କ୍ରିକେଟ୍‌ ହେଉଛି ଅନିଶ୍ଚିତତା ଖେଳ । ଆଉ କ୍ରିକେଟ୍‌ ଜଣଙ୍କୁ ହିରୋ ଏବଂ ଜିରୋ ମଧ୍ୟ ବନାଇପାରେ । ଯାହାର ସଦ୍ୟତମ ଉଦାହରଣ ଦେଖିବାକୁ ମିଳିଛି ନ୍ୟୁଜିଲାଣ୍ଡର ଘରୋଇ ଟି-୨୦ ଟୁର୍ଣ୍ଣାମେଣ୍ଟ ସୁପର ସ୍ମାସ୍‌ରେ । କ୍ରିକେଟ୍ ପ୍ରେମୀମାନେ ପୁଣି ଥରେ ଦେଖିଛନ୍ତି ଯେ ଏହି ଖେଳରେ ସମୟ କେତେ ଶୀଘ୍ର ପରିବର୍ତ୍ତନ ହୁଏ । ଜଣେ ଖେଳାଳି ଯିଏ ତାଙ୍କର ପୂର୍ବ ମ୍ୟାଚ୍‌ରେ ଖାତା ଖୋଲିପାରିନଥିଲେ, ସେ ୪୮ ଘଣ୍ଟା ମଧ୍ୟରେ ଦଳର ସବୁଠାରୁ ବଡ଼ ମ୍ୟାଚ୍‌ ଓ୍ବିନର ହୋଇଛନ୍ତି । ଏହା ହେଉଛି ନ୍ୟୁଜିଲାଣ୍ଡର ଅଭିଜ୍ଞ ବ୍ୟାଟ୍ସମ୍ୟାନ୍ ମାର୍ଟିନ୍ ଗୁପ୍ଟିଲଙ୍କ କାହାଣୀ । ଯିଏ ମାତ୍ର 23 ମିନିଟ୍ ମଧ୍ୟରେ ମ୍ୟାଚ୍‌ର ଗତିକୁ ସମ୍ପୂର୍ଣ୍ଣ ବଦଳାଇ ଦେଇଥିଲେ ।

ଏହି ମ୍ୟାଚ୍‌ କ୍ୟାଣ୍ଟରବରୀ ଏବଂ ଅକଲ୍ୟାଣ୍ଡ ମଧ୍ୟରେ ମ୍ୟାଚ୍ ଖେଳାଯାଇଥିଲା । ପ୍ରଥମେ ବ୍ୟାଟିଂ କରି କାଣ୍ଟରବରୀର ଦଳ ୨୦ ଓଭରରେ ମାତ୍ର ୧୩୨ ରନ୍‌ର କରିଥିଲା । ଅକଲ୍ୟାଣ୍ଡ ଦଳର ବୋଲରଙ୍କ ସାମ୍ନାରେ ଅଧିକ ସମୟ ତିଷ୍ଠିପାରିନଥିଲେ କାଣ୍ଟରବରୀର ବ୍ୟାଟ୍ସମ୍ୟାନ୍‌ । ଦଳ ପକ୍ଷରୁ ଲିଓ କାର୍ଟର ସର୍ବାଧିକ ୩୯ ରନ୍ କରିଥିଲେ । କିନ୍ତୁ ଅନ୍ୟ କୌଣସି ଖେଳାଳି ବଡ଼ ଇନିଂସ ସ୍କୋର କରିପାରି ନଥିଲେ ।

ଅକଲ୍ୟାଣ୍ଡର ଦ୍ରୁତ ଆରମ୍ଭ

୧୩୩ ରନର ଟାର୍ଗେଟକୁ ପିଛା କରି ଅକଲ୍ୟାଣ୍ଡ ଆରମ୍ଭରୁ ଏକ ଆକ୍ରମଣାତ୍ମକ ଆଭିମୁଖ୍ୟ ଗ୍ରହଣ କରିଥିଲେ । ଓପନର ବ୍ୟାଟ୍ସମ୍ୟାନ୍‌ମାନେ ଆରମ୍ଭରୁ ଆକ୍ରମଣାତ୍ମକ ଖେଳି ଦଳର ସ୍କୋରକୁ ମାତ୍ର ୫ ଓଭରରେ ୬୦ ଅତିକ୍ରମ କରାଇଥିଲେ । ଯଦିଓ ଗୋଟିଏ ଓ୍ବିକେଟ୍‌ ପତନ ହୋଇଥିଲା କିନ୍ତୁ ଦଳର ଗତିକୁ ବିଶେଷ ପ୍ରଭାବିତ କରିନଥିଲା ।

