ଗତ ମେ' ୩୧ ତାରିଖରେ ଆଇପିଏଲ ସିଜିନ୍-୧୯ର ଫାଇନାଲ ମ୍ୟାଚ୍ ଖେଳାଯାଇଥିଲା । ଗୁଜରାଟ ଟାଇଟନ୍ସକୁ ପରାସ୍ତ କରି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଦ୍ବିତୀୟ ଥର ପାଇଁ ଟ୍ରଫି ଜିତିଥିଲା । ଆଇପିଏଲ ୨୦୨୬ ଶେଷ ହେବାର ୧୫ ଦିନ ହୋଇଛି । କିନ୍ତୁ ଏବେ ଆଇପିଏଲ ୨୦୨୭କୁ ନେଇ ଅନେକ ବଡ଼ ଅପଡେଟ୍‌ ସାମ୍ନାକୁ ଆସିଛି । ୨୦୨୭ IPL ପାଇଁ କାର୍ଯ୍ୟସୂଚୀରେ ପରିବର୍ତ୍ତନ ବିଷୟରେ ଆଲୋଚନା କରାଯାଇଥିଲା । ଏହା ବ୍ୟତୀତ BCCI ସଚିବ ଦେବଜିତ ସାଇକିଆ ମଧ୍ୟ ଆଇପିଏଲରେ ମ୍ୟାଚ୍‌ ସଂଖ୍ୟା ବୃଦ୍ଧି ବିଷୟରେ ଆଲୋଚନା କରିଥିଲେ ।  ଆଗାମୀ IPL ସିଜିନ୍‌ରେ ୭୪ ବଦଳରେ ୯୪ ମ୍ୟାଚ୍ ହେବ ବୋଲି ବେଶ୍‌ ଚର୍ଚ୍ଚା ହେଉଥିଲା । ଅର୍ଥାତ ଆଉ ୨୦ ମ୍ୟାଚ୍‌ ବୃଦ୍ଧି ହେବ । ତେବେ ଏହି ଚର୍ଚ୍ଚା ମଧ୍ୟରେ ବଡ଼ ବୟାନ ଦେଇଛନ୍ତି ବିସିସିଆଇ ସଚିବ ଦେବଜିତ ସାଇକିଆ ।

IPL ୨୦୨୭ରେ ୭୪ ବଦଳରେ ୯୪ ମ୍ୟାଚ୍ ହେବ କି ?

ନ୍ୟୁଜ୍‌ ଏଜେନ୍ସି PTI ସହିତ ଆଲୋଚନା କରି ଦେବଜିତ ସାଇକିଆ ସ୍ପଷ୍ଟ କରିଛନ୍ତି ଯେ ମ୍ୟାଚ୍ ସଂଖ୍ୟାରେ କୌଣସି ବୃଦ୍ଧି ହେବ ନାହିଁ । ପୂର୍ବ ପରି ସମାନ ୭୪ ମ୍ୟାଚ୍ ଖେଳାଯିବ । ମ୍ୟାଚ୍ ସଂଖ୍ୟା ବୃଦ୍ଧି ନ କରିବାର ମୁଖ୍ୟ କାରଣ ହେଉଛି ବିଦେଶୀ ଖେଳାଳିଙ୍କ କାର୍ଯ୍ୟସୂଚୀ । ସାଇକିଆ କହିଛନ୍ତି ଯେ ବିଦେଶୀ ଖେଳାଳିମାନଙ୍କୁ ଦ୍ୱିପାକ୍ଷିକ ସିରିଜ ଖେଳିବାକୁ ପଡ଼ିବ । ତେଣୁ ଆଗାମୀ ସିଜିନ୍‌ରେ ୯୪ ନୁହେଁ ୭୪ ମ୍ୟାଚ୍‌ ଖେଳାଯିବ ।

ପରବର୍ତ୍ତୀ ସିଜିନର କାର୍ଯ୍ୟସୂଚୀରେ ଏକ ବଡ଼ ପରିବର୍ତ୍ତନ ହେବ

ବିସିସିଆଇ ସଚିବ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ପରବର୍ତ୍ତୀ ସିଜିନର ଟୁର୍ଣ୍ଣାମେଣ୍ଟ ପ୍ରାୟ ଦୁଇ ସପ୍ତାହ ପୂର୍ବରୁ ଆରମ୍ଭ ହୋଇପାରେ । ଏହି ବର୍ଷ IPL ମାର୍ଚ୍ଚ ୨୮ ରୁ ମେ' ୩୧ ମଧ୍ୟରେ ଖେଳାଯାଇଥିଲା । ଗରମ ଏବଂ ପ୍ରାକ-ମୌସୁମୀ ଋତୁ ଯୋଗୁଁ ଆଗାମୀ ସିଜିନ ଦୁଇ ସପ୍ତାହ ପୂର୍ବରୁ ଆରମ୍ଭ କରିବାକୁ ଚିନ୍ତା କରାଯାଉଛି ।

ପରବର୍ତ୍ତୀ ସିଜିନର କାର୍ଯ୍ୟସୂଚୀ ବିଷୟରେ ଦେବଜିତ ସାଇକିଆ କହିଛନ୍ତି, "ଏହି ବର୍ଷ IPL ମାର୍ଚ୍ଚ ୨୮ ରେ ଆରମ୍ଭ ହୋଇଥିଲା ଏବଂ ଫାଇନାଲ ମ୍ୟାଚ୍ ମେ' ୩୧ରେ ଖେଳାଯାଇଥିଲା । ଆମେ ଯେଉଁ ଏକମାତ୍ର ପ୍ରସଙ୍ଗ ଉପରେ ଆଲୋଚନା କରିଛୁ ତାହା ହେଉଛି ଟୁର୍ଣ୍ଣାମେଣ୍ଟର ଶେଷ ପର୍ଯ୍ୟାୟରେ ବର୍ଷା ଏବଂ ପ୍ରାକ-ମୌସୁମୀ ପାଗର ସମ୍ଭାବନା । ଏହା ସହିତ, ଅତ୍ୟଧିକ ଗରମ ହେଉଛି । ଏହା ଖେଳାଳି ଏବଂ ଦର୍ଶକଙ୍କ ପାଇଁ ଅନୁକୂଳ ହେବ ନାହିଁ ।" ତେଣୁ ଦୁଇ ସପ୍ତାହ ପୂର୍ବରୁ ଆଇପିଏଲ ଆରମ୍ଭ କରିବାକୁ ଯୋଜନା ହେଉଛି ବୋଲି ସେ କହିଛନ୍ତି ।