Longest Playing IPL Cricketers / ଆଜିର ଦିନରେ ଆରମ୍ଭ ହୋଇଥିଲା IPL, ୨୦୦୮ରୁ ଏପର୍ଯ୍ୟନ୍ତ ଖେଳୁଛନ୍ତି ଏହି ୪ ଖେଳାଳି

୧୮ ଏପ୍ରିଲ୍‌ ୨୦୦୮ । ଏହି ଦିନଟି ପ୍ରତ୍ୟେକ କ୍ରିକେଟ୍ ପ୍ରେମୀଙ୍କ ପାଇଁ ଏକ ସ୍ମରଣୀୟ ଦିନ । କାହିଁକି ନା ଏହି ଦିନ ହିଁ ଆରମ୍ଭ ହୋଇଥିଲା ଫଟାଫଟ୍‌ କ୍ରିକେଟ୍‌ର ମହାକୁମ୍ଭ ଇଣ୍ଡିଆନ୍‌ ପ୍ରିମିୟର ଲିଗ୍‌ (IPL)। ଆଉ ୧୮ ବର୍ଷ ପୂର୍ବେ ଆରମ୍ଭ ହୋଇଥିବା ଏହି ଟି-୨୦ ଟୁର୍ଣ୍ଣାମେଣ୍ଟ ଯେ କ୍ରିକେଟ ଦୁନିଆକୁ ପୂରା ପରିବର୍ତ୍ତନ କରିଦେବ କେହି ଭାବି ନଥିଲେ ।

ତେବେ ଆଇପିଏଲର ପ୍ରଥମ ମ୍ୟାଚ୍‌ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଓ କୋଲକାତା ନାଇଟ୍‌ ରାଇଡର୍ସ ମଧ୍ୟରେ ଖେଳାଯାଇଥିଲା । ଆଉ IPl ର ପ୍ରଥମ ବଲ୍‌ ଖେଳିଥିଲେ ସୌରଭ ଗାଙ୍ଗୁଲି । ପ୍ରବୀଣ କୁମାର ଥିଲେ ଲିଗ୍‌ର ପ୍ରଥମ ବଲ୍ ପକାଇଥିବା ବୋଲର । ଏବେ ୨୦୨୬ରେ ଆଇପିଏଲର ୧୯ତମ ସିଜିନ୍ ଖେଳାଯାଉଛି । ଏହି ସିଜିନ୍‌ରେ ଏମିତି କିଛି ଖେଳାଳି ଅଛନ୍ତି, ଯେଉଁମାନେ ଇଣ୍ଡିଆନ୍‌ ପ୍ରିମିୟର ଲିଗ୍‌ର ପ୍ରଥମ ସିଜିନ୍‌ରୁ ଖେଳୁଛନ୍ତି । ଆସନ୍ତୁ ଜାଣିବା କେଉଁମାନେ ସେହି ଖେଳାଳି...

ମହେନ୍ଦ୍ର ସିଂ ଧୋନି - ଏମ୍ଏସ୍ ଧୋନି ଆଇପିଏଲର ପ୍ରତ୍ୟେକ ସିଜିନରେ ଖେଳିଛନ୍ତି । ଯଦିଓ ସେ ଆଘାତ ଯୋଗୁଁ ଆଇପିଏଲ ୨୦୨୬ରେ ଗୋଟିଏ ବି ମ୍ୟାଚ୍ ଖେଳି ନାହାଁନ୍ତି, ତଥାପି ସେ CSK ର ଜଣେ ସକ୍ରିୟ ଖେଳାଳି । ସେ ତାଙ୍କ ୨୭୮ ମ୍ୟାଚ୍‌ର ଆଇପିଏଲ କ୍ୟାରିୟରରେ ୫,୪୩୯ ରନ୍ କରିଛନ୍ତି ।

ବିରାଟ କୋହଲି - ବିରାଟ କୋହଲି ଏକମାତ୍ର ଖେଳାଳି ଯିଏ ସବୁବେଳେ ଆଇପିଏଲରେ ସମାନ ଦଳ ପାଇଁ ଖେଳିଛନ୍ତି । ସେ ୨୦୦୮ ମସିହାରୁ ହିଁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଖେଳୁଛନ୍ତି । ବିରାଟ ତାଙ୍କ ୨୭୩ ମ୍ୟାଚ୍‌ର ଆଇପିଏଲ କ୍ୟାରିୟରରେ ୮,୯୦୭ ରନ୍ କରିଛନ୍ତି । ତାଙ୍କ ନାମରେ ୮ଟି ଶତକ ଏବଂ ୬୫ଟି ଅର୍ଦ୍ଧଶତକ ଅଛି ।

ରୋହିତ ଶର୍ମା - ରୋହିତ ଶର୍ମା ଡେକାନ ଚାର୍ଜର୍ସରୁ ତାଙ୍କ ଆଇପିଏଲ କ୍ୟାରିଅର ଆରମ୍ଭ କରିଥିଲେ । ୨୦୧୧ ମସିହାରୁ ହିଟ୍‌ମ୍ୟାନ୍‌ ମୁମ୍ବାଇ ଇଣ୍ଡିଆନ୍ସ ପାଇଁ ଖେଳୁଛନ୍ତି । ୨୦୦୮ ମସିହାରୁ ୨୦୨୬ ମଧ୍ୟରେ ଖେଳାଯାଇଥିବା ୧୯ଟି ସିଜିନରେ ରୋହିତ ଶର୍ମା ୨୭୬ଟି ମ୍ୟାଚ୍ ଖେଳି ୭,୧୮୩ ରନ କରିଛନ୍ତି ।

ମନୀଷ ପାଣ୍ଡେ - ମନୀଷ ପାଣ୍ଡେ IPL ୨୦୨୬ ରେ କୋଲକାତା ନାଇଟ୍ ରାଇଡର୍ସ ଦଳର ଅଂଶ ଅଛନ୍ତି । ସେ ତାଙ୍କ IPL କ୍ୟାରିଅରରେ ମୋଟ ୭ଟି ଦଳ ପାଇଁ ଖେଳିଛନ୍ତି । ସେ ୧୭୪ଟି ମ୍ୟାଚ୍ ବିଶିଷ୍ଟ କ୍ୟାରିଅରରେ ୩,୯୪୨ ରନ କରିଛନ୍ତି। ସେ ୨୦୦୮ ମସିହାରୁ ଇଣ୍ଡିଆନ୍ ପ୍ରିମିୟର ଲିଗରେ ଖେଳୁଛନ୍ତି ।

ସେହିପରି ଆହୁରି କିଛି ଖେଳାଳି ଅଛନ୍ତି ଯେଉଁମାନେ ୨୦୦୮ ମସିହାରେ ଖେଳିଥିଲେ, ଆଉ ଏବେ ମଧ୍ୟ ଖେଳୁଛନ୍ତି । କିନ୍ତୁ ଏହି ଖେଳାଳି ଆଇପିଏଲର ସମସ୍ତ ସିଜିନରେ ଖେଳିବାର ସୁଯୋଗ ପାଇନଥିଲେ । ଇଶାନ୍ତ ଶର୍ମା, ଅଜିଙ୍କ୍ୟ ରାହାଣେ, ସ୍ୱପ୍ନିଲ ସିଂହ ଏବଂ ରବିନ୍ଦ୍ର ଜାଡେଜା ହେଉଛନ୍ତି କିଛି କ୍ରିକେଟର ଯେଉଁମାନେ ୨୦୦୮ ମସିହାରେ IPL ଡେବ୍ୟୁ କରିଥିଲେ ।