୨୦୨୬ ଟି-୨୦ ବିଶ୍ୱକପରୁ ବିଦା ହୋଇଛି ଅଷ୍ଟ୍ରେଲିଆ । ଜିମ୍ବାଓ୍ବେ ଓ ଶ୍ରୀଲଙ୍କାଠୁ ପରାସ୍ତ ହୋଇ ଗ୍ରୁପ୍‌ ଷ୍ଟେଜ୍‌ରୁ ବାଦ୍ ପଡ଼ିଛି ଅଷ୍ଟ୍ରେଲିଆ । ୨୦୦୯ ଟି-୨୦ ବିଶ୍ବକପ୍‌ ପରେ ୨୦୨୬ରେ ଦ୍ବିତୀୟ ଥର ପାଇଁ ଗ୍ରୁପ୍‌ ଷ୍ଟେଜ୍‌ରୁ ବିଦା ହୋଇଛି ଅଷ୍ଟ୍ରେଲିଆ । ତେବେ ଏହାରି ମଧ୍ୟରେ ଟିମ୍ ଇଣ୍ଡିଆର ପୂର୍ବତନ କ୍ରିକେଟର ମହମ୍ମଦ କୈଫ ଏକ ଗୁରୁତ୍ବପୂର୍ଣ୍ଣ ବୟାନ ଦେଇଛନ୍ତି ।

କୈଫ କହିଛନ୍ତି ଯେ ଯଦି ହାର୍ଦ୍ଦିକ ପାଣ୍ଡ୍ୟା ୨୦୨୩ ଦିନିକିଆ ବିଶ୍ୱକପ୍ ଫାଇନାଲରେ ଖେଳିଥାନ୍ତେ, ତେବେ ଭାରତ ଅଷ୍ଟ୍ରେଲିଆକୁ ପରାସ୍ତ କରିଥାନ୍ତା । ତାଙ୍କର ଏହି ବୟାନ ପୁଣି ଥରେ ଅହମ୍ମଦାବାଦ ଫାଇନାଲର ସ୍ମୃତିକୁ ଫେରାଇ ଆଣିଛି । ଭାରତ ୨୦୨୩ ଏକଦିବସୀୟ ବିଶ୍ୱକପ ଫାଇନାଲରେ ଅଷ୍ଟ୍ରେଲିଆଠାରୁ ୬ ୱିକେଟରେ ପରାସ୍ତ ହୋଇଥିଲା ।

ହାର୍ଦ୍ଦିକ ପାଣ୍ଡ୍ୟା ଆଘାତ ସମସ୍ୟା ଯୋଗୁଁ ଅଷ୍ଟ୍ରେଲିଆ ବିପକ୍ଷରେ ଫାଇନାଲ ମ୍ୟାଚ୍‌ ଖେଳିପାରିନଥିଲେ । ଭାରତ ବିଶ୍ୱକପ୍‌ ଫାଇନାଲରେ ୨୪୦ ରନ୍ କରିଥିଲା । କିନ୍ତୁ ଟ୍ରାଭିସଙ୍କ ବିସ୍ଫୋରକ ୧୩୭ ରନ୍ ଇନିଂସ ଅଷ୍ଟ୍ରେଲିଆକୁ ୭ ଓଭର ପୂର୍ବରୁ ବିଜୟୀ କରିଥିଲା ।

କୈଫ କହିଛନ୍ତି ଯେ ୨୦୨୩ ବିଜୟ ପରେ ଅଷ୍ଟ୍ରେଲିଆକୁ ଏକ ଶକ୍ତିଶାଳୀ ଦଳ ଭାବରେ ବିବେଚନା କରାଯାଉଥିଲା । କିନ୍ତୁ ସେବେଠାରୁ ସେମାନଙ୍କ ପ୍ରଦର୍ଶନ ହ୍ରାସ ପାଇଛି । ସେ ଲେଖିଛନ୍ତି, "ଯଦି ହାର୍ଦ୍ଦିକ ପାଣ୍ଡ୍ୟା ଅହମ୍ମଦାବାଦ ଫାଇନାଲରେ ଖେଳିଥାନ୍ତେ, ତେବେ ଅଷ୍ଟ୍ରେଲିଆ ସେଠାରେ ମଧ୍ୟ ହାରିଥାନ୍ତା ।"

