ଇତିହାସ ରଚିଛି ଜମ୍ମୁ କାଶ୍ମୀର କ୍ରିକେଟ୍‌ ଟିମ୍‌ । ପାରସ ଡୋଗ୍ରାଙ୍କ ଅଧିନାୟକତ୍ବରେ ରଣଜୀ ଟ୍ରଫି ଚାମ୍ପିଅନ୍‌ ହୋଇଛି । ଜମ୍ମୁ କାଶ୍ମୀର ପ୍ରଥମ ଥର ପାଇଁ ରଣଜୀ ଟ୍ରଫି ଟାଇଟଲ୍ ଜିତିଛି । ୨୦୨୫-୨୬ ରଣଜୀ ଟ୍ରଫି ଫାଇନାଲ୍ ଡ୍ର' ହୋଇଥିଲା, କିନ୍ତୁ ପ୍ରଥମ ଇନିଂସ୍ ଲିଡ୍ ଯୋଗୁଁ ଜମ୍ମୁ କାଶ୍ମୀରକୁ ଚାମ୍ପିଅନ୍ ଘୋଷଣା କରାଯାଇଥିଲା ।

ଜମ୍ମୁ କାଶ୍ମୀର ୬୭ ବର୍ଷ ପରେ ପ୍ରଥମ ଥର ପାଇଁ ଚାମ୍ପିଅନ୍ ହୋଇଛି

ଫାଇନାଲ୍‌ରେ ଜମ୍ମୁ କାଶ୍ମୀର ପ୍ରଥମେ ବ୍ୟାଟିଂ କରି ପ୍ରଥମ ଇନିଂସରେ ୫୮୪ ରନ୍ କରିଥିଲା । ଜବାବରେ, କର୍ଣ୍ଣାଟକ ପ୍ରଥମ ଇନିଂସରେ କେବଳ ୨୯୩ ରନ୍ କରିପାରିଥିଲା, ଯାହା ଫଳରେ ଜମ୍ମୁ କାଶ୍ମୀର ପ୍ରଥମ ଇନିଂସରେ ୨୯୧ ରନର ବିଶାଳ ଲିଡ୍ ପାଇଥିଲା । ଏହା ସତ୍ତ୍ୱେ ଜମ୍ମୁ କାଶ୍ମୀର ଫଲୋଅନ୍ ଦେଇନଥିଲା । ଜମ୍ମୁ କାଶ୍ମୀର ଦ୍ବିତୀୟ ଇନିଂସରେ ବ୍ୟାଟିଂ କରିବାକୁ ଆସି ୪ ଓ୍ବିକେଟ୍‌ ବିନିମୟରେ ୩୪୨ ରନ୍‌ କରିଥିଲା । ତା’ପରେ ଉଭୟ ଦଳର ଅଧିନାୟକ ଡ୍ର' ପାଇଁ ରାଜି ହୋଇଥିଲେ, ଯାହା ଫଳରେ ଜମ୍ମୁ କାଶ୍ମୀର ପ୍ରଥମ ଥର ପାଇଁ ଚାମ୍ପିଅନ୍ ହୋଇଥିଲା । ୬୭ ବର୍ଷ ପରେ ଜମ୍ମୁ କାଶ୍ମୀର ରଣଜୀ ଟ୍ରଫି ନିଜ ନାମର କରିଛି ।

କର୍ଣ୍ଣାଟକର ଦଳ ଫାଇନାଲରେ ଅନେକ ହିରୋଙ୍କୁ ସାମିଲ କରିଥିଲା

ଟାଇଟଲ୍ ମ୍ୟାଚରେ କର୍ଣ୍ଣାଟକର ଦଳରେ ଭାରତ ପାଇଁ ଟେଷ୍ଟ କ୍ରିକେଟ୍ ଖେଳିଥିବା ଅନେକ ଖେଳାଳି ସାମିଲ ଥିଲେ । ଏଥିରେ କେଏଲ ରାହୁଲ, ମୟଙ୍କ ଅଗ୍ରୱାଲ, କରୁଣ ନାୟାର, ଦେବଦତ୍ତ ପାଡିକ୍କଲ ଏବଂ ପ୍ରସିଦ୍ଧ କ୍ରିଷ୍ଣ ସାମିଲ ଥିଲେ । ମୟଙ୍କ ଅଗ୍ରୱାଲ ମଧ୍ୟ ପ୍ରଥମ ଇନିଂସରେ ୧୬୦ ରନ କରିଥିଲେ ।

ଫାଇନାଲରେ ଜମ୍ମୁ କାଶ୍ମୀରର ହିରୋ

ଶୁଭମ ପୁଣ୍ଡିର ଜମ୍ମୁ କାଶ୍ମୀର ପାଇଁ ପ୍ରଥମ ଇନିଂସରେ ୧୨୧ ରନ କରିଥିଲେ । ସେ ତାଙ୍କ ଶତକରେ ୧୨ ଚୌକା ଏବଂ ଦୁଇଟି ଛକା ମାରିଥିଲେ । ୟୱାର ହାସନ ମଧ୍ୟ ୮୮ ରନ କରିଥିଲେ । ଅଧିନାୟକ ପାରସ ଡୋଗ୍ରା ୭୦ ଏବଂ ଅବଦୁଲ ସମଦ ୬୧ ରନ କରିଥିଲେ । ବୋଲିଂ ବିଭାଗରେ ଜମ୍ମୁ କାଶ୍ମୀର ପାଇଁ ଆକିବ ନବି ପ୍ରଥମ ଇନିଂସରେ ପାଞ୍ଚଟି ୱିକେଟ ନେଇଥିଲେ । ସେହିପରି ଦ୍ବିତୀୟ ଇନିଂସରେ ଜମ୍ମୁ କାଶ୍ମୀର ପକ୍ଷରୁ କମରାନ ଇକବାଲ୍‌ ୧୬୦ ରନ୍‌ କରିଥିବା ବେଳେ ସାହିଲ ଲୋତ୍ରା ୧୦୧ ରନ୍ କରିଥିଲେ ।