Ishan Vaibhav Banter / ‘ବୈଭବ ସୂର୍ଯ୍ୟବଂଶୀ କ୍ରେଡିଟ୍ ଚୋରି କରିନେଲା…’, ୧୫ ବର୍ଷୀୟ ଯୁବ ବ୍ୟାଟ୍ସମ୍ୟାନଙ୍କ ମଜା ନେଲେ ଈଶାନ କିଶନ

ଦୁଲୀପ ଟ୍ରଫି ୨୦୨୬ର ଚାମ୍ପିୟନ୍ ହୋଇଛି ଇଷ୍ଟ ଜୋନ୍‌ । ଈଶାନ କିଶାନଙ୍କ ନେତୃତ୍ବରେ ଇଷ୍ଟ ଜୋନ୍‌ ୧୩ ବର୍ଷ ପରେ ଦୁଲୀପ ଟ୍ରଫି ନିଜ ନାମରେ କରିଛି । ତେବେ ଏହି ଦଳରେ ୧୫ ବର୍ଷୀୟ ଯୁବ କ୍ରିକେଟର ବୈଭବ ସୂର୍ଯ୍ୟବଂଶୀ ମଧ୍ୟ ସାମିଲ ଥିଲେ । ନିଜ ଧୁଆଁଧାର ବ୍ୟାଟିଂ ପାଇଁ ନାଁ କରିସାରିଥିବା ବୈଭବ ଏଥର କିନ୍ତୁ ତାଙ୍କ DRS ନିଷ୍ପତ୍ତି ପାଇଁ ମଧ୍ୟ ଚର୍ଚ୍ଚାରେ ରହିଛନ୍ତି ।

ଫାଇନାଲ୍ ମ୍ୟାଚ୍‌ରେ ମଧ୍ୟ ବୈଭବ ଅଧିନାୟକ ଈଶାନ କିଶନଙ୍କୁ DRS ନେବାକୁ ପରାମର୍ଶ ଦେଇଥିଲେ । ତାଙ୍କ ପରାମର୍ଶରେ ଈଶାନ ରିଭ୍ୟୁ ନେଇଥିଲେ ଏବଂ ଇଷ୍ଟ ଜୋନ୍‌କୁ ଓ୍ବିକେଟ୍‌ ମିଳିଥିଲା । ଏହାପରେ ବୈଭବଙ୍କ କ୍ରିକେଟ୍ ବୁଦ୍ଧିର ଖୁବ୍ ପ୍ରଶଂସା ହୋଇଥିଲା ।

ଟ୍ରଫି ଜିତିବା ପରେ BCCI ପକ୍ଷରୁ ସେୟାର କରାଯାଇଥିବା ଏକ ଭିଡିଓରେ ଈଶାନ କିଶନ ଓ ବୈଭବଙ୍କ ମଧ୍ୟରେ ମଜାଦାର କଥାବାର୍ତ୍ତା ଦେଖିବାକୁ ମିଳିଛି । ବୈଭବଙ୍କୁ ମଜା କରି ଈଶାନ କହିଥିଲେ, “ଏ ସବୁ ରିଭ୍ୟୁର କ୍ରେଡିଟ୍ ନେଇସାରିଛି । ଯଦିଓ ମୁଁ ମଧ୍ୟ ରିଭ୍ୟୁ ନେବାକୁ ଯାଉଥିଲି, କିନ୍ତୁ ସେ ଏଠାକୁ ଆସି କହିଦେଉଥିଲା । ତା’ପରେ ଇଣ୍ଟରନେଟ୍‌ରେ କେବଳ ବୈଭବ-ବୈଭବ ହିଁ ହେବ ।” ଈଶାନଙ୍କ ଏହି ମଜାକ୍‌ରେ ବୈଭବ ମଧ୍ୟ ହସିଥିଲେ। କିନ୍ତୁ ଏହାପରେ ସେ ଏମିତି ଏକ ଜବାବ ଦେଇଥିଲେ, ଯାହା ଶୁଣି ଈଶାନ ମଧ୍ୟ ତାଙ୍କ କଥା ମାନିବାକୁ ବାଧ୍ୟ ହୋଇଥିଲେ ।

ଅଧିକ ପଢ଼ନ୍ତୁ: ଟିମ୍ ଇଣ୍ଡିଆକୁ ବଡ଼ ଝଟକା ! ସପୋର୍ଟ ଷ୍ଟାଫ୍‌ରୁ ଆଉ ଜଣେ ଦେଲେ ଇସ୍ତଫା

ବୈଭବ କହିଥିଲେ, “ଯେତେବେଳେ ଆପଣ ଫିଲ୍ଡ ବାହାରେ ଥିଲେ, ସେତେବେଳେ କିଏ ରିଭ୍ୟୁ ନେଉଥିଲା ?” ବୈଭବଙ୍କ ଏହି କଥା ଶୁଣି ଈଶାନ ମଧ୍ୟ ହସି କହିଥିଲେ, “ହଁ, ସେତେବେଳେ ତ ବୈଭବ ନିଜେ ରିଭ୍ୟୁ ନେଉଥିଲା ।”

ସୂଚନା ଅନୁସାରେ, ଦୁଲୀପ ଟ୍ରଫିର କ୍ୱାର୍ଟର ଫାଇନାଲ୍ ମ୍ୟାଚ୍ ସମୟରେ ଈଶାନ କିଶନ ଆହତ ହୋଇ ଡ୍ରେସିଂ ରୁମ୍‌ ଯାଇଥିଲେ । ସେତେବେଳେ ଇଷ୍ଟ ଜୋନ୍‌ର ଉପଅଧିନାୟକ ବୈଭବ ସୂର୍ଯ୍ୟବଂଶୀ ଦଳର ନେତୃତ୍ୱ ନେଇଥିଲେ। ଅଧିନାୟକ ଭାବେ ସେ ନେଇଥିବା DRS ମଧ୍ୟ ସଫଳ ହୋଇଥିଲା ଏବଂ ଦଳକୁ ୱିକେଟ୍ ମିଳିଥିଲା ।
ଏପଟେ ଦୁଲୀପ ଟ୍ରଫି ଜିତିବା ପରେ ବୈଭବ ସୂର୍ଯ୍ୟବଂଶୀ ଓ ଈଶାନ କିଶନ ଦିଲ୍ଲୀରେ ପହଞ୍ଚିଛନ୍ତି । ଭାରତ ଓ ଆଫଗାନିସ୍ତାନ ମଧ୍ୟରେ ଖେଳାଯିବାକୁ ଥିବା ୩ ମ୍ୟାଚ୍‌ର T20 ସିରିଜ୍‌କୁ ନେଇ ଏବେ ନଜର ରହିଛି ।