IPL ୨୦୨୬ର ୬୦ ତମ ମ୍ୟାଚ୍‌ରେ ମୁହାଁମୁହିଁ ହୋଇଥିଲେ କୋଲକାତା ନାଇଟ୍‌ ରାଇଡର୍ସ ଓ ଗୁଜରାଟ ଟାଇଟନ୍ସ । କୋଲକାତାର ଇଡେନ୍‌ ଗାର୍ଡେନରେ ଏହି ମ୍ୟାଚ୍‌ ଖେଳାଯାଇଥିଲା । ଏହି ମ୍ୟାଚ ଜିତି GT ପ୍ରଥମ ଦଳ ଭାବରେ ପ୍ଲେ ଅଫରେ ନିଜ ସ୍ଥାନ ପକ୍କା କରିପାରିଥାନ୍ତା । କିନ୍ତୁ ଗୁଜରାଟର ବିଜୟ ରଥକୁ କୋଲକାତା ଅଟକାଇଥିଲା । ଏହି ମ୍ୟାଚ୍‌ରେ KKR ୨୯ ରନ୍‌ରେ ଗୁଜରାଟ ଟାଇଟନ୍ସକୁ ପରାସ୍ତ କରିଥିଲା । ସବୁଠୁ ରୋଚକ କଥା ହେଉଛି ଲିଗ୍‌ ପର୍ଯ୍ୟାୟରେ ଏବେ କେବଳ ୧୦ଟି ମ୍ୟାଚ୍‌ ବାକି ଅଛି, କିନ୍ତୁ ଏପର୍ଯ୍ୟନ୍ତ କୌଣସି ଦଳ ପ୍ଲେ ଅଫ୍‌ରେ ସ୍ଥାନ ପକ୍କା କରିପାରିନି ।

ଗୁଜୁରାଟ ଟାଇଟାନ୍ସ ବିପକ୍ଷରେ କୋଲକାତା ନାଇଟ୍ ରାଇଡର୍ସର ବିଜୟ ପଏଣ୍ଟ ଟେବୁଲରେ କେବଳ ଗୋଟିଏ ପରିବର୍ତ୍ତନ ହୋଇଛି । ପଏଣ୍ଟ ଟେବୁଲରେ ଗୁଜୁରାଟ ଦ୍ୱିତୀୟ ସ୍ଥାନରେ ରହିଛି, ଯେତେବେଳେ କୋଲକାତା ଅଷ୍ଟମରୁ ସପ୍ତମ ସ୍ଥାନକୁ ଉଠିଛି । ଏହା କୋଲକାତାର ୧୨ ମ୍ୟାଚରେ ପଞ୍ଚମ ବିଜୟ ଥିଲା, ଯାହା ଫଳରେ KKR ୧୧ ପଏଣ୍ଟ ପାଇଛନ୍ତି ।

ଶୀର୍ଷ ୪ ଦଳ ଏବଂ ସେମାନଙ୍କର ପ୍ଲେଅଫ ସମ୍ଭାବନା

ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର ୧୨ ମ୍ୟାଚରୁ ଆଠଟି ମ୍ୟାଚ୍‌ରେ ବିଜୟ ଲାଭ କରି ପଏଣ୍ଟ ଟେବୁଲର ଶୀର୍ଷ ସ୍ଥାନରେ ଅଛି । RCB ଆଜି ପଞ୍ଜାବ କିଙ୍ଗ୍ସକୁ ପରାସ୍ତ କରି ପ୍ରଥମ ଦଳ ଭାବେ ପ୍ଲେ ଅଫରେ ନିଜ ସ୍ଥାନ ପକ୍କା କରିପାରେ । ତେବେ ଯଦି ପଞ୍ଜାବ ଆଜିର ମ୍ୟାଚ୍‌ରେ ପରାଜୟ ବରଣ କରେ ତେବେ ପ୍ଲେଅଫ୍‌ରେ ପହଞ୍ଚିବାର ସମ୍ଭାବନା ହ୍ରାସ ପାଇବ ।

ଗୁଜରାଟ ଟାଇଟାନ୍ସ ୧୩ ମ୍ୟାଚରୁ ଆଠଟି ଜିତି ଦ୍ୱିତୀୟ ସ୍ଥାନରେ ରହିଛି । ଗୁଜରାଟର ଏବେ କେବଳ ଗୋଟିଏ ମ୍ୟାଚ୍ ବାକି ଅଛି । ସନରାଇଜର୍ସ ହାଇଦ୍ରାବାଦ ୧୨ ମ୍ୟାଚ୍ ପରେ ୧୪ ପଏଣ୍ଟ ସହିତ ତୃତୀୟ ସ୍ଥାନରେ ଅଛି । SRH ର ପରବର୍ତ୍ତୀ ଦୁଇଟି ମ୍ୟାଚ୍ CSK ଏବଂ RCB ବିପକ୍ଷରେ ରହିଛି । ସେମାନଙ୍କର ପ୍ଲେଅଫ୍ ଆଶାକୁ ଉଜ୍ଜୀବିତ ରଖିବା ପାଇଁ ସେମାନଙ୍କୁ ଅତି କମରେ ଗୋଟିଏ ମ୍ୟାଚ୍ ଜିତିବାକୁ ପଡିବ ।

ପଞ୍ଚମ ସ୍ଥାନରେ ଥିବା ରାଜସ୍ଥାନ ରୟାଲ୍ସ ଆଜି ଦିଲ୍ଲୀ କ୍ୟାପିଟାଲ୍ସ ସହିତ ଖେଳିବ । RR ୧୧ ମ୍ୟାଚ୍‌ରୁ ଛଅଟି ଜିତିଛି ଏବଂ ସେମାନଙ୍କର ବାକି ତିନୋଟି ମଧ୍ୟରୁ ଅତି କମରେ ଦୁଇଟି ଜିତିବାକୁ ପଡିବ । ଅଷ୍ଟମ ସ୍ଥାନରେ ଥିବା ଦିଲ୍ଲୀ ଆଜି ହାରିଗଲେ ପ୍ଲେଅଫ୍ ଦୌଡ଼ରୁ ବାଦ ପଡ଼ିବ ।

ସେହିପରି ଷଷ୍ଠ ସ୍ଥାନରେ ଥିବା ଚେନ୍ନାଇ ସୁପର କିଙ୍ଗ୍ସ ୧୨ ମ୍ୟାଚରୁ ଛଅଟି ଜିତିଛି; ସେମାନେ ସେମାନଙ୍କର ଉଭୟ ମ୍ୟାଚ୍‌ରେ ବିଜୟ ଲାଭ କଲେ ୧୬ ପଏଣ୍ଟରେ ପହଞ୍ଚିପାରିବେ । ସେମାନଙ୍କର ପରବର୍ତ୍ତୀ ଦୁଇଟି ମ୍ୟାଚ୍‌ GT ଏବଂ SRH ବିପକ୍ଷରେ ଅଛି । ଏହି ଦୁଇଟି ମ୍ୟାଚ୍ ହିଁ ନିର୍ଣ୍ଣୟ କରିବ କିଏ ଯିବ ପ୍ଲେ ଅଫ୍‌କୁ ।