IPL 2027 Trade / IPL ୨୦୨୭ ପୂର୍ବରୁ ବଡ଼ ଟ୍ରେଡ୍‌ ଡିଲ୍‌, ହାର୍ଦ୍ଦିକଙ୍କ ବଦଳରେ ମୁମ୍ବାଇକୁ ଆସିବେ ଅର୍ଶଦୀପ

ଆଇପିଏଲ୍‌ ୨୦୨୭ ପାଇଁ ନଭେମ୍ବର ୧୭ ତାରିଖରେ ସମସ୍ତ ଫ୍ରାଞ୍ଚାଇଜି ନିଜ ନିଜ ରିଟେନ୍‌ ଓ ରିଲିଜ୍‌ ଖେଳାଳିଙ୍କ ତାଲିକା ଜାରି କରିବେ । ଏହା ପୂର୍ବରୁ ବିଭିନ୍ନ ଦଳ ମଧ୍ୟରେ ଖେଳାଳି ଟ୍ରେଡ୍‌କୁ ନେଇ ଚର୍ଚ୍ଚା ଜୋର୍‌ ଧରିଛି । ତେବେ ସବୁଠାରୁ ଅଧିକ ଚର୍ଚ୍ଚା ମୁମ୍ବାଇ ଇଣ୍ଡିଆନ୍ସ ଓ ପଞ୍ଜାବ କିଙ୍ଗସ୍‌ ମଧ୍ୟରେ ହେବାକୁ ଥିବା ଏକ ବଡ଼ ଟ୍ରେଡ୍‌କୁ ନେଇ ହେଉଛି । ରିପୋର୍ଟ ଅନୁସାରେ, ହାର୍ଦ୍ଦିକ ପାଣ୍ଡ୍ୟାଙ୍କ ବଦଳରେ ଅର୍ଶଦୀପ ସିଂହ ମୁମ୍ବାଇ ଇଣ୍ଡିଆନ୍ସକୁ ଆସିପାରନ୍ତି । ଯଦି ଏହି ଡିଲ୍‌ ଚୂଡ଼ାନ୍ତ ହୁଏ, ତେବେ ହାର୍ଦ୍ଦିକ ଆଗାମୀ ସିଜିନ୍‌ରେ ପଞ୍ଜାବ ପକ୍ଷରୁ ଖେଳୁଥିବା ଦେଖିବାକୁ ମିଳିପାରେ ।

ଜରତୀୟ ଗଣମାଧ୍ୟମର ଏକ ନୂଆ ରିପୋର୍ଟ ଅନୁସାରେ, ମୁମ୍ବାଇ ଓ ପଞ୍ଜାବ ମଧ୍ୟରେ ଏହି ଟ୍ରେଡ୍‌ ଡିଲ୍‌ ପ୍ରାୟ ଚୂଡ଼ାନ୍ତ ହୋଇସାରିଛି । ଦୁଇ ଫ୍ରାଞ୍ଚାଇଜି ଡିଲ୍‌କୁ ଫାଇନାଲ୍‌ କରି ବିସିସିଆଇ ନିକଟକୁ ଚିଠି ପଠାଇଥିବା ଖବର ମିଳିଛି । ତେବେ ଏବେ ଖେଳାଳିଙ୍କ ଦରମା ଓ ଆର୍ଥିକ ଚୁକ୍ତିକୁ ନେଇ ଆଲୋଚନା ବାକି ରହିଛି । ଏହା ସମ୍ପୂର୍ଣ୍ଣ ହେବା ପରେ ଡିଲ୍‌ରେ ଦସ୍ତଖତ ହୋଇ ଅଫିସିଆଲ୍‌ ଘୋଷଣା ହୋଇପାରେ । ସୋସିଆଲ୍‌ ମିଡିଆରେ ଆସନ୍ତା ୭୨ ଘଣ୍ଟା ମଧ୍ୟରେ ଏହି ଟ୍ରେଡ୍‌ ଘୋଷଣା ହେବା ନେଇ ଚର୍ଚ୍ଚା ଚାଲିଛି । ତେବେ ଏହି ଟ୍ରେଡ୍‌ରେ ଉଭୟ ଦଳ କେବଳ ଜଣେ ଲେଖାଏଁ ଖେଳାଳିଙ୍କୁ ସାମିଲ କରୁଥିବା କୁହାଯାଉଛି ।

ହାର୍ଦ୍ଦିକ ପାଣ୍ଡ୍ୟାଙ୍କ ଭଳି ଜଣେ ଦକ୍ଷ ଦ୍ରୁତ ବୋଲିଂ ଅଲରାଉଣ୍ଡର ଦଳରେ ସାମିଲ ହେଲେ ପଞ୍ଜାବ କିଙ୍ଗସ୍‌ର ଶକ୍ତି ନିଶ୍ଚିତ ଭାବେ ବୃଦ୍ଧି ପାଇବ । ବ୍ୟାଟିଂ ସହ ବୋଲିଂରେ ମଧ୍ୟ ହାର୍ଦ୍ଦିକ ଦଳକୁ ମଜବୁତ କରିପାରିବେ । ତେବେ ସେ ପଞ୍ଜାବ ଦଳରେ କେବଳ ଜଣେ ଖେଳାଳି ଭାବେ ଯୋଗଦେବେ ବୋଲି ଚର୍ଚ୍ଚା ହେଉଛି । ଦଳର ଅଧିନାୟକ ଭାବେ ଶ୍ରେୟସ ଆୟର ହିଁ ଦାୟିତ୍ୱ ତୁଲାଇବେ। ତଥାପି ହାର୍ଦ୍ଦିକ ଦଳରେ ସାମିଲ ହେବା ପରେ ଲିଡରସିପ୍‌ ଗ୍ରୁପ୍‌ର ଅଂଶ ହୋଇପାରନ୍ତି ।