ମାର୍ଟିନ୍ ଗୁପ୍ଟିଲ୍‌ଙ୍କ ୨୩ ମିନିଟ୍‌ର ଷ୍ଟର୍ମିଂ ଇନିଂସ୍‌

ପ୍ରଥମ ୱିକେଟ୍ ପଡ଼ିବା ପରେ ମାର୍ଟିନ୍ ଗୁପ୍ଟିଲ୍‌ କ୍ରିଜ୍‌କୁ ଆସିଥିଲେ । ଏହି ଖେଳାଳି ପୂର୍ବ ମ୍ୟାଚ୍‌ରେ ଶୂନ୍ୟ ରନ୍‌ରେ ଆଉଟ୍ ହୋଇଥିଲେ । ତଥାପି ଏହି ମ୍ୟାଚ୍‌ରେ ଗୁପ୍ଟିଲ୍‌ଙ୍କ ଶୈଳୀ ସମ୍ପୂର୍ଣ୍ଣ ଭିନ୍ନ ଥିଲା । ସେ ଆସିବା ମାତ୍ରେ ବଡ଼ ସଟ୍‌ ଖେଳିବା ଆରମ୍ଭ କରିଥିଲେ ।

ଗୁପ୍ଟିଲ୍‌ କ୍ରିଜ୍‌ରେ କେବଳ ୨୩ ମିନିଟ୍‌ ବିତାଇଥିଲେ, କିନ୍ତୁ ସେହି ସମୟରେ ସେ ମ୍ୟାଚ୍‌କୁ ସମ୍ପୂର୍ଣ୍ଣ ଓ୍ବାନ୍‌ ସାଇଡ୍‌ କରିଦେଇଥଇଲେ । ସେ ୧୫ ବଲ୍‌ରେ ଅପରାଜିତ ୩୯ ରନ୍‌ କରିଥିଲେ । ଏହି ଛୋଟ କିନ୍ତୁ ବିସ୍ଫୋରକ ଇନିଂସ୍‌ରେ ସେ ଦୁଇଟି ଚୌକା ଏବଂ ଚାରିଟି ଛକା ମାରିଥିଲେ । ତାଙ୍କର ଷ୍ଟ୍ରାଇକ୍‌ ରେଟ୍‌ ୨୬୦ ଥିଲା, ଯାହା ଟି-20 କ୍ରିକେଟ୍‌ରେ ଯେକୌଣସି ବ୍ୟାଟ୍ସମ୍ୟାନ୍‌ଙ୍କ ପାଇଁ ବହୁତ ଉଚ୍ଚ ବୋଲି ବିବେଚନା କରାଯାଏ ।

ଗୁପ୍ଟିଲଙ୍କ ବିସ୍ଫୋରକ ବ୍ୟାଟିଂ ଅକଲ୍ୟାଣ୍ଡକୁ ଶୀଘ୍ର ଲକ୍ଷ୍ୟ ହାସଲ କରିବାରେ ସାହାଯ୍ୟ କରିଥିଲା । ଦଳ ମାତ୍ର ୧୦.୧ ଓଭରରେ ମ୍ୟାଚ୍ ସମାପ୍ତ କରି ୯ ୱିକେଟରେ ବିଜୟ ହାସଲ କରିଥିଲା । ଏହି ବିଜୟ ମଧ୍ୟ ସ୍ୱତନ୍ତ୍ର ଥିଲା କାରଣ ମାତ୍ର ୪୮ ଘଣ୍ଟା ମଧ୍ୟରେ ଗୁପ୍ଟିଲ ଜିରୋରୁ ହିରୋ ହୋଇଛନ୍ତି ।