Argus News - ଚିନ୍ନାସ୍ଵାମୀରେ ଆଜି ମୁହାଁମୁହିଁ ହେବେ RCB ଓ ଚେନ୍ନାଇ; କାହାର ପଲ୍ଲା ଭାରି ?

ଭାରତର ଲୋକପ୍ରିୟ ଟି-୨୦ ଟୁର୍ଣ୍ଣାମେଣ୍ଟ ଆଇପିଏଲର ଆଜି ୧୧ତମ ମୁକାବିଲା । ବେଙ୍ଗାଲୁରୁର ଚିନ୍ନାସ୍ଵାମୀରେ ପରସ୍ପରକୁ ଭେଟିବେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ଓ ଚେନ୍ନାଇ ସୁପର କିଙ୍ଗସ୍ (CSK) । ଏହି ଷ୍ଟାଡିୟମଟି ନିଜର ଛୋଟ ବ୍ରାଉଣ୍ଡ୍ରି ଓ ବ୍ୟାଟିଂ ଲାଗି ଅନୁକୂଳ ପିଚ୍ ବୋଲି କୁହାଯାଏ । ଉଭୟ ଟିମ୍ ଆଇପିଏଲରେ ୩୭ ଥର ଲାଗି ପରସ୍ପରର ଆମ୍ନା ସାମ୍ନା ହେବେ । ଲଗାତାର ମ୍ୟାଚ୍ ହାରୁଥିବା ସିଏସକେ ଆଜି କିଛି କମାଲ୍ କରିବ କି ନାହିଁ ତାହାକୁ ଚାହିଁ ବସିଛନ୍ତି ଫ୍ୟାନ୍ସ । ତେବେ ଆଜି କାହାର ପଲ୍ଲା ଭାରି ଅଛି ଆସନ୍ତୁ ଜାଣିନେବା ।

ଆଜି ସନ୍ଧ୍ୟା ୭.୩୦ଟାରେ ଉଭୟ ଟିମ ଚିନ୍ନାସ୍ଵାମୀରେ ମୁହାଁମୁହିଁ ହେବେ । ଡିଫେଣ୍ଡିଂ ଚାମ୍ପିଆନ୍ ଆରସିବି ପର୍ଯ୍ୟାପ୍ତ ଆରାମ କରିବା ପରେ ସିଜିନର ଦ୍ଵିତୀୟ ମ୍ୟାଚ୍ ଖେଳିବାକୁ ଯାଉଛି । ଆରସିବି ନିଜର ପ୍ରଥମ ମ୍ୟାଚରେ ସନରାଇଜର୍ସ ହାଇଦ୍ରାବାଦ (SRH)କୁ ୬ ୱିକେଟରେ ହରାଇଥିଲା । ଅନ୍ୟପଟେ ଚେନ୍ନାଇ ସିଜିନର ତୃତୀୟ ମ୍ୟାଚ୍ ଖେଳି ବିଜୟର ଖାତା ଖୋଲିବାକୁ ଲକ୍ଷ୍ୟ ରଖିଛି । ୫ଥର ଚମ୍ପିଆନ୍ ଥିବା ଚେନ୍ନାଇ ପ୍ରଥମ ମୁକାବିଲାରେ ରାଜସ୍ଥାନଠାରୁ ୮ ୱିକେଟରେ ହାରିଥିବାବେଳେ ଦ୍ଵିତୀୟ ମ୍ୟାଚରେ ପଞ୍ଜାବଠାରୁ ୫ ୱିକେଟରେ ହାରିଥିଲା ।

• RCB vs CSK: କେମିତି ରହିଛି ପୁରୁଣା ରେକର୍ଡ ?