ମୁମ୍ବାଇର ବୋଲିଂ ଶକ୍ତି ବଢ଼ାଇବେ ଅର୍ଶଦୀପ

ଆଇପିଏଲ୍‌ ୨୦୨୬ରେ ମୁମ୍ବାଇ ଇଣ୍ଡିଆନ୍ସର ସବୁଠାରୁ ବଡ଼ ଦୁର୍ବଳତା ଥିଲା ଦଳର ବୋଲିଂ ବିଭାଗ । ମୁଖ୍ୟ ଦ୍ରୁତ ବୋଲର ଯଶପ୍ରୀତ ବୁମ୍‌ରାହଙ୍କୁ ଅନ୍ୟ ବୋଲରଙ୍କଠାରୁ ଆବଶ୍ୟକ ସହଯୋଗ ମିଳୁନଥିଲା । ଏଭଳି ସ୍ଥିତିରେ ଅର୍ଶଦୀପ ସିଂହ ଯଦି ମୁମ୍ବାଇ ଦଳରେ ସାମିଲ ହୁଅନ୍ତି, ତେବେ ବୁମ୍‌ରାହଙ୍କ ସହ ତାଙ୍କ ଯୋଡ଼ି ଦଳର ବୋଲିଂକୁ ଆହୁରି ମଜବୁତ କରିବ ।

ଅର୍ଶଦୀପଙ୍କ ଆସିବା ପରେ ମୁମ୍ବାଇକୁ ଟ୍ରେଣ୍ଟ ବୋଲ୍ଟଙ୍କୁ ପ୍ଲେଇଂ ଇଲେଭେନ୍‌ରେ ରଖିବାକୁ ପଡ଼ିନପାରେ । ଏହାଦ୍ୱାରା ଦଳ ୱିଲ୍‌ ଜ୍ୟାକ୍ସଙ୍କୁ ଅଲରାଉଣ୍ଡର ଭାବେ ଖେଳାଇବାର ସୁଯୋଗ ପାଇପାରିବ । ତେବେ ଦ୍ରୁତ ବୋଲିଂ ଅଲରାଉଣ୍ଡର ଭାବେ ଦଳରେ କର୍ବିନ୍‌ ବୋଶ୍‌ ରହିବେ ।

ରୋହିତ ହୋଇପାରନ୍ତି ମୁମ୍ବାଇର ନୂଆ ଅଧିନାୟକ !

ହାର୍ଦ୍ଦିକ ପାଣ୍ଡ୍ୟା ଦଳ ଛାଡ଼ିଲେ ମୁମ୍ବାଇ ଇଣ୍ଡିଆନ୍ସକୁ ନୂଆ ଅଧିନାୟକ ଚୟନ କରିବାକୁ ପଡ଼ିବ । ଏହି ଦୌଡ଼ରେ ପୂର୍ବତନ ଅଧିନାୟକ ରୋହିତ ଶର୍ମା ସବୁଠାରୁ ଆଗରେ ଥିବା ଚର୍ଚ୍ଚା ହେଉଛି। ଅନ୍ୟପଟେ ଯୁବ ବ୍ୟାଟ୍ସମ୍ୟାନ୍‌ ତିଲକ ବର୍ମାଙ୍କୁ ଦଳର ନୂଆ ଉପଅଧିନାୟକ ଦାୟିତ୍ୱ ମିଳିପାରେ । ଯାହାଦ୍ୱାରା ଆଇପିଏଲ୍‌ ୨୦୨୮ ପାଇଁ ତାଙ୍କୁ ଅଧିନାୟକ ଭାବେ ପ୍ରସ୍ତୁତ କରାଯାଇପାରିବ ।

ତେବେ ଏହି ଟ୍ରେଡ୍‌ ଡିଲ୍‌ ଉପରେ ଏବେ ସମସ୍ତଙ୍କ ନଜର ରହିଛି। ଯଦି ହାର୍ଦ୍ଦିକ ଓ ଅର୍ଶଦୀପଙ୍କ ମଧ୍ୟରେ ଖେଳାଳି ଅଦଳବଦଳ ହୁଏ, ତେବେ ଆଇପିଏଲ୍‌ ୨୦୨୭ରେ ଉଭୟ ମୁମ୍ବାଇ ଇଣ୍ଡିଆନ୍ସ ଓ ପଞ୍ଜାବ କିଙ୍ଗସ୍‌ର ଦଳୀୟ ସନ୍ତୁଳନରେ ବଡ଼ ପରିବର୍ତ୍ତନ ଦେଖିବାକୁ ମିଳିବ ।