World Athletics Continental Tour / କାଲିଠୁ କମ୍ପିବ କଳିଙ୍ଗ ଷ୍ଟାଡିୟମ୍, ବିଶ୍ୱର ଟପ୍ ଆଥଲେଟଙ୍କ ପ୍ରଦର୍ଶନ ଦେଖିବ ଓଡ଼ିଶା

କଳିଙ୍ଗ ଷ୍ଟାଡିୟମରେ ପୁଣି ଦେଖିବାକୁ ମିଳିବ ବିଶ୍ବସ୍ତରୀୟ ଇଭେଣ୍ଟ । ଟପ୍ ଆଥଲେଟ୍‌ମାନେ ଇଣ୍ଡିଆନ୍ ଓପନ୍ ୱାର୍ଲ୍ଡ ଆଥଲେଟିକ୍ସ ସିଲଭର ଲେଭଲ୍ କଣ୍ଟିନେଣ୍ଟାଲ୍ ଟୁର୍ ୨୦୨୬ର ଭାଗ ନେବେ । ଉଭୟ ମହିଳା ଓ ପୁରୁଷ ବର୍ଗର ମୋଟ ୧୮ଟି ବିଭାଗର ପ୍ରତିଯୋଗିତାରେ ୨୬ଟି ରାଷ୍ଟ୍ରରୁ ୧୮୮ ଆଥଲେଟ୍ ଅଂଶଗ୍ରହଣ କରିବେ। ଏଥିରେ ସାମିଲ ରହିବେ ଭାରତର ୮୮ ପ୍ରତିଯୋଗୀ ।

ନିକଟରେ ଅନୁଷ୍ଠିତ ହୋଇଥିବା ରାଜ୍ୟଗୋଷ୍ଠୀ କ୍ରୀଡ଼ାରେ ଡବଲ ରୌପ୍ୟ ପଦକ ଜିତିଥିବା ତଥା ବିଶ୍ୱ ଆଥଲେଟିକ୍ସର ରାଙ୍କ ୧୫ରେ ଥିବା ଭାରତୀୟ ପ୍ରତିଯୋଗୀ ଶ୍ରୀ ଶଙ୍କର, ଏସୀୟ ସଟଫୁଟ ଚାମ୍ପିଅନ ରୋହିତ୍ ଯାଦବ ଓ ଓଡ଼ିଆ ଧାବକ ଅନିମେଷ କୁଜୁରଙ୍କ ଉପରେ ରହିବ ତୀକ୍ଷ୍ଣ ନଜର । କେବଳ ଏତିକି ନୁହେଁ, ବ୍ରାଜିଲ ଓ ନାଇଜେରିଆ ଭଳି ଦେଶର ପ୍ରତିଷ୍ଠିତ କ୍ରୀଡ଼ାବିତଙ୍କ ଅଂଶଗ୍ରହଣ ଏହି ସିଲଭର କଣ୍ଟିନେଣ୍ଟଲ ଟୁରକୁ ଆହୁରି ଆକର୍ଷଣୀୟ କରିବ ।

ଏହି ମେଗା ଆଥଲେଟିକ୍ ଇଭେଣ୍ଟ ପାଇଁ ରାଜ୍ୟ ସରକାରଙ୍କ କ୍ରୀଡା ଓ ଯୁବ ସେବା ବିଭାଗ ପକ୍ଷରୁ ବ୍ୟାପକ ଆୟୋଜନ କରାଯାଇଛି । ୪୦୦ ମିଟର ଦୌଡ, ସଟ୍ ପୁଟ ଥ୍ରୋ', ଡିସକସ୍ ଥ୍ରୋ, ଜାଭେଲିନ୍, ହର୍ଡଲସ୍ ଭଳି ଇଭେଣ୍ଟରେ ପ୍ରତିଯୋଗୀଙ୍କ ଚମତ୍କାର ପ୍ରଦର୍ଶନ ଦେଖିବାକୁ ମିଳିପାରେ । ସମସ୍ତ ପ୍ରତିଯୋଗିତାରେ ଭାରତୀୟ ଆଥଲେଟଙ୍କ ଉତ୍କୃଷ୍ଟ ପ୍ରଦର୍ଶନ ଉପରେ ରହିବ ସମସ୍ତଙ୍କ ନଜର । ଘରୋଇ ପରିବେଶର ଫାଇଦା ଉଠାଇ ଚମତ୍କାର ପ୍ରଦର୍ଶନ ଲକ୍ଷ୍ୟରେ ଓଡ଼ିଆ ଆଥଲଟ୍ । ପ୍ରଦର୍ଶନ ଆଧାରରେ କ୍ରୀଡ଼ାବିତ ମାନଙ୍କ ପାଇଁ ପୁରସ୍କାର ରାଶି ଘୋଷଣା ହୋଇଛି । ପ୍ରଥମ ସ୍ଥାନରେ ରହୁଥିବା ଆଥଲେଟଙ୍କୁ ୧୬୦୦ ଡଲାର, ଦ୍ୱିତୀୟ ସ୍ଥାନ ପାଇଁ ୧୨୦୦ ଡଲାର, ତୃତୀୟ ସ୍ଥାନରେ ରହୁଥିବା ଆଥଲେଟ୍ ପାଇବେ ୯୦୦ ଡଲାର ।