Jayawardene Resignation / MI ଛାଡ଼ିଲେ ମହେଲା ଜୟବର୍ଦ୍ଧନେ, ହେଡ୍ କୋଚ୍ ପଦରୁ ଦେଲେ ଇସ୍ତଫା

IPL ୨୦୨୭ ପୂର୍ବରୁ ମୁମ୍ବାଇ ଇଣ୍ଡିଆନ୍ସରେ ବଡ଼ ପରିବର୍ତ୍ତନ । ଆଇପିଏଲର ଅନ୍ୟତମ ସଫଳ ଫ୍ରାଞ୍ଚାଇଜ୍‌ ମୁମ୍ବାଇ ଇଣ୍ଡିଆନ୍ସ ସହ ନିଜ ଯାତ୍ରା ଶେଷ କରିଛନ୍ତି ଶ୍ରୀଲଙ୍କାର ପୂର୍ବତନ ବ୍ୟାଟ୍ସମ୍ୟାନ୍‌ ମହେଲା ଜୟବର୍ନ୍ଧନେ । ସେ ମୁମ୍ବାଇ ଇଣ୍ଡିଆନ୍ସର ହେଡ୍ କୋଚ୍ ପଦ ଛାଡ଼ିଥିବା ନେଇ ଫ୍ରାଞ୍ଚାଇଜି ପକ୍ଷରୁ ସୂଚନା ଦିଆଯାଇଛି । ତାଙ୍କ ବିଦାୟ ପରେ ଦଳର ଆଗାମୀ ରଣନୀତି ଏବଂ ଅଧିନାୟକ ପଦକୁ ନେଇ କ୍ରିକେଟ୍ ମହଲରେ ଚର୍ଚ୍ଚା ଜୋର୍ ଧରିଛି ।

ଜୟବର୍ଦ୍ଧନେ ପୂର୍ବରୁ ୨୦୧୭ରୁ ୨୦୨୨ ପର୍ଯ୍ୟନ୍ତ ମୁମ୍ବାଇ ଇଣ୍ଡିଆନ୍ସର ହେଡ୍ କୋଚ୍ ଭାବେ କାର୍ଯ୍ୟ କରିଥିଲେ । ଏହି ସମୟରେ ଦଳ ଅନେକ ସଫଳତା ହାସଲ କରିଥିଲା । ପରେ ୨୦୨୨ରୁ ୨୦୨୪ ପର୍ଯ୍ୟନ୍ତ ସେ ମୁମ୍ବାଇ ଇଣ୍ଡିଆନ୍ସ ଫ୍ରାଞ୍ଚାଇଜିର ଗ୍ଲୋବାଲ୍ ହେଡ୍ ଅଫ୍ ପରଫର୍ମାନ୍ସ ଭାବେ ଦାୟିତ୍ୱ ତୁଲାଇଥିଲେ ।

୨୦୨୫ରେ ମାର୍କ ବାଉଚରଙ୍କ ସ୍ଥାନରେ ପୁଣି ଥରେ ମୁମ୍ବାଇ ଇଣ୍ଡିଆନ୍ସର ହେଡ୍ କୋଚ୍ ଭାବେ ଫେରିଥିଲେ ଜୟବର୍ଦ୍ଧନେ । ତାଙ୍କ ନେତୃତ୍ୱରେ ୨୦୨୫ ଆଇପିଏଲ୍‌ରେ ଦଳ କ୍ୱାଲିଫାୟର୍-୨ ପର୍ଯ୍ୟନ୍ତ ପହଞ୍ଚିଥିଲା । ତେବେ ଦଳର ଷଷ୍ଠ ଆଇପିଏଲ୍ ଟ୍ରଫି ଜିତିବାର ସ୍ୱପ୍ନ ପୂରଣ ହୋଇପାରି ନଥିଲା । ଅନ୍ୟପକ୍ଷରେ, ୨୦୨୬ ସିଜିନ୍‌ରେ ମୁମ୍ବାଇ ଇଣ୍ଡିଆନ୍ସର ପ୍ରଦର୍ଶନ ନିରାଶାଜନକ ରହିଥିଲା ଏବଂ ଦଳ ପଏଣ୍ଟ ଟେବୁଲ୍‌ରେ ନବମ ସ୍ଥାନରେ ରହିଥିଲା ।

“Mumbai Indians has been a very special part of my journey for over a decade now. The players, coaching team, the incredible support of the #OneFamily and above all the fans have made this an experience I will always treasure. Together, we have shared some unforgettable moments, overcome challenges and built something we can all be proud of. I want to sincerely thank Mrs. Nita Ambani and Akash Ambani for their unwavering trust, support and friendship over the years. I leave with immense pride in what we have achieved together and will always carry a special place in my heart for MI. I wish the team every success in the years ahead.” - Mahela Jayawardene

— Mumbai Indians (@mipaltan) October 17, 2026

ଦଳ ଛାଡ଼ିବା ପରେ ଜୟବର୍ଦ୍ଧନେ କହିଛନ୍ତି, “ମୋ ହୃଦୟରେ MI ପାଇଁ ସବୁବେଳେ ଏକ ବିଶେଷ ସ୍ଥାନ ରହିବ । ଆମେ ମିଳିମିଶି ଯାହା ହାସଲ କରିଛୁ, ସେଥିପାଇଁ ମୁଁ ଗର୍ବିତ । ଆଗାମୀ ଦିନ ପାଇଁ ଦଳକୁ ମୋର ଶୁଭକାମନା ।”

ଏପଟେ ଜୟବର୍ଦ୍ଧନେଙ୍କ ବିଦାୟ ପରେ ମୁମ୍ବାଇ ଇଣ୍ଡିଆନ୍ସର ଅଧିନାୟକ ପଦକୁ ନେଇ ମଧ୍ୟ ଚର୍ଚ୍ଚା ବଢ଼ିଛି । ରିପୋର୍ଟ ଅନୁସାରେ, ରୋହିତ ଶର୍ମାଙ୍କୁ ପୁଣି ଥରେ ଦଳର ଅଧିନାୟକ କରିବା ନେଇ ମ୍ୟାନେଜମେଣ୍ଟ ବିଚାର କରୁଥିବା କୁହାଯାଉଛି । ତେବେ ଏନେଇ ଫ୍ରାଞ୍ଚାଇଜି ପକ୍ଷରୁ କୌଣସି ଅଧିକାରିକ ଘୋଷଣା କରାଯାଇନାହିଁ ।
ଏବେ ସମସ୍ତଙ୍କ ନଜର ମୁମ୍ବାଇ ଇଣ୍ଡିଆନ୍ସର ପରବର୍ତ୍ତୀ ହେଡ୍ କୋଚ୍ କିଏ ହେବେ ଏବଂ ରୋହିତ ଶର୍ମାଙ୍କୁ ପୁଣି ଅଧିନାୟକ ଦାୟିତ୍ୱ ମିଳିବ କି ନାହିଁ, ସେ ଉପରେ ରହିଛି ।