୫-୫୧ରେ ସେଟ୍ ଜିତିଥିଲା । ଏହା ସହ ଭାରତ ୪-୨ରେ ଆଗୁଆ ହୋଇଯାଇଥିଲା ।

ଶେଷ ଶଟ୍‌ରେ କୁମକୁମଙ୍କ ଚମତ୍କାର

ଶେଷ ସେଟ୍‌ରେ ଭାରତକୁ ଅତିକମ୍‌ରେ ଡ୍ର’ ଆବଶ୍ୟକ ଥିଲା । ସମସ୍ତଙ୍କ ନଜର ଥିଲା କୁମକୁମଙ୍କ ଉପରେ । ଶେଷ ଶଟ୍‌ରେ ଭାରତ ପାଇଁ ୧୦ ପଏଣ୍ଟ ଆବଶ୍ୟକ ଥିଲା । କୁମକୁମ୍‌ ଚାପ ମଧ୍ୟରେ ଚମତ୍କାର ଭାବେ ୧୦ ପଏଣ୍ଟ ହାସଲ କରିଥିଲେ । ତାଙ୍କ ଏହି ଶଟ୍ ଭାରତର ବିଜୟକୁ ନିଶ୍ଚିତ କରିଥିଲା ଏବଂ ଟିମ୍ ଇଣ୍ଡିଆ ୫-୩ରେ ମ୍ୟାଚ୍ ଜିତି ସ୍ୱର୍ଣ୍ଣ ପଦକ ନିଜ ନାମରେ କରିଥିଲା ।

ଦକ୍ଷିଣ କୋରିଆକୁ ହରାଇ ଇତିହାସ ରଚିଲା ଭାରତ

ତୀରନ୍ଦାଜିରେ ଦକ୍ଷିଣ କୋରିଆକୁ ଏକ ଶକ୍ତିଶାଳୀ ଦଳ ଭାବେ ଗଣାଯାଏ । ଏହି କ୍ରୀଡ଼ାରେ ଦକ୍ଷିଣ କୋରିଆ ଦୀର୍ଘଦିନ ଧରି ପ୍ରଭାବଶାଳୀ ପ୍ରଦର୍ଶନ କରିଆସିଛି । ମହିଳା ରିକର୍ଭ ତୀରନ୍ଦାଜିରେ ମଧ୍ୟ ଦଳର ଦୀର୍ଘ ସଫଳତା ରହିଛି । କିନ୍ତୁ କୀର୍ତ୍ତି, କୁମକୁମ ଏବଂ ଅଙ୍କିତାଙ୍କ ଚମତ୍କାର ପ୍ରଦର୍ଶନ ଭାରତକୁ ଏହି ଐତିହାସିକ ସ୍ୱର୍ଣ୍ଣ ଦେଇଛି ।

ତୀରନ୍ଦାଜିରେ ଭାରତର ଚତୁର୍ଥ ସ୍ୱର୍ଣ୍ଣ

୨୦୨୬ ଏସିଆନ୍ ଗେମ୍ସରେ ତୀରନ୍ଦାଜିରୁ ଭାରତର ଏହା ଚତୁର୍ଥ ସ୍ୱର୍ଣ୍ଣ ପଦକ । ଏହା ପୂର୍ବରୁ ମହିଳା ଟିମ୍ କମ୍ପାଉଣ୍ଡ, ମିକ୍ସଡ୍ ଟିମ୍ କମ୍ପାଉଣ୍ଡ ଏବଂ ପୁରୁଷ ଟିମ୍ କମ୍ପାଉଣ୍ଡରେ ଭାରତ ସ୍ୱର୍ଣ୍ଣ ଜିତିଥିଲା । ଏହି ସ୍ୱର୍ଣ୍ଣ ସହ ୨୦୨୬ ଏସିଆନ୍ ଗେମ୍ସରେ ଭାରତର ମୋଟ ପଦକ ସଂଖ୍ୟା ୬୭ରେ ପହଞ୍ଚିଛି ।