ବୁଧବାର ICC ସଦ୍ୟତମ ରାଙ୍କିଂ ଜାରି କରିଛି । ଯେଉଁଥିରେ ଇଶାନ କିଶାନ ଟି-୨୦ ବ୍ୟାଟ୍ସମ୍ୟାନ୍‌ ତାଲିକାରେ ଶୀର୍ଷ ୧୦ରେ ପ୍ରବେଶ କରିଛନ୍ତି । ଇଶାନ ପାକିସ୍ତାନ ବିପକ୍ଷରେ ୪୦ ବଲ୍ ରୁ ୭୭ ରନ୍‌ର ଏକ ଚମତ୍କାର ଇନିଂସ ଖେଳିଥିଲେ । ପୂର୍ବ ମ୍ୟାଚ୍‌ରେ ସେ ନାମିବ୍ୟା ବିପକ୍ଷରେ ଅର୍ଦ୍ଧଶତକ ମଧ୍ୟ କରିଥିଲେ । ରାଙ୍କିଂ ତାଲିକାରେ ଇଶାନ ୧୭ ସ୍ଥାନ ଉପରକୁ ଉଠିଛନ୍ତି । ସେହିପରି ୨୦୨୬ ଟି-୨୦ ବିଶ୍ୱକପରେ ପ୍ରଥମ ଶତକ ହାସଲ କରିବା ପରେ ଶ୍ରୀଲଙ୍କାର ପଥୁମ୍ ନିସାଙ୍କା ମଧ୍ୟ ତିନି ସ୍ଥାନ ଉପରକୁ ଉଠିଛନ୍ତି । ଗତ ଦୁଇଟି ମ୍ୟାଚ୍‌ରେ ଶୂନ୍ୟରେ ଆଉଟ୍ ହୋଇଥିବା ଅଭିଷେକ ଶର୍ମାଙ୍କ ରାଙ୍କିଂରେ କୌଣସି କ୍ଷତି ହୋଇନାହିଁ ଏବଂ ସେ ଏବେ ବି ନମ୍ବର-୧ ଟି-୨୦ ବ୍ୟାଟସମ୍ୟାନ୍ ରହିଛନ୍ତି ।

ଇଶାନ କିଶାନଙ୍କୁ ପାକିସ୍ତାନ ବିପକ୍ଷରେ ଚମତ୍କାର ଇନିଂସ ପାଇଁ ପ୍ଲେୟାର ଅଫ୍ ଦି ମ୍ୟାଚ୍ ପୁରସ୍କାର ଦିଆଯାଇଥିଲା । ଆର. ପ୍ରେମଦାସା ପିଚ୍ ବୋଲରମାନଙ୍କ ପାଇଁ ସହାୟକ ଥିଲା । କିନ୍ତୁ ଏହି ପିଚ୍‌ ଉପରେ ଇଶାନ କିଶାନ ୭୭ ରନ୍‌ର ଦ୍ରୁତ ଇନିଂସ ଖେଳିଥିଲେ । ଦିଲ୍ଲୀରେ ଇଶାନ ନାମିବ୍ୟା ବିପକ୍ଷରେ ମଧ୍ୟ ୬୧ ରନ୍ କରିଥିଲେ । ଏହି ଦୁଇଟି ଚମତ୍କାର ଇନିଂସ ପାଇଁ ICC ତାଙ୍କୁ ପୁରସ୍କୃତ କରିଥିଲା । ସେ ୧୭ଟି ସ୍ଥାନ ଉପରକୁ ଉଠି ଶ୍ରେଷ୍ଠ ୧୦ରେ ପ୍ରବେଶ କରିଛନ୍ତି ।
ଇଶାନ କିଷାନ ୮ ନମ୍ବରକୁ ଉନ୍ନୀତ ହୋଇଛନ୍ତି

କିଛି ସପ୍ତାହ ପୂର୍ବେ ଇଶାନ କିଷାନ ଆଇସିସି ରାଙ୍କିଙ୍ଗର ଶ୍ରେଷ୍ଠ ୫୦ରେ ମଧ୍ୟ ନଥିଲେ । ନ୍ୟୁଜିଲାଣ୍ଡ ବିପକ୍ଷରେ ତାଙ୍କର ପ୍ରଭାବଶାଳୀ ଇନିଂସ ତାଙ୍କୁ ଶୀର୍ଷ ସ୍ଥାନକୁ ନେଇଥିଲା । ସେ ଟି-୨୦ ବିଶ୍ୱକପରେ ସେହି ଫର୍ମ ଜାରି ରଖି ଶୀର୍ଷ ୧୦ରେ ପ୍ରବେଶ କରିଛନ୍ତି । ଇଶାନ ଏବେ ୭୩୨ ରେଟିଂ ସହିତ ଟି-୨୦ ବ୍ୟାଟିଂ ରାଙ୍କିଙ୍ଗରେ ୮ ନମ୍ବରରେ ପହଞ୍ଚିଛନ୍ତି । ତିଲକ ବର୍ମା ମଧ୍ୟ ଗୋଟିଏ ସ୍ଥାନ ଉପରକୁ ଯାଇ ୪ ନମ୍ବରରେ ପହଞ୍ଚିଛନ୍ତି ।

ପଥୁମ୍ ନିସାଙ୍କା ଅଷ୍ଟ୍ରେଲିଆ ବିପକ୍ଷରେ ୫୨ ବଲ୍‌ରେ ଶତକ ହାସଲ କରି ଶ୍ରୀଲଙ୍କାକୁ ବିଜୟୀ କରାଇଥିଲେ ଏବଂ ଅଷ୍ଟ୍ରେଲିଆକୁ ଟୁର୍ଣ୍ଣାମେଣ୍ଟରୁ ବାହାର କରିଦେଇଥିଲେ । ନିସାଙ୍କା ଏହି ଇନିଂସ ଫଳରେ ସେ ତିନି ସ୍ଥାନ ଉପରକୁ ଉଠି ୭୮୬ ରେଟିଂ ପଏଣ୍ଟ ସହ ୩ ନମ୍ବରରେ ପହଞ୍ଚିଛନ୍ତି ।

ଅଭିଷେକ ଶର୍ମା, ନମ୍ବର ୧ ଟି-୨୦ ବ୍ୟାଟ୍ସମ୍ୟାନ୍

ଅଭିଷେକ ଶର୍ମା ୨୦୨୬ ଟି-୨୦ ବିଶ୍ୱକପ୍‌ରେ ଏପର୍ଯ୍ୟନ୍ତ ନିଜର ଖାତା ଖୋଲି ନାହାଁନ୍ତି । ଆମେରିକା ବିପକ୍ଷରେ ଶୂନ୍ୟରେ ଆଉଟ୍ ହୋଇଥିବା ଅଭିଷେକ ନାମିବ୍ୟା ବିପକ୍ଷରେ ଖେଳି ନଥିଲେ । ସେ ପାକିସ୍ତାନ ବିପକ୍ଷରେ ପ୍ରତ୍ୟାବର୍ତ୍ତନ କରିଥିଲେ, କିନ୍ତୁ କୌଣସି ସ୍କୋର ନକରି ଆଉଟ୍ ହୋଇଥିଲେ । ଭାରତର ଅନ୍ତିମ ଗ୍ରୁପ୍ ପର୍ଯ୍ୟାୟ ମ୍ୟାଚ୍ ବୁଧବାର ନେଦରଲ୍ୟାଣ୍ଡସ୍ ବିପକ୍ଷରେ ରହିଛି ।