Argus News - IPL ରେ ସାମିଲ ହେବେ କି ନୂଆ ଟିମ୍‌ ? ଅଧ୍ୟକ୍ଷ ଦେଲେ ବଡ଼ ବୟାନ

IPL ହେଉଛି ବିଶ୍ବର ସବୁଠୁ ଲୋକପ୍ରିୟ ଓ ବଡ଼ କ୍ରିକେଟ୍ ଟୁର୍ଣ୍ଣାମେଣ୍ଟ । ମାର୍ଚ୍ଚ-ମେ' ମାସ ମଧ୍ୟରେ କ୍ରିକେଟ୍ ଉତ୍ସାହ ଏକ ଭିନ୍ନ ସ୍ତରରେ ପହଞ୍ଚେ । ଯେଉଁଠାରେ ୧୦ଟି IPL ଟିମ୍‌ ଟ୍ରଫି ଜିତିବା ଉଦ୍ଦେଶ୍ୟରେ ଖେଳନ୍ତି । ୨୦୨୧ ମସିହା ପର୍ଯ୍ୟନ୍ତ ଇଣ୍ଡିଆନ୍ ପ୍ରିମିୟର ଲିଗରେ ଆଠଟି ଦଳ ଅଂଶଗ୍ରହଣ କରୁଥିଲେ । କିନ୍ତୁ ଏବେ ଏହି ସଂଖ୍ୟା ୧୦ରେ ପହଞ୍ଚିଛି । ତେବେ ଭବିଷ୍ୟତରେ ଆଇପିଏଲରେ ଦଳର ସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଛି ବୋଲି ବେଶ୍‌ ଚର୍ଚ୍ଚା ହେଉଛି ? ଆଉ ଏହାରି ମଧ୍ୟରେ IPL ଅଧ୍ୟକ୍ଷ ଅରୁଣ ସିଂହ ଧୂମାଲ ଏହାକୁ ନେଇ ଏକ ବଡ଼ ବୟାନ ଦେଇଛନ୍ତି ।

ରିପୋର୍ଟ ଅନୁଯାୟୀ, କେବଳ ଗତ ବର୍ଷ ସମସ୍ତ ଦଳ ୧ ହଜାର କୋଟିରୁ ଅଧିକ ରାଜସ୍ୱ ଆୟ କରିଥିଲେ । ସମ୍ପ୍ରତି ରାଜସ୍ଥାନ ରୟାଲ୍ସ ଏବଂ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର ଦଳ ୧୫ ହଜାର କୋଟିରୁ ଅଧିକ ମୂଲ୍ୟରେ ବିକ୍ରି ହୋଇଥିଲା । ଏହି ସଂଖ୍ୟା ହିଁ ପ୍ରମାଣ କରୁଛି ଆଇପିଏଲ ରାଜସ୍ବ କ୍ରମାଗତ ଭାବେ ବୃଦ୍ଧି ପାଉଛି ।

IPL ମ୍ୟାଚ୍ ସଂଖ୍ୟା ବୃଦ୍ଧି ପାଇବ କି ?

IPL ସିଜିନରେ ମ୍ୟାଚ୍ ସଂଖ୍ୟା ୭୪ ରୁ ୯୪କୁ ବୃଦ୍ଧି କରିବାର ସମ୍ଭାବନା ସମ୍ପର୍କରେ, ଅରୁଣ ସିଂହ ଧୂମାଲ କହିଛନ୍ତି ଯେ ଏଥିପାଇଁ ଟୁର୍ଣ୍ଣାମେଣ୍ଟର ଅବଧି ବୃଦ୍ଧି କରିବାକୁ ପଡିବ । ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଅରୁଣ ଧୂମଲ୍ କହିଛନ୍ତି ଯେ ଅନ୍ତର୍ଜାତୀୟ କ୍ରିକେଟ୍ କାର୍ଯ୍ୟସୂଚୀ ପୂର୍ବରୁ ସ୍ଥିର ରହିଛି, ତେଣୁ କେବଳ ମାର୍ଚ୍ଚରୁ ମେ' ମାସର ମଧ୍ୟଭାଗ ପର୍ଯ୍ୟନ୍ତ ସମୟ ଉପଲବ୍ଧ ।

ସେ କହିଛନ୍ତି, "ଜୁନ୍ ଆରମ୍ଭ ହେବା ମାତ୍ରେ ଦକ୍ଷିଣ ଭାରତରେ ମୌସୁମୀ ଋତୁ ଆରମ୍ଭ ହୁଏ । ତେଣୁ ଏହି ସମୟରେ IPL ର ଅବଧି ବୃଦ୍ଧି କରିବା ସମ୍ଭବ ନୁହେଁ । ଯଦି ମ୍ୟାଚ୍ ସଂଖ୍ୟା ୭୪ ରୁ ୯୪କୁ ବୃଦ୍ଧି କରାଯାଏ, ତେବେ ଅଧିକ ଡବଲ ହେଡର ଆବଶ୍ୟକ ହେବ, ଯାହା ବ୍ରଡକାଷ୍ଟରମାନଙ୍କ ପାଇଁ ଭଲ ନୁହେଁ ।"

ଦଳର ସଂଖ୍ୟା ବୃଦ୍ଧି ହେବ କି ?

IPL ଅଧ୍ୟକ୍ଷ କହିଛନ୍ତି ଯେ ଯଦି ଦଳର ସଂଖ୍ୟା ବୃଦ୍ଧି କରିବାକୁ ହୁଏ, ତେବେ ଟୁର୍ଣ୍ଣାମେଣ୍ଟ ପାଇଁ ଅଧିକ ସମୟ ଆବଶ୍ୟକ ହେବ । IPL ସମସ୍ତଙ୍କୁ ବହୁତ ଟଙ୍କା ରୋଜଗାର ଦେଇଛି, କିନ୍ତୁ ଟୁର୍ଣ୍ଣାମେଣ୍ଟର ଅବଧି ବୃଦ୍ଧି ନ ହେଲେ ଦଳର ସଂଖ୍ୟା ବୃଦ୍ଧି ହୋଇପାରିବ ନାହିଁ । ଅରୁଣ ଧୁମାଲ୍ କହିଛନ୍ତି ଯେ ଦଳର ସଂଖ୍ୟା ICC ର କାର୍ଯ୍ୟସୂଚୀ ଉପରେ ନିର୍ଭର କରେ ।