ଉଭୟ ଟିମ ଆଜି ପର୍ଯ୍ୟନ୍ତ ଆଇପିଏଲରେ ୩୬ଥର ଆମ୍ନାସାମ୍ନା ହୋଇଛନ୍ତି, ଯେଉଁଥିରେ ଚେନ୍ନାଇର ପଲ୍ଲା ଭାରି ରହିଛି । ଚେନ୍ନାଇ ୨୧ଟି ମ୍ୟାଚରେ ବିଜୟ ହାସଲ କରିଥିବାବେଳେ ଆରସିବି କେବଳ ୧୩ଟି ମ୍ୟାଚ ଜିତିଛି । କିନ୍ତୁ ଉଭୟ ଟିମର ଶେଷ ୩ଟି ମ୍ୟାଚ ଫଳ ଦେଖିଲେ, ସବୁ ମ୍ୟାଚରେ ଲଗାତାର ଆରସିବି ବିଜୟ ହୋଇଛି । RCB ଗତ ସିଜିନରେ CSKକୁ ୫୦ ରନରେ ପରାଜିତ କରିଥିଲା । ସେହିପରି ୨୦୨୪ରେ ଚେନ୍ନାଇକୁ ୨୭ ରନ୍ ହରାଇଥିବାବେଳେ ଏହି ସିଜିନରେ CSKର ପ୍ରଥମ ମ୍ୟାଚ ଆରସିବି ସହ ଥିଲା, ଯେଉଁଥିରେ ଚେନ୍ନାଇ ୬ ୱିକେଟରେ ଜିତିଥିଲା । ହେଡ୍-ଟୁ-ହେଡ୍ ରେକର୍ଡ ଚେନ୍ନାଇର ଭଲ ଥିବାବେଳେ ଚଳିତ ସିଜିନରେ ଆରସିବି ଭଲ ପ୍ରଦର୍ଶନ କରିଛି । ତେବେ ଆଜି ଦେଖିବାକୁ ବାକି ରହିଲା ଚେନ୍ନାଇ ଚଳିତ ସିଜିନରେ ନିଜର ପରାଜୟର ଧାରା ଭାଙ୍ଗୁଛି ନା ବେଙ୍ଗାଲୁରୁ ଦ୍ଵିତୀୟ ମ୍ୟାଚରେ ବି ବିଜୟ ହାସଲ କରୁଛି ।

ପଢନ୍ତୁ ଏହି ଖବର: ମୋତେ ଗାଳି ଦିଅ, କିନ୍ତୁ ସତ ଏୟା...ରାଗିଗଲେ ଅଶ୍ଵିନ

• ପିଚ୍ ଏବଂ ପାଣିପାଗ ରିପୋର୍ଟ

ଚିନ୍ନାସ୍ୱାମୀ ଷ୍ଟାଡିୟମର ପିଚ୍‌କୁ ବ୍ୟାଟ୍ସମ୍ୟାନ୍-ଅନୁକୂଳ ପିଚ୍ ଭାବରେ ବିବେଚନା କରାଯାଏ, ଏଠାରେ ଚୌକା ଏବଂ ଛକା ମାଡ଼ ହୁଏ । ଏଠାରେ ହାରାହାରି ପ୍ରଥମ ଇନିଂସ ସ୍କୋର ୧୪୧ ଏବଂ ଦ୍ୱିତୀୟ ଇନିଂସ ସ୍କୋର ୧୩୬ ହୁଏ । ପାଗ ବିଷୟରେ କହିବାକୁ ଗଲେ, ମ୍ୟାଚ୍ ଦିନ ବର୍ଷା ହେବାର ସମ୍ଭାବନା ୨୫% ରହିଛି । ଆକାଶ ମେଘୁଆ ରହିପାରେ । ତାପମାତ୍ରା ୨୧ରୁ ୩୩ ଡିଗ୍ରୀ ସେଲସିୟସ୍ ମଧ୍ୟରେ ରହିବ ବୋଲି ଆଶା କରାଯାଉଛି ।

• ଉଭୟ ଦଳର ପ୍ଲେଇଙ୍ଗ-୧୧

RCB: ବିରାଟ କୋହଲି, ଫିଲ୍ ସଲ୍ଟ, ଦେବଦତ୍ତ ପଡିକ୍କଲ, ରଜତ ପଟିଦାର (ଅଧିନାୟକ), ଜିତେଶ ଶର୍ମା (ୱିକେଟ୍ କିପର), ଟିମ୍ ଡେଭିଡ, ରୋମାରିଓ ଶେଫର୍ଡ, କ୍ରୁନାଲ ପାଣ୍ଡ୍ୟା, ଭୁବନେଶ୍ୱର କୁମାର, ଅଭିନନ୍ଦନ ସିଂ ଓ ଜ୍ୟାକବ ଡଫି ।
ଇମ୍ପାକ୍ଟ ପ୍ଲେୟାର: ସୁୟାଶ ଶର୍ମା
CSK: ସଞ୍ଜୁ ସାମସନ (ୱିକେଟ୍ କିପର), ଋତୁରାଜ ଗାଇକୱାଡ (ଅଧିନାୟକ), ଆୟୁଷ ମାଥ୍ରେ, ସରଫରାଜ ଖାନ, ଶିବମ ଦୁବେ, କାର୍ତ୍ତିକ ଶର୍ମା, ପ୍ରଶାନ୍ତ ବୀର, ମ୍ୟାଟ ହେନେରୀ, ନୁର ଅହମ୍ମଦ / ଗୁରଜପନୀତ ସିଂ, ଅନସୁଲ କମ୍ବୋଜ / ଜେମି ଓଭରଟନ୍, ଖଲେଲ ଅହମ୍ମଦ ।
ଇମ୍ପାକ୍ଟ ପ୍ଲେୟାର: ରାହୁଲ ଚହର/ଅକିଲ ହୋସେନ