Rahul Batting Position / କେଏଲ୍ ରାହୁଲଙ୍କ ସହ ଘୋର ଅନ୍ୟାୟ ହୋଇଛି, ଗୌତମ ଗମ୍ଭୀରଙ୍କୁ ଟାର୍ଗେଟ୍ କଲେ ଶ୍ରୀକାନ୍ତ

ଲର୍ଡସରେ ଇଂଲଣ୍ଡ ବିପକ୍ଷ ତୃତୀୟ ଦିନିକିଆରେ ଭାରତର ପରାଜୟ ପରେ ଟିମ୍ ଇଣ୍ଡିଆର ବ୍ୟାଟିଂ କ୍ରମକୁ ନେଇ ଆରମ୍ଭ ହୋଇଛି ତୀବ୍ର ବିବାଦ । କେଏଲ୍ ରାହୁଲଙ୍କୁ ନମ୍ବର-୬ରେ ବ୍ୟାଟିଂକୁ ପଠାଇବା ନିଷ୍ପତ୍ତିକୁ ନେଇ ପୂର୍ବତନ ମୁଖ୍ୟ ଚୟନକର୍ତ୍ତା କୃଷ୍ଣମାଚାରୀ ଶ୍ରୀକାନ୍ତ ସିଧାସଳଖ ଗୌତମ ଗମ୍ଭୀର ଓ ଟିମ୍ ମ୍ୟାନେଜମେଣ୍ଟ ଉପରେ ବର୍ଷିଛନ୍ତି । ଏହାକୁ ସେ "ରାହୁଲଙ୍କ ପ୍ରତି ଘୋର ଅନ୍ୟାୟ" ବୋଲି କହିବା ସହ ବ୍ୟାଟିଂ କ୍ରମରେ ବାରମ୍ବାର ପରିବର୍ତ୍ତନ ଖେଳାଳିଙ୍କ ଆତ୍ମବିଶ୍ୱାସକୁ କ୍ଷତି ପହଞ୍ଚାଉଥିବା ଅଭିଯୋଗ କରିଛନ୍ତି ।

ନିଜ ୟୁଟ୍ୟୁବ୍ ଚ୍ୟାନେଲରେ ଶ୍ରୀକାନ୍ତ କହିଛନ୍ତି, “ଯେପରି ସଞ୍ଜୁ ସାମସନ ଓ ବୈଭବ ସୂର୍ଯ୍ୟବଂଶୀଙ୍କ ସହ କରାଯାଇଥିଲା, ସେହିଭଳି ଏବେ କେଏଲ୍ ରାହୁଲଙ୍କ ସହ ମଧ୍ୟ କରାଯାଉଛି । ଏତେ ବଡ଼ ଲକ୍ଷ୍ୟର ପିଛା କରୁଥିବା ବେଳେ ରାହୁଲଙ୍କ ଭଳି ବ୍ୟାଟରଙ୍କୁ ନମ୍ବର-୬ରେ ପଠାଇବା ଆଦୌ ବୁଝିହେଉ ନାହିଁ । ରାହୁଲ କ'ଣ ନମ୍ବର-୬ କିମ୍ବା ୭ର ବ୍ୟାଟ୍ସମ୍ୟାନ୍‌ ? ଏହା ତାଙ୍କ ପ୍ରତି ଘୋର ଅନ୍ୟାୟ ।”

ସେ ଆହୁରି କହିଛନ୍ତି ଯେ, ସେହି ମ୍ୟାଚ୍‌ରେ ଭାରତକୁ ଜୋସ୍ ବଟଲରଙ୍କ ଭଳି ପାଳି ସମ୍ଭାଳିବାକୁ ସକ୍ଷମ ଜଣେ ବ୍ୟାଟ୍ସମ୍ୟାନ୍‌ଙ୍କ ଆବଶ୍ୟକତା ଥିଲା । ଇଶାନ କିଶନ ଓ ଶ୍ରେୟସ ଆୟର ଶୀଘ୍ର ଆଉଟ୍ ହୋଇଯିବା ପରେ ଯଦି କେଏଲ୍ ରାହୁଲ ନମ୍ବର-୪ରେ ବ୍ୟାଟିଂ କରିବାକୁ ଆସିଥାନ୍ତେ, ତେବେ ସେ ବିରାଟ କୋହଲିଙ୍କ ସହ ୨୦୨୩ ବିଶ୍ୱକପ୍ ପରି ଏକ ମଜବୁତ ପାର୍ଟନରସିପ୍‌ କରିପାରିଥାନ୍ତେ । ରାହୁଲ ଆବଶ୍ୟକ ସମୟରେ ରନ୍‌ର ଗତି ବଢ଼ାଇବାର କ୍ଷମତା ମଧ୍ୟ ରଖନ୍ତି ।