କୈଫ୍ ଲେଖିଛନ୍ତି, "୨୦୨୩ ମସିହା ୫୦ ଓଭର ବିଶ୍ୱକପ୍ ଜିତିବା ପରେ ସେମାନଙ୍କୁ ଶକ୍ତିଶାଳୀ ଅଷ୍ଟ୍ରେଲିଆନ୍ କୁହାଯାଉଥିଲା । ଏହା ପରେ କିନ୍ତୁ ସେମାନଙ୍କର ଭାଗ୍ୟ ଖରାପ ହେବା ଆରମ୍ଭ ହୋଇଥିଲା । ୨୦୨୪ ଟି-୨୦ ବିଶ୍ୱକପ୍, ୨୦୨୫ ଚାମ୍ପିଅନ୍ସ ଟ୍ରଫି ଏବଂ ୨୦୨୫ ବିଶ୍ୱ ଟେଷ୍ଟ ଚାମ୍ପିଅନସିପରେ ସେମାନେ ଶକ୍ତିଶାଳୀ ନଥିଲେ ।
୨୦୨୩ ବିଶ୍ୱକପ୍ ଜିତିବା ପରେ, ଆଇସିସି ଟୁର୍ଣ୍ଣାମେଣ୍ଟରେ ଅଷ୍ଟ୍ରେଲିଆର ପ୍ରଦର୍ଶନ ନିରନ୍ତର ନିରାଶାଜନକ ରହିଛି । ୨୦୨୪ ଟି-୨୦ ବିଶ୍ୱକପ୍‌ରେ ସେମାନେ ଆଫଗାନିସ୍ତାନଠାରୁ ହାରି ସେମିଫାଇନାଲ୍ ପହଞ୍ଚିପାରିନଥିଲେ । ୨୦୨୫ ଚାମ୍ପିଅନ୍ସ ଟ୍ରଫିରେ ସେମାନେ ସେମିଫାଇନାଲ୍‌ରେ ଭାରତଠାରୁ ପରାସ୍ତ ହୋଇ ଟୁର୍ଣ୍ଣାମେଣ୍ଟରୁ ବାଦ୍‌ ପଡ଼ିଥିଲେ । ଏହା ବ୍ୟତୀତ ଆଇସିସି ଫାଇନାଲ୍‌ରେ ସେମାନଙ୍କର ଦଶନ୍ଧି ଧରି ରହିଥିବା ପ୍ରାଧାନ୍ୟ ୨୦୨୩-୨୫ ବିଶ୍ୱ ଟେଷ୍ଟ ଚାମ୍ପିଅନସିପ୍ ଫାଇନାଲ୍‌ରେ ଦକ୍ଷିଣ ଆଫ୍ରିକାଠାରୁ ହାରିବା ସହିତ ଶେଷ ହୋଇଥିଲା ।

୨୦୨୬ ଟି-୨୦ ବିଶ୍ୱକପରେ ଅଷ୍ଟ୍ରେଲିଆର ଅଭିଯାନ ଅତ୍ୟନ୍ତ ନିରାଶାଜନକ ଥିଲା । ୨୦୨୧ ଚାମ୍ପିଅନ୍ ଗ୍ରୁପ୍ ପର୍ଯ୍ୟାୟରେ ବାଦ ପଡ଼ିଥିଲା । ଆୟର୍ଲାଣ୍ଡ ବିପକ୍ଷରେ ସେମାନଙ୍କର ଏକମାତ୍ର ବିଜୟ ଥିଲା । କିନ୍ତୁ ଜିମ୍ବାୱେ ବିପକ୍ଷରେ ୨୩ ରନର ଆଶ୍ଚର୍ଯ୍ୟଜନକ ପରାଜୟ ସେମାନଙ୍କର ସୁଯୋଗକୁ ନଷ୍ଟ କରିଦେଲା । ବ୍ଲେସିଂ ମୁଜାରାବାନି ଚାରି ୱିକେଟ ନେଇ କଙ୍ଗାରୁମାନଙ୍କୁ ୧୪୬ ରନରେ ଅଲଆଉଟ୍ କରିଥିଲେ । ସେହିପରି ସହ-ଆୟୋଜକ ଶ୍ରୀଲଙ୍କା ସେମାନଙ୍କୁ ଆଠ ୱିକେଟରେ ପରାସ୍ତ କରିଥିଲା । ଶେଷରେ ଆୟର୍ଲାଣ୍ଡ ବନାମ ଜିମ୍ବାୱେ ମ୍ୟାଚ୍ ବର୍ଷା କାରଣରୁ ବାତିଲ ହେବା ପରେ ଅଷ୍ଟ୍ରେଲିଆର ସୁପର ୮ରେ ପହଞ୍ଚିବା ସମ୍ଭାବନା ଶେଷ ହୋଇଥିଲା ।