Lionel Messi Retirement / ଆଖିରେ ଲୁହ, ପାଦରେ ସେହି ଜାଦୁ... ବିଜୟ ସହ ଅନ୍ତର୍ଜାତୀୟ ଫୁଟବଲରୁ ମେସିଙ୍କ ବିଦାୟ

୨୧ ବର୍ଷର ଅନ୍ତର୍ଜାତୀୟ ଯାତ୍ରା... ଆଖିରେ ଲୁହ, ପାଦରେ ଜାଦୁ ଏବଂ ଶେଷ ମ୍ୟାଚରେ ବି ଗୋଲ୍ ସହ ଆସିଷ୍ଟ । ଆର୍ଜେଣ୍ଟିନା ଜର୍ସିରେ ଲିଓନେଲ୍ ମେସିଙ୍କ ଶେଷ ଅଧ୍ୟାୟ ମଧ୍ୟ ତାଙ୍କ କ୍ୟାରିୟର ଭଳି ଥିଲା ଐତିହାସିକ । ବେନିନ୍ ବିପକ୍ଷରେ ୩-୦ ବିଜୟ ସହ ବିଦାୟ ନେଇଥିବା ଫୁଟବଲର ଜାଦୁକର ମେସି ପୁଣିଥରେ ପ୍ରମାଣ କରିଦେଲେ—ମଞ୍ଚ ଯେତେ ବଡ଼ ହେଉ କିମ୍ବା ବିଦାୟର ମୁହୂର୍ତ୍ତ ଯେତେ ଭାବପ୍ରବଣ ହେଉ, ମେସି ମାନେ ହେଉଛି ଗୋଲ୍, ରେକର୍ଡ ଓ ଇତିହାସ ।

ମହାନ ଫୁଟବଲର୍ ଲିଓନେଲ୍ ମେସି ଅର୍ଜେଣ୍ଟିନା ପାଇଁ ତାଙ୍କର ୨୧ ବର୍ଷର ଦୀର୍ଘ ଅନ୍ତର୍ଜାତୀୟ କ୍ୟାରିୟରକୁ ଏକ ସ୍ମରଣୀୟ ଢଙ୍ଗରେ ଶେଷ କରିଛନ୍ତି । ମଙ୍ଗଳବାର ଖେଳାଯାଇଥିବା ବେନିନ୍ ବିପକ୍ଷ ମ୍ୟାଚରେ ଅର୍ଜେଣ୍ଟିନା ୩-୦ ଗୋଲରେ ବିଜୟୀ ହୋଇଥିଲା । ଏହି ମ୍ୟାଚରେ ମେସି ଗୋଟିଏ ଗୋଲ୍ ଦେବା ସହ ଦୁଇଟି ଗୋଲରେ ଆସିଷ୍ଟ କରି ନିଜର ଶେଷ ମ୍ୟାଚକୁ ଚିରସ୍ମରଣୀୟ କରିଛନ୍ତି ।

ମ୍ୟାଚର ୭୧ତମ ମିନିଟରେ ମେସି ପେନାଲ୍ଟିରୁ ଗୋଲ୍ କରିଥିଲେ । ଏହା ସହିତ ଦୁଇଟି ଗୋଲରେ ଆସିଷ୍ଟ ଦେଇଥିଲେ । ଅର୍ଥାତ୍ ଆର୍ଜେଣ୍ଟିନା ଜର୍ସିରେ ନିଜର ଶେଷ ମ୍ୟାଚରେ ମଧ୍ୟ ସେ ସେହି କାମ କରିଥିଲେ, ଯାହା ପାଇଁ ସାରା ବିଶ୍ୱରେ ସେ ପରିଚିତ—ଗୋଲ୍ କରିବା ଏବଂ ସାଥୀ ଖେଳାଳିଙ୍କ ପାଇଁ ସୁଯୋଗ ସୃଷ୍ଟି କରିବା ।
ଏହି ମ୍ୟାଚ ସମୟରେ ମେସି ଅନେକଥର ଭାବପ୍ରବଣ ହୋଇପଡ଼ିଥିଲେ । ଅର୍ଜେଣ୍ଟିନାର ଜାତୀୟ ସଙ୍ଗୀତ ବାଜିବା ସମୟରେ ତାଙ୍କ ଆଖିରେ ଲୁହ ଦେଖାଯାଇଥିଲା । ଷ୍ଟାଡିୟମ୍ ଅଭିମୁଖେ ଯିବା ସମୟରେ ମଧ୍ୟ ସେ ଆଖିରୁ ଲୁହ ପୋଛୁଥିବା ଦେଖିବାକୁ ମିଳିଥିଲା ।

