Siraj Hyderabad Captain / ରଣଜୀ ଟ୍ରଫିରେ ସିରାଜଙ୍କୁ ବଡ଼ ଦାୟିତ୍ୱ, ହାଇଦ୍ରାବାଦର ଅଧିନାୟକ ହେଲେ ମହମ୍ମଦ ସିରାଜ

ବୋଲିଂରେ ନିଜ ଦମ୍ ଦେଖାଇବା ପରେ ଏବେ ଅଧିନାୟକ ଭାବେ ଦେଖାଇବେ ନେତୃତ୍ବର କମାଲ । ଭାରତୀୟ ଦ୍ରୁତ ବୋଲର ମହମ୍ମଦ ସିରାଜଙ୍କୁ ମିଳିଲା ବଡ଼ ଦାୟିତ୍ୱ । ରଣଜୀ ଟ୍ରଫି ୨୦୨୬-୨୭ ସିଜିନ୍‌ରେ ହାଇଦ୍ରାବାଦ ଦଳର ଅଧିନାୟକ ହେବେ ସିରାଜ । ଶୁକ୍ରବାର ହାଇଦ୍ରାବାଦ କ୍ରିକେଟ୍ ଆସୋସିଏସନ୍ ପକ୍ଷରୁ ଏନେଇ ଅଧିକାରିକ ଘୋଷଣା କରାଯାଇଛି ।

ରଣଜୀ ଟ୍ରଫିର ଗ୍ରୁପ୍ ପର୍ଯ୍ୟାୟ ମ୍ୟାଚ୍ ଅକ୍ଟୋବର ୧୧ରୁ ଆରମ୍ଭ ହେବ । ହାଇଦ୍ରାବାଦ ତା'ର ପ୍ରଥମ ମ୍ୟାଚ୍ ତ୍ରିପୁରା ବିପକ୍ଷରେ ଖେଳିବ । ଏହି ସିଜିନ୍ ପାଇଁ ଦଳର ଅଧିନାୟକ ଓ ଉପଅଧିନାୟକ ଚୟନ ନେଇ ହାଇଦ୍ରାବାଦ କ୍ରିକେଟ୍ ଆସୋସିଏସନ୍‌ର ସିନିୟର ସିଲେକ୍ସନ୍ କମିଟି ବୈଠକ କରିଥିଲା । ବୈଠକରେ ମହମ୍ମଦ ସିରାଜଙ୍କୁ ଅଧିନାୟକ ଏବଂ ଚାମା ମିଲିନ୍ଦଙ୍କୁ ଉପଅଧିନାୟକ କରିବା ନେଇ ସର୍ବସମ୍ମତିରେ ନିଷ୍ପତ୍ତି ହୋଇଛି ।

ସିରାଜ ୨୦୧୫-୧୬ ରଣଜୀ ଟ୍ରଫି ସିଜିନ୍‌ରେ ହାଇଦ୍ରାବାଦ ପାଇଁ ନିଜର ଫର୍ଷ୍ଟ କ୍ଲାସ୍ ଡେବ୍ୟୁ କରିଥିଲେ । ଏହାର ପରବର୍ତ୍ତୀ ସିଜିନ୍‌ରେ ଜବରଦସ୍ତ ବୋଲିଂ କରି ସେ ସମସ୍ତଙ୍କ ନଜରକୁ ଆସିଥିଲେ । ୨୦୧୬-୧୭ ରଣଜୀ ସିଜିନ୍‌ରେ ସେ ମୋଟ ୪୧ଟି ୱିକେଟ୍ ନେଇ ହାଇଦ୍ରାବାଦର ସର୍ବାଧିକ ୱିକେଟ୍ ଟେକର ସାବ୍ୟସ୍ତ ହୋଇଥିଲେ ।
୩୨ ବର୍ଷୀୟ ସିରାଜ ବର୍ତ୍ତମାନ ଭାରତୀୟ ଦଳ ପାଇଁ ତିନୋଟି ଫର୍ମାଟ୍‌ରେ ଖେଳୁଛନ୍ତି । ତେଣୁ ଭାରତୀୟ ଦଳ ସହ ଥିବା ସମୟରେ ରଣଜୀ ମ୍ୟାଚ୍‌ରେ ତାଙ୍କ ଅନୁପସ୍ଥିତିରେ ଉପଅଧିନାୟକ ଚାମା ମିଲିନ୍ଦ ହାଇଦ୍ରାବାଦର ନେତୃତ୍ୱ ନେବେ ।

ସିରାଜ ନିକଟରେ ସାଉଥ୍ ଜୋନ୍ ପକ୍ଷରୁ ଦୁଲୀପ ଟ୍ରଫିର ଫାଇନାଲ୍ ମଧ୍ୟ ଖେଳିଥିଲେ । ତେବେ ଏହି ମ୍ୟାଚ୍‌ରେ ତାଙ୍କ ପ୍ରଦର୍ଶନ ବିଶେଷ ଭଲ ରହିନଥିଲା । ଦୁଇଟି ଇନିଂସ୍‌ରେ ମିଶି ସେ ୪୧ ଓଭର ବୋଲିଂ କରିଥିଲେ ମଧ୍ୟ ମାତ୍ର ଗୋଟିଏ ୱିକେଟ୍ ନେଇଥିଲେ । ଏବେ ରଣଜୀ ଟ୍ରଫିରେ ଅଧିନାୟକ ଭାବେ ସିରାଜ କିଭଳି ଦଳକୁ ଆଗେଇ ନେଉଛନ୍ତି, ତାହା ଉପରେ କ୍ରିକେଟ୍ ପ୍ରେମୀଙ୍କ ନଜର ରହିବ ।