ଅଧିକ ପଢ଼ନ୍ତୁ: BCCIର ବଡ଼ ନିଷ୍ପତ୍ତି! ଜାଣିଶୁଣି ନୋ-ବଲ୍ ପକାଇଲେ ମ୍ୟାଚ୍‌ରୁ ବାହାର ହେବେ ଖେଳାଳି

ଶ୍ରୀକାନ୍ତଙ୍କ ମତରେ, ରାହୁଲଙ୍କୁ ସେତେବେଳେ ବ୍ୟାଟିଂ ପାଇଁ ପଠାଯାଇଥିଲା, ଯେତେବେଳେ ମ୍ୟାଚ୍ ପ୍ରାୟ ଭାରତ ହାତରୁ ଖସିଯାଇଥିଲା । ସେହି ସମୟରେ ରନ୍ ରେଟ୍ ବହୁତ ବଢ଼ିଯାଇଥିଲା ଏବଂ ତାଙ୍କ ଉପରେ ଅନାବଶ୍ୟକ ଚାପ ସୃଷ୍ଟି ହୋଇଥିଲା । ଅକ୍ଷର ପଟେଲଙ୍କ ସହ ପ୍ରତି ଓଭରରେ ୧୫ ରନ୍ ହାରରେ ସ୍କୋର କରି ଦଳକୁ ଜିତାଇବା ସମ୍ଭବ ନଥିଲା ବୋଲି ସେ କହିଛନ୍ତି ।

ଲର୍ଡସ ଦିନିକିଆରେ ୩୮୮ ରନ୍‌ର ବିଶାଳ ଲକ୍ଷ୍ୟର ପିଛା କରୁଥିବା ଭାରତ ୨୭ ରନ୍‌ରେ ପରାସ୍ତ ହୋଇଥିଲା । ଏହି ପରାଜୟ ସହ ଭାରତ ଇଂଲଣ୍ଡ ବିପକ୍ଷ ତିନି ମ୍ୟାଚ୍‌ର ଦିନିକିଆ ସିରିଜ୍‌କୁ ୨-୧ରେ ହାରିଥିଲା ।

ଶ୍ରୀକାନ୍ତ କହିଛନ୍ତି ଯେ, କେଏଲ୍ ରାହୁଲ ପୂର୍ବରୁ ଭାରତ ପାଇଁ ଅନେକ କଠିନ ରନ୍‌ଚେଜ୍ ସଫଳ କରିଛନ୍ତି । ଯଦି ତାଙ୍କୁ ନମ୍ବର-୪ରେ ପଠାଯାଇଥାନ୍ତା, ତେବେ ସେ ବିରାଟ କୋହଲିଙ୍କ ସହ ଭଲ ପାର୍ଟନରସିପ୍‌ କରି ମ୍ୟାଚ୍‌କୁ ଶେଷ ପର୍ଯ୍ୟନ୍ତ ନେଇପାରିଥାନ୍ତେ ।

ସେ ଟିମ୍ ମ୍ୟାନେଜମେଣ୍ଟ ଉପରେ ବାରମ୍ବାର ବ୍ୟାଟିଂ କ୍ରମ ବଦଳାଇବାର ଅଭିଯୋଗ ଆଣି କହିଛନ୍ତି, ଏହା ଖେଳାଳିଙ୍କ ଆତ୍ମବିଶ୍ୱାସ ଉପରେ ଖରାପ ପ୍ରଭାବ ପକାଏ। ଏହାପୂର୍ବରୁ ସଞ୍ଜୁ ସାମସନ ଓ ଯୁବ ବ୍ୟାଟର ବୈଭବ ସୂର୍ଯ୍ୟବଂଶୀଙ୍କ ବ୍ୟବହାରକୁ ନେଇ ମଧ୍ୟ ଟିମ୍ ମ୍ୟାନେଜମେଣ୍ଟକୁ ସମାଲୋଚନାର ସାମ୍ନା କରିବାକୁ ପଡ଼ିଥିଲା ।