ମେସି ୧୭ ଅଗଷ୍ଟ ୨୦୦୫ରେ ଆର୍ଜେଣ୍ଟିନା ପାଇଁ ଅନ୍ତର୍ଜାତୀୟ ଡେବ୍ୟୁ କରିଥିଲେ । ହଙ୍ଗେରୀ ବିପକ୍ଷ ମ୍ୟାଚରେ ତାଙ୍କ ଡେବ୍ୟୁ ଅତ୍ୟନ୍ତ ନାଟକୀୟ ଥିଲା । ମାତ୍ର ୯୦ ସେକେଣ୍ଡ ପଡ଼ିଆରେ ରହିବା ପରେ ତାଙ୍କୁ ରେଡ୍ କାର୍ଡ ଦେଖାଯାଇଥିଲା । କିନ୍ତୁ ସେହି ଖରାପ ଆରମ୍ଭ ପରେ ମେସି ଆଉ ପଛକୁ ଚାହିଁନଥିଲେ ।

୨୦୭ଟି ମ୍ୟାଚ ଖେଳି ଆର୍ଜେଣ୍ଟିନା ଜାତୀୟ ଦଳକୁ ବିଦାୟ ଦେଇଥିବା ମେସିଙ୍କ ନାମରେ ୧୨୬ଟି ଅନ୍ତର୍ଜାତୀୟ ଗୋଲ୍ ରହିଛି । ପୁରୁଷ ଫୁଟବଲରେ ସର୍ବାଧିକ ଅନ୍ତର୍ଜାତୀୟ ଗୋଲ୍ ଦେବା ତାଲିକାରେ ସେ କେବଳ କ୍ରିଷ୍ଟିଆନୋ ରୋନାଲ୍ଡୋଙ୍କ ପଛରେ ଅଛନ୍ତି। ରୋନାଲ୍ଡୋଙ୍କ ନାମରେ ୧୪୬ଟି ଗୋଲ୍ ରହିଛି ।

ମେସିଙ୍କ କ୍ୟାରିୟର କେବଳ ବ୍ୟକ୍ତିଗତ ରେକର୍ଡରେ ସୀମିତ ନୁହେଁ; ଆର୍ଜେଣ୍ଟିନା ସହ ତାଙ୍କର ଐତିହାସିକ ସଫଳତା ମଧ୍ୟ ଅନେକ । ୨୦୦୮ ବେଜିଂ ଅଲିମ୍ପିକ୍ସରେ ସେ ସ୍ୱର୍ଣ୍ଣ ପଦକ ଜିତିଥିଲେ । ଏହାପରେ ୨୦୨୧ ଓ ୨୦୨୪ରେ କୋପା ଆମେରିକା ଟାଇଟଲ୍ ଜିତିଥିଲେ । କିନ୍ତୁ ତାଙ୍କ କ୍ୟାରିୟରର ସବୁଠାରୁ ବଡ଼ ସଫଳତା ଆସିଥିଲା ୨୦୨୨ରେ, ଯେତେବେଳେ ସେ ଆର୍ଜେଣ୍ଟିନାକୁ ଫିଫା ବିଶ୍ୱକପ୍ ଚାମ୍ପିୟନ୍ କରାଇଥିଲେ ।

୨୦୨୬ ବିଶ୍ୱକପ୍ ମେସିଙ୍କ ଅନ୍ତର୍ଜାତୀୟ କ୍ୟାରିୟରର ଶେଷ ବଡ଼ ଟୁର୍ଣ୍ଣାମେଣ୍ଟ ଥିଲା । ଅର୍ଜେଣ୍ଟିନା ଏଥର ଚାମ୍ପିୟନ୍ ହୋଇପାରିନଥିଲେ ମଧ୍ୟ ରନର୍ସଅପ୍ ହୋଇଥିଲା । ମେସି ଟୁର୍ଣ୍ଣାମେଣ୍ଟରେ ୮ଟି ଗୋଲ୍ ଓ ୪ଟି ଆସିଷ୍ଟ କରିଥିଲେ ।

୨୧ ବର୍ଷର ଏହି ଅସାଧାରଣ ଯାତ୍ରାର ଶେଷରେ ମେସି କେବଳ ରେକର୍ଡ ଛାଡ଼ି ଯାଇନାହାନ୍ତି, ବରଂ ଆର୍ଜେଣ୍ଟିନା ଫୁଟବଲର ଇତିହାସରେ ନିଜର ନାମକୁ ଚିରସ୍ଥାୟୀ କରି ଯାଇଛନ୍ତି ।