ଭାରତ 'A' ଏବଂ ଶ୍ରୀଲଙ୍କା 'A' ମଧ୍ୟରେ ତ୍ରିରାଷ୍ଟ୍ରୀୟ ଦିନିକିଆ ସିରିଜ୍‌ର ପ୍ରଥମ ମ୍ୟାଚ୍‌ ଡାମ୍ବୁଲାରେ ଖେଳାଯାଉଛି । ଏହି ମ୍ୟାଚ୍‌ରେ ୧୫ ବର୍ଷୀୟ ବିସ୍ମୟ ବାଳକ ବୈଭବ ସୂର୍ଯ୍ୟବଂଶୀ ଫେଲ୍ ହୋଇଛନ୍ତି । ଆଇପିଏଲ ୨୦୨୬ରେ ଚମତ୍କାର ପ୍ରଦର୍ଶନ କରିଥିବା ସୂର୍ଯ୍ୟବଂଶୀଙ୍କ ଉପରେ ଭାରତୀୟ ପ୍ରଶଂସକମାନେ ବହୁତ ଆଶା ରଖିଥିଲେ । କିନ୍ତୁ ସେ ପ୍ରଥମ ଦିନିକିଆରେ ମାତ୍ର ୧୪ ରନ୍‌ କରି ଆଉଟ୍‌ ହୋଇଥିଲେ ।

ଭାରତ 'A' ଇନିଂସ ସମୟରେ ବୈଭବ ସୂର୍ଯ୍ୟବଂଶୀ ପ୍ରାରମ୍ଭରେ କିଛି ଆକର୍ଷଣୀୟ ସଟ୍ ଖେଳିଥିଲେ । କିନ୍ତୁ ସେ ତାଙ୍କ ଏହି ଆରମ୍ଭକୁ ବଡ଼ ଇନିଂସରେ ପରିଣତ କରିପାରିନଥିଲେ । ସେ ମାତ୍ର ୧୨ ବଲ୍‌ରେ ୧୪ ରନ୍‌ କରି ପ୍ୟାଭିଲିୟନ୍‌ ଫେରିଥିଲେ ।

ବୈଭବଙ୍କ ୱିକେଟ୍ ଶ୍ରୀଲଙ୍କା 'A' ଦ୍ରୁତ ବୋଲର ମହମ୍ମଦ ଶିରାଜ ନେଇଥିଲେ । ଇନିଂସର ଚତୁର୍ଥ ଓଭରର ଚତୁର୍ଥ ବଲରେ ଶିରାଜଙ୍କ ବଲ୍‌ରେ ବୈଭବ ଆଉଟ୍ ହୋଇଥିଲେ । ବୈଭବଙ୍କ ଓ୍ବିକେଟ୍‌ ନେବା ପରେ ବେଶ୍‌ ଉତ୍ସାହିତ ଥିଲେ ଶ୍ରୀଲଙ୍କା ଖେଳାଳି । ଶ୍ରୀଲଙ୍କା ଦଳର ଏହି ପ୍ରତିକ୍ରିୟା ସ୍ପଷ୍ଟ ଭାବେ ଦର୍ଶାଉଥିଲା ଯେ ଶ୍ରୀଲଙ୍କା A ପାଇଁ ବୈଭବଙ୍କ ଓ୍ବିକେଟ୍‌ କେତେ ଗୁରୁତ୍ବପୂର୍ଣ୍ଣ ଥିଲା ।

ଅଧିକ ପଢ଼ନ୍ତୁ: ହାର୍ଦ୍ଦିକ-ସୂର୍ଯ୍ୟଙ୍କ ମଧ୍ୟରେ ବଡ଼ ଫାଟ…ଇନଷ୍ଟାଗ୍ରାମରେ କଲେ ଅନଫଲୋ, ମୁମ୍ବାଇ ଇଣ୍ଡିଆନ୍ସରେ ବଢ଼ିଲା ଚର୍ଚ୍ଚା

ବୈଭବ ସୂର୍ଯ୍ୟବଂଶୀ ଚଳିତ ଆଇପିଏଲରେ ତାଙ୍କ ବିସ୍ଫୋରକ ବ୍ୟାଟିଂ ପାଇଁ ଚର୍ଚ୍ଚାରେ ରହିଥିଲେ । ତେଣୁ ଆଜିର ମ୍ୟାଚ୍‌ରେ ବୈଭବଙ୍କଠାରୁ ବଡ଼ ଇନିଂସ ଆଶା କରାଯାଉଥିଲା । କିନ୍ତୁ ସେ ଶ୍ରୀଲଙ୍କା A ବିପକ୍ଷରେ ସେହି ଆଶା ପୂରଣ କରିପାରିନଥିଲେ ।

ବୈଭବ ସୂର୍ଯ୍ୟବଂଶୀ ନିକଟରେ ଶେଷ ହୋଇଥିବା IPL ୨୦୨୬ରେ ଏକ ଚମତ୍କାର ପ୍ରଦର୍ଶନ କରିଥିଲେ । IPL 2026 ରେ ବୈଭବ ୭୭୬ ରନ କରିଥିଲେ, ତାଙ୍କର ଷ୍ଟ୍ରାଇକ୍ ରେଟ୍ ୨୩୭+ ଥିଲା ଏବଂ ୭୨ ଛକା ମାରିଥିଲେ। ସେ ଅରେଞ୍ଜ କ୍ୟାପ୍ ସମେତ ପାଞ୍ଚଟି ପୁରସ୍କାର ମଧ୍ୟ ଜିତିଥିଲେ ।