ନୂଆଦିଲ୍ଲୀ: ବର୍ଷିଲେ ସୁନୀଲ ଗାଭାସ୍କର । ଆଇପିଏଲ୍ ୨୦୨୬ ସଂସ୍କରଣ ଆରମ୍ଭ ହୋଇଥିବା ବେଳେ ଗାଭାସ୍କର ବିସିସିଆଇକୁ ବଡ଼ ଦାବି ଜଣାଇଛନ୍ତି । ଶେଷ ସମୟରେ ଆଇପିଏଲ୍‌ରୁ ମୁହଁ ଫେରାଇ ନେଉଥିବା ଖେଳାଳିଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଲାଗି ବିସିସିଆଇ ନିକଟରେ ଦାବି କରିଛନ୍ତି ସୁନାମଧନ୍ୟ କ୍ରିକେଟର ସୁନୀଲ ଗାଭାସ୍କର ।

ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ସୁନୀଲ ଗାଭାସ୍କରଙ୍କ ଅନୁସାରେ, "ବର୍ତ୍ତମାନ ୨ ବର୍ଷ ପ୍ରତିବନ୍ଧକ ନିୟମ ରହିଛି । ଯାହାକି ନିଲାମ ହୋଇଥିବା ଖେଳାଳି ଟୁର୍ଣ୍ଣାମେଣ୍ଟରୁ ହଟିବାରୁ ରୋକିବା ଲାଗି ପର୍ଯ୍ୟାପ୍ତ ନୁହେଁ ।"

ଏଥିସହ ପଢ଼ନ୍ତୁ: IPLର ପ୍ରଥମ ମ୍ୟାଚ୍‌ରେ ଜିତିଲା RCB; ଦୁନିଆର ଏକମାତ୍ର ଖେଳାଳି ଭାବେ ରେକର୍ଡ କଲେ କୋହଲି

ବିଦେଶର ଏକାଧିକ ନାମୀ ଦାମୀ ଖେଳାଳି ଆଇପିଏଲ୍‌ରୁ ହଟୁଥିବା ବେଳେ ଗାଭାସ୍କରଙ୍କ ଏହି ବଡ଼ ବୟାନ ଆସିଛି । ଏହି ପ୍ରସଙ୍ଗରେ ଗାଭାସ୍କର ଆଲୋଚନା ବେଳେ କହିଛନ୍ତି, ବିସିସିଆଇ ଅଧିକ ପ୍ରଭାବୀ କାର୍ଯ୍ୟାନୁଷ୍ଠାନ ଉପରେ ଗୁରୁତ୍ଵ ଦେଇ ବିଚାର କରୁ ।

ସେ ଆହୁରି କହିଛନ୍ତି ଯେ, "ଏହି ପ୍ରସଙ୍ଗକୁ ବିସିସିଆଇ ଗୁରୁତ୍ଵ ଦେଇ ଚର୍ଚ୍ଚା କରୁ । କାରଣ ଦୁଇ ବର୍ଷ ପ୍ରତିବନ୍ଧକ କାମ କରୁନାହିଁ । ଆପଣଙ୍କୁ ଏମିତି ପ୍ରତିବନ୍ଧକ ଆପଣାଇବାକୁ ପଡ଼ିବ, ଯାହା ଖେଳାଳିଙ୍କୁ ପ୍ରଭାବିତ କରିବ । ଯେବେ ପର୍ଯ୍ୟନ୍ତ ଆଇପିଏଲ୍‌କୁ ଫେରିବା ପଥ ପ୍ରଭାବିତ ନ ହୋଇଛି, ଏହି ନିୟମ ସଫଳ ହେବ ନାହିଁ ।"

IPLର ନିୟମ କ'ଣ ?

ପୂର୍ବରୁ ଆଇପିଏଲ୍‌ରେ ଏକ ନିୟମ ରହିଛି । ନିୟମାନୁସାରେ, ଯଦି କୌଣସି ବିଦେଶୀ ଖେଳାଳି ନିଲାମୀରେ ଚୟନ ହେବା ପରେ ସେ ଟୁର୍ଣ୍ଣାମେଣ୍ଟରୁ ହଟି ଯାଆନ୍ତି, ତାହେଲେ ତାଙ୍କୁ ଆଇପିଏଲ୍‌ର ପରବର୍ତ୍ତୀ ୨ଟି ସଂସ୍କରଣ ନିଲାମରୁ ବାହାରେ ରଖାଯିବ । ଯଦି ଖେଳାଳିଙ୍କୁ ଆଘାତ କିମ୍ବା ମେଡିକାଲ୍ କାରଣ ଥିବ ତାହେଲେ ଆଶ୍ଵସ୍ତ ମିଳିବ ।

ଏଥିସହ ପଢ଼ନ୍ତୁ: କୋହଲି ଛାଡ଼ିଲେ ସହଜ କ୍ୟାଚ୍, ଷ୍ଟାଣ୍ଡରେ ହସିଲେ ଅନୁଷ୍କା

ବେନ୍ ଡକେଟଙ୍କୁ ନେଇ ବିବାଦ

ଚଳିତ ଆଇପିଏଲ୍ ସଂସ୍କରଣରୁ ବେନ୍ ଡକେଟ୍ ହଟିବା ପୁଣି ଥରେ ଏହି ପ୍ରସଙ୍ଗକୁ ତାଜା କରିଛି । ଆରମ୍ଭ ହୋଇଛି ତର୍କ ବିତର୍କ । ବେନ୍ ଡକେଟଙ୍କୁ ୨ କୋଟିରେ କିଣିଥିଲା ଦିଲ୍ଲୀ କ୍ୟାପିଟାଲ୍ସ । କିନ୍ତୁ ସେ ରେଡ୍ ବଲ୍ କ୍ରିକେଟକୁ ପ୍ରାଥମିକତା ଦେଇ ଟୁର୍ଣ୍ଣାମେଣ୍ଟରୁ ନାଁ ପ୍ରତ୍ୟାହାର କରି ନେଇଛନ୍ତି ।

ନିୟମ ଅନୁସାରେ, ବେନ୍ ଡକେଟ ଆଗାମୀ ୨ ବର୍ଷ ପର୍ଯ୍ୟନ୍ତ ଆଇପିଏଲ୍ ନିଲାମୀରେ ସାମିଲ୍ ହୋଇପାରିବେ ନାହିଁ। ଏହା ପୂର୍ବରୁ ହ୍ଯାରି ବ୍ରୁକ ମଧ୍ୟ ହଟି ସାରିଛନ୍ତି ।