ଭାରତର ଷ୍ଟାର କ୍ରିକେଟର ରୋହିତ ଶର୍ମା ୨୦୨୪ ଟି-୨୦ ବିଶ୍ୱକପରେ ଦଳକୁ ବିଜୟୀ କରାଇବା ପରେ ଟି-୨୦ କ୍ରିକେଟରୁ ଅବସର ଘୋଷଣା କରିଥିଲେ। ସେହିପରି ଭାରତର ଇଂଲଣ୍ଡ ଗସ୍ତ ପୂର୍ବରୁ, ରୋହିତ ୭ ମେ'ରେ ଟେଷ୍ଟ କ୍ରିକେଟରୁ ଅବସର ଘୋଷଣା କରିଥିଲେ । ଏବେ ସେ କେବଳ ଦିନିକିଆରେ ନଜର ଆସିବେ । ତେବେ ଏସବୁ ମଧ୍ୟରେ ଭାରତର ଜଣେ ଷ୍ଟାର ବୋଲର ଖଲିଲ ଅହମ୍ମଦ ଚାହୁଁଛନ୍ତି ଯେ ରୋହିତ ଶର୍ମା ଆଗାମୀ ଦଶ ବର୍ଷ ପାଇଁ ଭାରତର ଦିନିକିଆ ଦଳର ଅଧିନାୟକ ରୁହନ୍ତୁ ।

ରୋହିତ ଶର୍ମା ଅକ୍ଟୋବରରେ ଅଷ୍ଟ୍ରେଲିଆ ବିପକ୍ଷରେ ଦିନିକିଆ ସିରିଜ ପୂର୍ବରୁ ବ୍ରୋଙ୍କୋ ଟେଷ୍ଟ ଏବଂ ୟୋ-ୟୋ ଟେଷ୍ଟ ମଧ୍ୟ ପାସ୍ କରିଛନ୍ତି। କିନ୍ତୁ ଏହି ସିରିଜ ପରେ ପ୍ରଶ୍ନ ରହିବ ଯେ ରୋହିତ ଶର୍ମା ଟେଷ୍ଟ ଏବଂ ଟି-୨୦ରୁ ଅବସର ନେବା ପରେ ୨୦୨୭ ବିଶ୍ୱକପ ପର୍ଯ୍ୟନ୍ତ ଦିନିକିଆ ଖେଳିବେ କି ନାହିଁ ? କିନ୍ତୁ ଏହି ପ୍ରଶ୍ନ ମଧ୍ୟରେ, ଭାରତର ପେସ୍ ବୋଲର ଖଲିଲ ଅହମ୍ମଦ ରୋହିତ ଶର୍ମାଙ୍କ ସାମ୍ନାରେ ଏକ ବଡ଼ ଦାବି ରଖିଛନ୍ତି ।

ଭାରତର ଦ୍ରୁତ ବୋଲର ଖଲିଲ ଅହମ୍ମଦ ଜାତୀୟ ଗଣମାଧ୍ୟମରେ ଏକ ଆଲୋଚନାରେ କହିଛନ୍ତି ଯେ ରୋହିତ ଶର୍ମା ଆଗାମୀ ୧୦ ବର୍ଷ ପାଇଁ ଟିମ୍ ଇଣ୍ଡିଆର ଅଧିନାୟକ ହେବା ଉଚିତ । ଖଲିଲ ରୋହିତ ଶର୍ମାଙ୍କ ଅଧିନାୟକତ୍ୱରେ ଅନ୍ତର୍ଜାତୀୟ କ୍ରିକେଟ ଖେଳିଛନ୍ତି। ଖଲିଲ ଅହମ୍ମଦ କହିଛନ୍ତି ଯେ 'ମୋର ବ୍ୟକ୍ତିଗତ ମତ ହେଉଛି ଟିମ୍ ଇଣ୍ଡିଆର ଉନ୍ନତି ପାଇଁ ରୋହିତ ଶର୍ମା ଆଗାମୀ ୧୦ ବର୍ଷ ପାଇଁ ଅଧିନାୟକ ରହିବା ଉଚିତ'।

ଖଲିଲ୍ ଆହୁରି କହିଛନ୍ତି, ୨୦୧୮-୧୯ ସମୟରେ ମୁଁ ରୋହିତ ଶର୍ମାଙ୍କ ଅଧିନାୟକତ୍ୱରେ ଏସିଆ କପରେ ଖେଳିଥିଲି । ସେ ମୋତେ ବହୁତ ଆତ୍ମବିଶ୍ୱାସ ଦେଇଥିଲେ, ମୁଁ ତାଙ୍କଠାରୁ ଜୁନିୟର ହୋଇଥିଲେ ମଧ୍ୟ ମୋ ଭିତରେ କିଛି ସ୍ବତନ୍ତ୍ର ଅଛି ବୋଲି ମେୋାତେ କହିଥିଲେ । ଏତେ ସଫଳ କ୍ରିକେଟର ମୋ ସହିତ କଥା ହେବା ପାଇଁ ସମୟ ବାହାର କରି ମୋତେ ପ୍ରେରଣା ଦେଇଥିଲେ, ମୋର ଆତ୍ମବିଶ୍ୱାସକୁ ବଢ଼ାଇଥିଲେ ।

ସେହିପରି ଖଲିଲ ଅହମ୍ମଦ ଆହୁରି କହିଛନ୍ତି ଯେ '୨୦୧୯ରେ ଯେତେବେଳେ ଭାରତ ଏବଂ ବାଂଲାଦେଶ ମଧ୍ୟରେ ସିରିଜ୍ ଚାଲିଥିଲା । ରାଜକୋଟରେ ଖେଳାଯାଇଥିବା ଏକ ମ୍ୟାଚରେ ମୋର ଦିନ ଏତେ ଭଲ ନଥିଲା । ମୁଁ ସେହି ମ୍ୟାଚରେ ମାତ୍ର ଗୋଟିଏ ଓ୍ବିକେଟ ନେଇଥିଲି । ଏହା ପରେ ରୋହିତ ଶର୍ମା ଡ୍ରେସିଂ ରୁମରେ ମୋ ପାଖକୁ ଆସି କଥା ହୋଇଥିଲେ। ସେ ମୋତେ କହିଥିଲେ ଯେ ତୁମ ଭିତରେ କ'ଣ କ୍ଷମତା ଅଛି ତାହା ତୁମେ ଜାଣିନାହଁ।'

Argus News | argus news | Odisha Latest News, Breaking News, Trending News, Live TV